ಮುಂಬಯಿ: ನಟ ಸುಶಾಂತ್ ಸಿಂಗ್ ರಜಪೂತ್ ಸಾವು ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ. ಸುಶಾಂತ್ ಮೃತದೇಹ 2020ರ ಜೂನ್ 14ರಂದು ಮುಂಬಯಿಯ ಬಾಂದ್ರಾದ ಅಪಾರ್ಟ್ಮೆಂಟ್ನಲ್ಲಿ ನೇಣುಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಸುಶಾಂತ್ ಅವರದ್ದು ಆತ್ಮಹತ್ಯೆಯಲ್ಲ ಕೊಲೆ ಎಂಬ ಆರೋಪ ಕೇಳಿಬಂದ ಬೆನ್ನಲ್ಲೇ ಸಿಬಿಐ ತನಿಖೆಯೂ ಪ್ರಾರಂಭವಾಯಿತು. ಸುಶಾಂತ್ ಸಾವಿನ ಕೇಸ್ನಲ್ಲಿ ಅವರ ಪ್ರೇಯಸಿ ರಿಯಾ ಚಕ್ರವರ್ತಿ ಜೈಲು ಪಾಲಾಗಿ, ಸಿಬಿಐ ವಿಚಾರಣೆಗೆ ಒಳಪಟ್ಟಿದ್ದಾರೆ. ಸದ್ಯ ಜಾಮೀನಿನ ಆಧಾರದಲ್ಲಿ ಹೊರಗಿದ್ದಾರೆ.
ಇನ್ನು ಸುಶಾಂತ್ ಸಾವಿನೊಂದಿಗೆ ಡ್ರಗ್ಸ್ ಕೂಡ ಲಿಂಕ್ ಹಾಕಿಕೊಂಡಿದ್ದು, ಎನ್ಸಿಬಿ, ಸಿಬಿಐ ತನಿಖೆ ನಡೆಯುತ್ತಲೇ ಇದೆ. ಹಾಗೇ ಇಲ್ಲಿ ಹಣಕಾಸಿನ ವಿಷಯದ ನಂಟೂ ಇದ್ದಿದ್ದರಿಂದ ಇಡಿ ಕೂಡ ಹಲವರ ವಿಚಾರಣೆ ಮಾಡಿತ್ತು. ಒಂದು ಹಂತದಲ್ಲಿ ಸುಶಾಂತ್ರದ್ದು ಆತ್ಮಹತ್ಯೆ ಎಂದೂ ಹೇಳಲಾಗಿದೆ. ಆದರೆ ಸುಶಾಂತ್ ಕುಟುಂಬದವರು ಮಾತ್ರ, ಇದೊಂದು ಕೊಲೆ ಎಂದೇ ಪ್ರತಿಪಾದಿಸಿಕೊಂಡು ಬಂದಿದ್ದಾರೆ. ಸದ್ಯ ಈ ಕೇಸ್ನ ತನಿಖೆ ಯಾವ ಹಂತದಲ್ಲಿದೆ ಎಂಬುದು ಅಜ್ಞಾತ ಆಗಿರುವ ಹೊತ್ತಲ್ಲೇ ಒಂದು ಮಹತ್ವದ ವಿಷಯ ಬೆಳಕಿಗೆ ಬಂದಿದೆ. ‘ಸುಶಾಂತ್ ಸಿಂಗ್ ರಜಪೂತ್ ಅವರದ್ದು ಆತ್ಮಹತ್ಯೆಯಲ್ಲ, ಕೊಲೆ’ ಎಂದು ರೂಪ್ಕುಮಾರ್ ಶಾ ಎಂಬುವರು ಹೇಳಿದ್ದಾರೆ.
