ನಟ ಕಿಚ್ಚ ಸುದೀಪ್ ಹುಟ್ಟುಹಬ್ಬ (Sudeep birthday) ಸಂಭ್ರಮ ಮೇಳೈಸಿದ್ದು, ಕಿಚ್ಚನ ಅಭಿಮಾನಿಗಳು ನಿನ್ನೆ ರಾತ್ರಿಯಿಂದಲೇ ಸಂಭ್ರಮಾಚರಣೆಗೆ ಕಿಚ್ಚು ಹಚ್ಚಿದ್ದಾರೆ. 49ನೇ ವಸಂತಕ್ಕೆ ಕಾಲಿಟ್ಟ ತಮ್ಮ ನೆಚ್ಚಿನ ನಟನಿಗೆ ಶುಭಾಶಯ ಕೋರಲು ಅಭಿಮಾನಿಗಳ ಸಾಗರ, ನಟ ಸುದೀಪ್ ಅವರ ಜೆ.ಪಿ.ನಗರ ನಿವಾಸದ ಬಳಿ ನೆರೆದಿದೆ. ಎಲ್ಲರನ್ನೂ ಪ್ರೀತಿಯಿಂದ ಮಾತನಾಡಿಸಿ ಫೋಟೋಗೆ ಸ್ಮೈಲ್‌ ಕೊಡುತ್ತಿದ್ದಾರೆ ಕಿಚ್ಚ ಸುದೀಪ್.
2 ವರ್ಷಗಳಿಂದ ಒಂದಲ್ಲಾ ಒಂದು ಕಾರಣಕ್ಕೆ ನಟ ಸುದೀಪ್ ತಮ್ಮ ಅಭಿಮಾನಿಗಳ ಜೊತೆಯಲ್ಲಿ ಹುಟ್ಟುಹಬ್ಬ ಆಚರಿಸಿಕೊಳ್ಳಲು ಸಾಧ್ಯವಾಗಿರಲಿಲ್ಲ. ಆದರೆ ಈಗ ಕಾಲ ಕೂಡಿಬಂದಿದ್ದು, ರಾತ್ರಿಯಿಂದಲೇ ಸೆಲೆಬ್ರೇಷನ್‌ ಶುರುವಾಗಿದೆ. ಸುದೀಪ್ ಅವರನ್ನು ಭೇಟಿ ಮಾಡಲು ರಾಜ್ಯದ ವಿವಿಧೆಡೆಯಿಂದ ಅಭಿಮಾನಿಗಳು ಆಗಮಿಸಿದ್ದಾರೆ. ಇದೇ ಕಾರಣಕ್ಕೆ ಪೊಲೀಸರು ಸೂಕ್ತ ಭದ್ರತೆ ಒದಗಿಸಿದ್ದಾರೆ. ಆದರೂ ಸ್ಥಳದಲ್ಲಿ ಜನರನ್ನು ನಿಯಂತ್ರಿಸಲು ಪೊಲೀಸರು ಹರಸಾಹಸ ಪಡುತ್ತಿದ್ದಾರೆ.
ಕಿಚ್ಚನ ಹವಾ..!
ನಟ ಸುದೀಪ್ ಚಂದನವನದ ಜೊತೆ ಜೊತೆಗೆ ದೇಶದ ವಿವಿಧ ಭಾಷೆಗಳಲ್ಲಿ ನಟಿಸಿ ಮಿಂಚಿದವರು. ಹಿಂದಿ ಚಿತ್ರರಂಗದಲ್ಲೂ ಸುದೀಪ್ ಸಾಕಷ್ಟು ಉತ್ತಮ ಸಿನಿಮಾಗಳನ್ನ ನೀಡಿದ್ದರು. ಹೀಗಾಗಿ ಸುದೀಪ್ ಅವರಿಗೆ ಬೇರೆ ಬೇರೆ ಭಾಷೆಗಳ ಚಿತ್ರರಂಗದಲ್ಲೂ ಸ್ನೇಹಿತರಿದ್ದಾರೆ. ಮಧ್ಯ ರಾತ್ರಿಯಿಂದಲೇ ಸಾಮಾಜಿಕ ಜಾಲತಾಣದಲ್ಲಿ ನಟ ಸುದೀಪ್ ಅವರಿಗೆ ಶುಭಾಶಯಗಳ ಮಹಾಪೂರವೇ ಹರಿದುಬಂದಿದೆ. ಜೊತೆಗೆ ಸೋಷಿಯಲ್‌ ಮೀಡಿಯಾ ಪೂರ ಕಿಚ್ಚ ಸುದೀಪ್ ಮಯವಾಗಿ ಹೋಗಿದೆ.
