ಹೈದರಾಬಾದ್‌: ಎಸ್‌.ಎಸ್‌.ರಾಜಮೌಳಿ (SS Rajamouli) ನಿರ್ದೇಶನದ ʼಆರ್‌ಆರ್‌ಆರ್‌ʼ ಸಿನಿಮಾ ಪ್ರಶಸ್ತಿಗಳ ಮೇಲೆ ಪ್ರಶಸ್ತಿಗಳನ್ನು ಬಾಚಿಕೊಳ್ಳುತ್ತಿದೆ. ಈ ಸಂತಸದಲ್ಲಿರುವ ರಾಜಮೌಳಿ ಅವರು ಹಾಲಿವುಡ್‌ನ ಮಾಧ್ಯಮವೊಂದಕ್ಕೆ ಸಂದರ್ಶನ ನೀಡಿದ್ದಾರೆ. ಆ ವೇಳೆ ಅವರು ತಾವು ಹಣಕ್ಕಾಗಿ ಸಿನಿಮಾಗಳನ್ನು ಮಾಡುವುದಾಗಿ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: Rajamouli Speech | ಕುಟುಂಬ, ಜೈಹಿಂದ್‌, ಮೇರಾ ಭಾರತ್‌ ಮಹಾನ್‌; ರಾಜಮೌಳಿ ಭಾಷಣಕ್ಕೆ ಕಂಗನಾ ಸೇರಿ ಹಲವರ ಮೆಚ್ಚುಗೆ
“ನಾನು ಹಣಕ್ಕಾಗಿ ಸಿನಿಮಾ ಮಾಡುತ್ತೇನೆ. ಜನರಿಗಾಗಿ ಸಿನಿಮಾ ಮಾಡುತ್ತೇನೆ. ವಿಮರ್ಶಕರಿಂದ ಮೆಚ್ಚುಗೆ ಪಡೆಯಬೇಕೆಂದು ಸಿನಿಮಾ ಮಾಡುವುದಿಲ್ಲ. ಆರ್‌ಆರ್‌ಆರ್‌ ಸಿನಿಮಾ ಕಮರ್ಷಿಯಲ್‌ ಆಗಿ ಮಾಡಿರುವುದು. ಅದು ಹಣವನ್ನೂ ತಂದುಕೊಟ್ಟಿದೆ. ಹಾಗೆಯೇ ಜನರೂ ಕೂಡ ಅತ್ಯಂತ ಇಷ್ಟ ಪಟ್ಟು ಸಿನಿಮಾ ನೋಡಿದ್ದಾರೆ” ಎಂದು ರಾಜಮೌಳಿ ಅವರು ಸಂದರ್ಶನದಲ್ಲಿ ಹೇಳಿದ್ದಾರೆ.
“ಸಿನಿಮಾದಿಂದ ಹಣ ಸಿಗುತ್ತದೆ ಹಾಗೆಯೇ ಅಭಿಮಾನಿಗಳ ಪ್ರೀತಿ ಸಿಗುತ್ತದೆ. ಪ್ರಶಸ್ತಿ ಎನ್ನುವುದು ಒಂದು ರೀತಿ ಪ್ರೀತಿಯ ವಿಸ್ತರಣೆ ಇದ್ದಂತೆ. ನಮ್ಮ ಸಿನಿಮಾಕ್ಕೆ ಪ್ರಶಸ್ತಿ ಬರುತ್ತಿರುವುದು ನಮ್ಮ ಸಿನಿಮಾ ತಂಡದ ಶ್ರಮಕ್ಕೆ ಪ್ರತಿಫಲವಿದ್ದಂತೆ. ಈ ವಿಚಾರದಲ್ಲಿ ಸಂತಸವಿದೆ” ಎಂದು ಹೇಳಿದ್ದಾರೆ ರಾಜಮೌಳಿ.
ಇದನ್ನೂ ಓದಿ: RRR Movie | ಎರಡು ಬಾರಿ ಆರ್‌ಆರ್‌ಆರ್‌ ಸಿನಿಮಾ ವೀಕ್ಷಿಸಿದ ಜೇಮ್ಸ್ ಕ್ಯಾಮರೂನ್: ಪೋಸ್ಟ್‌ ಹಂಚಿಕೊಂಡ ರಾಜಮೌಳಿ!
ಆಸ್ಕರ್‌ ಪ್ರಶಸ್ತಿಗೆ ಭಾರತದಿಂದ ಆರ್‌ಆರ್‌ಆರ್‌ ಬದಲು ʼಛೆಲ್ಲೋ ಶೋʼ ಸಿನಿಮಾ ಆಯ್ಕೆಯಾದ ಬಗ್ಗೆಯೂ ರಾಜಮೌಳಿ ಅವರಿಗೆ ಪ್ರಶ್ನೆ ಕೇಳಲಾಗಿದೆ. ಅದಕ್ಕೆ ಅವರು, “ನಮ್ಮ ಸಿನಿಮಾ ಆಸ್ಕರ್‌ಗೆ ಆಯ್ಕೆ ಆಗದಿರುವುದು ನಿಜಕ್ಕೂ ಬೇಸರ ತಂದಿದೆ. ಆದರೆ ಆಯ್ಕೆಯಾಗಿರುವುದು ನಮ್ಮದೇ ಭಾರತೀಯ ಸಿನಿಮಾ ಎನ್ನುವ ಖುಷಿಯಿದೆ. ಪ್ರಶಸ್ತಿಗೆ ಆಯ್ಕೆ ಆಗದಿರಬಹುದು, ಆದರೆ ಜನರ ಮೆಚ್ಚುಗೆ ನಮಗಿದೆ. ನಮ್ಮ ಸಿನಿಮಾ ಪ್ರಶಸ್ತಿಗೆ ಸಮರ್ಥವಾಗಿತ್ತು ಎನ್ನುವುದೇ ಹಲವರ ಭಾವನೆ” ಎಂದು ಹೇಳಿದ್ದಾರೆ.