ಬೆಂಗಳೂರು: ಕನ್ನಡ ಕಿರುತೆರೆಯಲ್ಲಿ ಮನ ಮೆಚ್ಚಿದ ಶೋ ಎಂದರೆ ವೀಕೆಂಡ್ ವಿತ್ ರಮೇಶ್ (Weekend With Ramesh). ಸಾಧಕರನ್ನು ಕರೆಸಿ ಕೆಂಪು ಕುರ್ಚಿಯಲ್ಲಿ ಕೂರಿಸಿ ಅವರ ಬದುಕಿನ ನೋವು-ನಲಿವು, ಏಳು-ಬೀಳಿನ ಬಗ್ಗೆ ಮೆಲುಕು ಹಾಕಿ, ಸಾಧನೆಯ ಹಾದಿಯಲ್ಲಿ ನಡೆದ ಘಟನೆಗಳನ್ನು ಪ್ರೇಕ್ಷಕರ ಎದುರು ತೋರಿಸುವ ಅತೀ ದೊಡ್ಡ, ಜನ ಮೆಚ್ಚಿದ ಶೋ ಇದು.
ಇದೀಗ ವೀಕೆಂಡ್ ವಿತ್ ರಮೇಶ್ ಸೀಸನ್ 5 ಶೀಘ್ರದಲ್ಲೆ ಆರಂಭ ಆಗಲಿದೆ ಎಂಬ ಮಾಹಿತಿ ಸಿಕ್ಕಿದೆ. ಜೀ ಕನ್ನಡ ವಾಹಿನಿಯ ಬ್ಯುಸಿನೆಸ್ ಹೆಡ್ ರಾಘವೇಂದ್ರ ಹುಣಸೂರು ಅವರಿಂದ ಅಧಿಕೃತ ಘೋಷಣೆ ಬಾಕಿ ಇದೆ. ಈ ಶೋ ಶುರುವಾದರೆ ಸಾಧಕರಾಗಿ ಯಾರೆಲ್ಲ ಬರಬಹುದು ಎಂಬ ಕುತೂಹಲ ಹುಟ್ಟಿದೆ.
2019ರ ಜುಲೈ ತಿಂಗಳಿನಲ್ಲಿ ‘ವೀಕೆಂಡ್ ವಿತ್ ರಮೇಶ್ 4’ ಕಾರ್ಯಕ್ರಮ ಮುಗಿದಿತ್ತು. ಇದಾದ ಬಳಿಕ ಹೊಸ ಸೀಸನ್ ಶುರುವಾಗಿಲ್ಲ. ‘ವೀಕೆಂಡ್ ವಿತ್ ರಮೇಶ್’ ಮತ್ತೆ ಯಾವಾಗ ಶುರುವಾಗುತ್ತದೆ ಎಂದು ವೀಕ್ಷಕರು ಕೇಳುತ್ತಲೇ ಇದ್ದಾರೆ.
ಇದನ್ನೂ ಓದಿ | Vikrant Rona Movie | ರಕ್ತಕ್ಕೆ ರಕ್ತ, ಕ್ರಾಂತಿಯ ಬೆಂಕಿ : Trailer ಇವೆಂಟ್‌ನಲ್ಲಿ ನಿರ್ದೇಶಕರ ದಂಡು
ಸುಳಿವು ಕೊಟ್ಟರಾ ರಾಘವೇಂದ್ರ ಹುಣಸೂರು?
