ಚೆನ್ನೈ: 2023ರಲ್ಲಿ ʼವಾರಿಸುʼ (Varisu) ಮತ್ತು ʼಲಿಯೋʼ (Leo) ಮೂಲಕ ಯಶಸ್ಸು ಗಳಿಸಿದ್ದ ಕಾಲಿವುಡ್‌ ದಳಪತಿ ವಿಜಯ್ (Thalapathy Vijay) ಅಭಿನಯದ ಮುಂದಿನ ಚಿತ್ರದ ಟೈಟಲ್‌ ರಿವೀಲ್‌ ಆಗಿದೆ. ವಿಜಯ್ ನಟನೆಯ ಈ 68ನೇ ಚಿತ್ರಕ್ಕೆ ಜನಪ್ರಿಯ ನಿರ್ದೇಶಕ ವೆಂಕಟ್ ಪ್ರಭು ಆ್ಯಕ್ಷನ್‌ ಕಟ್‌ ಹೇಳುತ್ತಿದ್ದು, ಅರ್ಚನಾ ಕಲ್ಪತಿ ಬಂಡವಾಳ ಹೂಡುತ್ತಿದ್ದಾರೆ. ವಿಶೇಷ ಎಂದರೆ ಈ ಚಿತ್ರದಲ್ಲಿ ವಿಜಯ್ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಟೈಟಲ್‌ ಏನು?
ಈ ಚಿತ್ರಕ್ಕೆ ‘ಗ್ರೇಟೆಸ್ಟ್ ಆಫ್ ಆಲ್ ಟೈಮ್’ (The Greatest of All Time) ಎಂದು ಹೆಸರಿಡಲಾಗಿದ್ದು, ಇದನ್ನು ಚುಟುಕಾಗಿ ‘ಗೋಟ್’ (G.O.A.T.) ಎಂದು ಕರೆಯಲಾಗುತ್ತದೆ. ಈ ಸಿನಿಮಾವು ಫೈಟರ್ ಜೆಟ್ ವಿಮಾನವನ್ನು ಚಲಾಯಿಸುವ ಪೈಲೆಟ್ಗಳ ಕತೆಯನ್ನು ಒಳಗೊಂಡಿದೆ ಎಂದು ಮೂಲಗಳು ತಿಳಿಸಿವೆ. ʼಗೋಟ್ʼ ಚಿತ್ರದ ಬಹು ಮುಖ್ಯ ಭಾಗಗಳನ್ನು ಬ್ಯಾಂಕಾಕ್‌ನಲ್ಲಿ ಚಿತ್ರೀಕರಿಸಲು ಸಿನಿಮಾ ತಂಡ ಯೋಜನೆ ರೂಪಿಸಿದೆ.
Our Thalapathy is the
— Archana Kalpathi (@archanakalpathi) December 31, 2023
Greatest Of All Time 🔥🔥🔥🔥#GreatestOfAllTime #Thalapathy68FirstLook#AGS25 #Thalapathy68 @actorvijay Sir@ags_production #KalpathiSAghoram #KalpathiSGanesh #KalpathiSSuresh @vp_offl @archanakalpathi @aishkalpathi @thisisysr @actorprashanth… pic.twitter.com/SOgQSGHXEF
ಕಳೆದ ಕೆಲವು ದಿನಗಳಿಂದ ‘ದಳಪತಿ 68’ ಚಿತ್ರದ ಶೀರ್ಷಿಕೆ ಕುರಿತು ಅಭಿಮಾನಿಗಳ ಮಧ್ಯೆ ಚರ್ಚೆ ನಡೆಯುತ್ತಿದ್ದವು. ‘ಬಾಸ್’ ಅಥವಾ ‘ಒಗಟು’ ಎಂಬ ಟೈಟಲ್‌ ಇಡಲಾಗುವುದು ಎಂದು ವರದಿಯಾಗಿತ್ತು. ಇದೀಗ ನಿರ್ಮಾಪಕಿ ಅರ್ಚನಾ ಕಲ್ಪತಿ ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಫಸ್ಟ್‌ ಲುಕ್‌ ರಿವೀಲ್‌ ಮಾಡುವ ಮೂಲಕ ಗೊಂದಲಗಳಿಗೆ ತೆರೆ ಎಳೆದಿದ್ದಾರೆ.