ಟ್ವಿಟ್ಟರ್‌ನಲ್ಲಿ ಟ್ರೆಂಡ್..!
ಈಗಾಗಲೇ ಸುದೀಪ್ ಅವರ ಹುಟ್ಟುಹಬ್ಬ ಟ್ವಿಟರ್‌ನಲ್ಲಿ ಟ್ರೆಂಡ್ ಕ್ರಿಯೇಟ್‌ ಮಾಡಿದೆ. ಹತ್ತಾರು ಸಾವಿರ ಟ್ವೀಟ್‌ಗಳು ಸಾಗರದಂತೆ ಟ್ವಿಟರ್‌ಗೆ ಹರಿದು ಬರುತ್ತಿವೆ. ಕರ್ನಾಟಕ ಮಾತ್ರವಲ್ಲ ದೇಶಾದ್ಯಂತ ಕಿಚ್ಚ ಸುದೀಪ್ ಹವಾ ಜೋರಾಗಿದೆ. ಜೊತೆಗೆ ವಿಕ್ರಾಂತ್‌ ರೋಣ ಕೂಡ ಇಂದು ಒಟಿಟಿಗೆ ಎಂಟ್ರಿ ಕೊಡಲಿದ್ದು, ಅಭಿಮಾನಿಗಳ ಸಂಭ್ರಮ ಡಬಲ್‌ ಆಗಿದೆ. ಸುದೀಪ್ ಅಭಿನಯಿಸುತ್ತಿರುವ ಸಿನಿಮಾಗಳಿಂದಲೂ ಸ್ಪೆಷಲ್‌ ಪೋಸ್ಟರ್‌ಗಳನ್ನ ರಿಲೀಸ್‌ ಮಾಡಲಾಗಿದೆ.
ತಮ್ಮ ನಿವಾಸದ ಎದುರು ಅಭಿಮಾನಿಗಳನ್ನು ಕಂಡು, ಅವರ ಪ್ರೀತಿಯನ್ನ ಕಂಡು ನಟ ಕಿಚ್ಚ ಸುದೀಪ್ ಭಾವುಕರಾದರು. ಒಂದು ಕಡೆ ವಿಕ್ರಾಂತ್‌ ರೋಣ ₹250 ಕೋಟಿ ಕ್ಲಬ್‌ ಸೇರಿದ್ದರೆ, ಮತ್ತೊಂದು ಕಡೆ ಅಭಿಮಾನಿಗಳ ಸಾಗರ ಕಿಚ್ಚ ಸುದೀಪ್ ಅವರ ಖುಷಿಯನ್ನ ಡಬಲ್‌ ಮಾಡಿದೆ. ಬರೋಬ್ಬರಿ 2 ವರ್ಷಗಳ ನಂತರ ಸುದೀಪ್ ಅವರ ಹುಟ್ಟುಹಬ್ಬವನ್ನ ಅವರ ಜೊತೆಯಲ್ಲೇ ಆಚರಿಸುವ ಅವಕಾಶ ಅಭಿಮಾನಿಗಳಿಗೆ ಇಂದು ದೊರಕಿದೆ.
ಇದನ್ನೂ ಓದಿ: Sudeep birthday | ಮರಳಿನಲ್ಲಿ ಅರಳಿದ ನಟ ಕಿಚ್ಚ ಸುದೀಪ್!