ಸುಶಾಂತ್ ಸಿಂಗ್ ಮರಣೋತ್ತರ ಪರೀಕ್ಷೆ ನಡೆದ ಕೂಪರ್ ಆಸ್ಪತ್ರೆಯ ಪೋಸ್ಟ್ಮಾರ್ಟಮ್ ವಿಭಾಗದ ಸಿಬ್ಬಂದಿಯಾಗಿರುವ ರೂಪ್ಕುಮಾರ್ ಶಾ ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಮಾತನಾಡುತ್ತ ‘ಸುಶಾಂತ್ ಸಿಂಗ್ ರಜಪೂತ್ ಮರಣೋತ್ತರ ಪರೀಕ್ಷೆ ವೇಳೆ ನಾನು ಇದ್ದೆ. ಅಂದು ಸುಶಾಂತ್ ಮೃತಪಟ್ಟ ದಿನ ನಮ್ಮ ಆಸ್ಪತ್ರೆಗೆ ಒಟ್ಟು ಐದು ಮೃತದೇಹಗಳು ಬಂದಿದ್ದವು. ಒಟ್ಟು ಐದು ಶವಗಳಲ್ಲಿ ಒಂದು ವಿಐಪಿಯೊಬ್ಬರ ಮೃತದೇಹ ಎಂದು ಹೇಳಲಾಗಿತ್ತು. ಆದರೆ ಯಾರದ್ದು ಎಂದು ಗೊತ್ತಾಗಿರಲಿಲ್ಲ. ಬಳಿಕ ಅದು ಸುಶಾಂತ್ ಸಿಂಗ್ ರಜಪೂತ್ದು ಎಂಬುದು ಗೊತ್ತಾಯಿತು. ಶವ ಪರೀಕ್ಷೆ ವೇಳೆ ಅವರ ದೇಹವನ್ನ ನೋಡಿದಾಗ ಅಲ್ಲಿ ಅನೇಕ ಗಾಯದ ಗುರುತುಗಳು ಕಂಡುಬಂದವು. ಕುತ್ತಿಗೆಯ ಮೇಲೆ ಎರಡರಿಂದ ಮೂರು ಗಾಯದ ಗುರುತು ಇದ್ದವು. ಇಡೀ ಪೋಸ್ಟ್ಮಾರ್ಟಮ್ನ್ನು ವಿಡಿಯೊ ರೆಕಾರ್ಡ್ ಮಾಡುವುದು ನಿಯಮ. ಆದರೆ ಹಿರಿಯ ಅಧಿಕಾರಿಗಳು ಅದು ಬೇಡ ಎಂದರು. ಕೆಲವು ಫೋಟೋಗಳನ್ನು ಮಾತ್ರ ತೆಗೆದಿಟ್ಟುಕೊಳ್ಳುವಂತೆ ಹೇಳಿದರು. ಹಾಗಾಗಿ ಅಷ್ಟನ್ನೇ ಮಾಡಿದೆವು’ ಎಂದು ತಿಳಿಸಿದ್ದಾರೆ.
‘ನಾನು ಅಂದು ಸುಶಾಂತ್ ಸಿಂಗ್ ಮೃತದೇಹ ನೋಡುತ್ತಿದ್ದಂತೆ ನನ್ನ ಹಿರಿಯ ಸಿಬ್ಬಂದಿಗೆ ಹೇಳಿದೆ. ಇದು ಆತ್ಮಹತ್ಯೆ ಅಲ್ಲ, ಕೊಲೆ ಎಂದೇ ನನಗೆ ಅನ್ನಿಸುತ್ತಿದೆ ಎಂದು ತಿಳಿಸಿದೆ. ನಮ್ಮ ಆಸ್ಪತ್ರೆ ನಿಯಮದಂತೆ ಮಾಡೋಣ ಎಂಬ ಸಲಹೆಯನ್ನೂ ಕೊಟ್ಟೆ. ಆದರೆ ಅವರು ಒಪ್ಪಲಿಲ್ಲ. ಹೇಳಿದಷ್ಟು ಮಾಡು, ಎಷ್ಟಾಗತ್ತೋ ಅಷ್ಟು ಬೇಗ ಈ ಮೃತದೇಹವನ್ನು ಪೊಲೀಸರಿಗೆ ಒಪ್ಪಿಸಿಬಿಡೋಣ ಎಂದರು. ರಾತ್ರಿ ಹೊತ್ತಲ್ಲಿ ಪೋಸ್ಟ್ಮಾರ್ಟಮ್ ಮಾಡಿದೆವು’ ಎಂದು ರೂಪ್ಕುಮಾರ್ ತಿಳಿಸಿದ್ದಾರೆ. ಈಗ ಇವರು ಕೊಟ್ಟಿರುವ ಹೇಳಿಕೆ ತನಿಖೆಯನ್ನು ಇನ್ನೊಂದು ಸ್ವರೂಪಕ್ಕೆ ಕೊಂಡೊಯ್ಯುವ ಸಾಧ್ಯತೆ ದಟ್ಟವಾಗಿದೆ.
ಇದನ್ನೂ ಓದಿ:Drugs case: ನಟ ಸುಶಾಂತ್ ಸಿಂಗ್ ಡ್ರಗ್ಸ್ ವ್ಯಸನಕ್ಕೆ ಕುಮ್ಮಕ್ಕು ನೀಡಿದ್ದೇ ರಿಯಾ ಚಕ್ರವರ್ತಿ ಎಂದ ಎನ್ಸಿಬಿ