ರಾಘವೇಂದ್ರ ಹುಣಸೂರು ಫೇಸ್‌ಬುಕ್‌ನಲ್ಲಿ ಈ ಬಗ್ಗೆ ಪೋಸ್ಟ್‌ ಹಂಚಿಕೊಂಡಿದ್ದಾರೆ. “ವೈಯಕ್ತಿಕವಾಗಿ ನನ್ನ ಅಚ್ಚುಮೆಚ್ಚಿನ ಕಾರ್ಯಕ್ರಮ ‘ವೀಕೆಂಡ್ ವಿತ್ ರಮೇಶ್’ ಶುರುವಾಗಿ 8 ವರ್ಷಗಳು ಕಳೆದಿವೆ. ಕಿರುತೆರೆಯಲ್ಲಿ ಮತ್ತೊಂದು ಸೀಸನ್ ಸಾಧ್ಯವೇ? ಸಾಧಕರ ಸೀಟ್ ಮೇಲೆ ಕೂರಲು ಅರ್ಹತೆ ಇರುವ ಸಾಧಕರನ್ನು ದಯವಿಟ್ಟು ನೀವು ಹೆಸರಿಸಿ’’ ಎಂದು ರಾಘವೇಂದ್ರ ಹುಣಸೂರು ಫೇಸ್‌ಬುಕ್‌ನಲ್ಲಿ ಬರೆದುಕೊಂಡಿದ್ದಾರೆ.
‘ವೀಕೆಂಡ್ ವಿತ್ ರಮೇಶ್’ ಕಾರ್ಯಕ್ರಮದ ಮೊದಲ ಸೀಸನ್ 2014ರಲ್ಲಿ ಪ್ರಸಾರ ಕಂಡಿತ್ತು. ಎರಡನೇ ಸೀಸನ್ 2015-16ರಲ್ಲಿ, ಮೂರನೇ ಸೀಸನ್ 2017ರಲ್ಲಿ, 4ನೇ ಸೀಸನ್ 2019ರಲ್ಲಿ ಪ್ರಸಾರವಾಗಿತ್ತು.
ಪುನೀತ್ ರಾಜ್‌ಕುಮಾರ್, ವಿ. ರವಿಚಂದ್ರನ್, ಅರ್ಜುನ್ ಸರ್ಜಾ, ಯಶ್, ದ್ವಾರಕೀಶ್, ಟಿ.ಎನ್.ಸೀತಾರಾಮ್, ಯೋಗರಾಜ್ ಭಟ್, ಶಿವರಾಜ್ ಕುಮಾರ್, ಕಿಚ್ಚ ಸುದೀಪ್, ಪ್ರಕಾಶ್ ರಾಜ್, ಜಗ್ಗೇಶ್, ಗಂಗಾವತಿ ಪ್ರಾಣೇಶ್, ಭಾರತಿ ವಿಷ್ಣುವರ್ಧನ್, ಜಯಂತ್ ಕಾಯ್ಕಿಣಿ, ಕಾಶೀನಾಥ್, ನ್ಯಾ. ಎನ್. ಸಂತೋಷ್ ಹೆಗ್ಡೆ, ಬಿ. ಜಯಶ್ರೀ, ವಿಜಯ್ ಸಂಕೇಶ್ವರ್, ಎಚ್‌.ಡಿ.ದೇವೇಗೌಡ, ಗಣೇಶ್, ಡಾ. ವೀರೇಂದ್ರ ಹೆಗ್ಗಡೆ, ಪ್ರೇಮ, ಎನ್.ಆರ್.ನಾರಾಯಣ ಮೂರ್ತಿ, ಸುಧಾ ಮೂರ್ತಿ, ಸುಮಲತಾ, ಟಿ.ಎಸ್‌.ನಾಗಾಭರಣ, ಟೈಗರ್ ಬಿ.ಬಿ.ಅಶೋಕ್ ಕುಮಾರ್, ಚಂದ್ರಶೇಖರ ಕಂಬಾರ ಮುಂತಾದ ಸಾಧಕರು ‘ವೀಕೆಂಡ್ ವಿತ್ ರಮೇಶ್’ ಕಾರ್ಯಕ್ರಮದ ಸಾಧಕರ ಸೀಟ್‌ನಲ್ಲಿ ಭಾಗಿಯಾಗಿದ್ದರು.
ಇದನ್ನೂ ಓದಿ | Ismart Jodi | ಕಿರುತೆರೆಗೆ ಬರಲು ಸಜ್ಜಾಗಿದೆ ʻಇಸ್ಮಾರ್ಟ್‌ ಜೋಡಿʼ: ಸ್ಪರ್ಧಿಗಳು ಯಾರು?