ಮುಂಬೈ: ಆತ್ಮಹತ್ಯೆಗೆ ಶರಣಾದ ಬಾಲಿವುಡ್‌ ನಟ ಸುಶಾಂತ್ ಸಿಂಗ್‌ (Sushanth Singh) ಮನೆಯಲ್ಲಿ ಇದೀಗ ಮತ್ತೊಂದು ಸಾವಾಗಿದೆ. ಸುಶಾಂತ್ ಅವರು ಪ್ರೀತಿಯಿಂದ ಸಾಕಿದ್ದ ನಾಯಿ ʼಫಡ್ಜ್ʼ ಸಾವನ್ನಪ್ಪಿದೆ. ಈ ವಿಚಾರದಲ್ಲಿ ನಟನ ಸಹೋದರಿ ಪ್ರಿಯಾಂಕಾ ಸಾಮಾಜಿಕ ಜಾಲತಾಣಗಳಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ.
ಫಡ್ಜ್-ಸುಶಾಂತ್ ಸಿಂಗ್‌ ಹಾಗೂ ಫಡ್ಜ್ ಜತೆ ತಾವಿರುವ ಫೋಟೋಗಳನ್ನು ಹಂಚಿಕೊಂಡಿರುವ ಪ್ರಿಯಾಂಕಾ “ಫಡ್ಜ್ ನೀನು ಸ್ವರ್ಗದಲ್ಲಿರುವ ನಿನ್ನ ಸ್ನೇಹಿತನೊಂದಿಗೆ ಬದುಕಲು ಹೋಗಿದ್ದೀಯ. ನಾವೂ ನಿನ್ನನ್ನು ಕೆಲ ಸಮಯದಲ್ಲಿ ಹಿಂಬಾಲಿಸುತ್ತೇವೆ. ನಿನ್ನ ಸಾವು ಮನಸ್ಸಿಗೆ ಘಾಸಿ ಮಾಡಿದೆ” ಎಂದು ಬರೆದುಕೊಂಡಿದ್ದಾರೆ.
ಪ್ರಿಯಾಂಕಾ ಹಂಚಿಕೊಂಡಿರುವ ಫೋಟೋದಲ್ಲಿ ಫಡ್ಜ್ ಸುಶಾಂತ್ ಸಿಂಗ್‌ರ ಮುಖದ ಹತ್ತಿರ ತನ್ನ ಮುಖ ಇಟ್ಟಿರುವುದನ್ನು ಕಾಣಬಹುದು. ಹಾಗೆಯೇ ಇನ್ನೊಂದು ಫೋಟೋದಲ್ಲಿ ಫಡ್ಜ್ ನೆಲದ ಮೇಲೆ ಮಲಗಿದ್ದು, ಅದರೊಂದಿಗೆ ಪ್ರಿಯಾಂಕಾ ಅವರು ಕುಳಿತಿರುವುದನ್ನು ಕಾಣಬಹುದಾಗಿದೆ.
ಪ್ರಿಯಾಂಕಾ ಅವರ ಪೋಸ್ಟ್‌ ನೋಡಿರುವ ನೆಟ್ಟಿಗರು ಮೃತ ನಾಯಿಗೆ ಸಂತಾಪ ಸೂಚಿಸಲಾರಂಭಿಸಿದ್ದಾರೆ. “ಫಡ್ಜ್ ನಿಜಕ್ಕೂ ಸುಶಾಂತ್ ಅವರಿಗೆ ಒಳ್ಳೆಯ ಸ್ನೇಹಿತನಾಗಿದ್ದ. ಆದರೆ ಈಗ ಆತನೂ ಸುಶಾಂತ್ ಇರುವ ಜಾಗಕ್ಕೇ ತೆರಳಿದ್ದಾನೆ” ಎಂದು ಹಲವರು ಹೇಳಿದ್ದಾರೆ. ಸುಶಾಂತ್ ಹಾಗೂ ಫಡ್ಜ್ ಒಟ್ಟಿಗೆ ಓಡುವ ವಿಡಿಯೊವನ್ನೂ ಅಭಿಮಾನಿಗಳು ಹಂಚಿಕೊಂಡಿದ್ದು, ಫಡ್ಜ್ ಮತ್ತು ಸುಶಾಂತ್ ಬಾಂಧವ್ಯವನ್ನು ನೆನೆಪಿಸಿದ್ದಾರೆ.