ಬಹು ತಾರಾಗಣ
ವಿಜಯ್ ಅಭಿನಯದ ಈ ಚಿತ್ರ ಶೀರ್ಷಿಕೆ ರೀತಿಯೇ ವಿಶೇಷವಾಗಿರಲಿದೆ. ಅದಕ್ಕೆ ತಕ್ಕಂತೆ ಬಹು ತಾರಾಗಣದಿಂದಾಗಿಯೇ ಈ ಚಿತ್ರ ಕುತೂಹಲ ಮೂಡಿಸಿದೆ. ಆ್ಯಕ್ಷನ್‌ ಚಿತ್ರವಾಗಿರುವ ಇದರಲ್ಲಿ ವಿಜಯ್ ಇದುವರೆಗೆ ಮಾಡದಿರುವ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಜನಪ್ರಿಯ ಕಲಾವಿದರಾದ ಪ್ರಶಾಂತ್‌, ಪ್ರಭುದೇವ, ಸ್ನೇಹಾ, ಲೈಲಾ, ಮೀನಾಕ್ಷಿ ಚೌಧರಿ, ಮೋಹನ್‌, ಜಯರಾಮ್‌, ಅಜ್ಮಲ್‌ ಅಮೀರ್‌ ಮತ್ತು ಯೋಗಿ ಬಾಬು ಮುಖ್ಯ ಪಾತ್ರದಲ್ಲಿ ನಟಿಸಲಿದ್ದಾರೆ. ಇನ್ನು ವಿಟಿವಿ ಗಣೇಶ್‌, ವೈಭವ್‌, ಅರವಿಂದ್‌ ಆಕಾಶ್‌, ಅಜಯ್‌ ರಾಜ್‌ ಮತ್ತಿತರರು ಪೋಷಕ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಜನಪ್ರಿಯ ಸಂಗೀತ ನಿರ್ದೇಶಕ ಯುವನ್‌ ಶಂಕರ್‌ ರಾಜಾ ಸಂಗೀತ ಸಂಯೋಜನೆ, ಸಿದ್ಧಾರ್ಥ್‌ ನುನಿ ಛಾಯಾಗ್ರಹಣ ʼಗೋಟ್ʼ ಚಿತ್ರಕ್ಕೆ ಇರಲಿದೆ.
ಇದನ್ನೂ ಓದಿ: Actor Vijay: ತಮಿಳು ನಟ ವಿಜಯ್ ಮೇಲೆ ಚಪ್ಪಲಿ ಎಸೆತ; ಕಾರಣ ಏನು?
2007ರ ʼಚೆನ್ನೈ 600028ʼ ಚಿತ್ರದ ನಿರ್ದೇಶನಕ್ಕಾಗಿ ತಮಿಳುನಾಡು ರಾಜ್ಯ ಚಲನಚಿತ್ರ ಪ್ರಶಸ್ತಿ ಪಡೆದ ವೆಂಕಟ್ ಪ್ರಭು ಮಾಸ್‌ ಚಿತ್ರಕ್ಕೂ ಆಕ್ಷನ್‌ ಕಟ್‌ ಹೇಳಿದ್ದಾರೆ. ವೆಂಕಟ್ ಪ್ರಭು ನಿರ್ದೇಶನದಲ್ಲಿ 2011ರಲ್ಲಿ ತೆರೆಕಂಡ ಅಜಿತ್‌-ತ್ರಿಶಾ ಅಭಿನಯದ ʼಮಂಕಾತʼ ಚಿತ್ರ ಬಾಕ್ಸ್‌ ಆಫೀಸ್‌ನಲ್ಲಿ ಕಮಾಲ್‌ ಮಾಡಿತ್ತು. 2021ರಲ್ಲಿ ಅವರು ʼಲೈವ್‌ ಟೆಲಿಕಾಸ್ಟ್‌ʼ ಎನ್ನುವ ವೆಬ್‌ ಸೀರಿಸ್‌ ಅನ್ನೂ ನಿರ್ದೇಶಿಸಿದ್ದಾರೆ. 2023ರಲ್ಲಿ ವೆಂಕಟ್ ಪ್ರಭು ನಿರ್ದೇಶನದ ʼಕಸ್ಟಡಿʼ ಚಿತ್ರ ತೆರೆ ಕಂಡಿತ್ತು. ಇದು ತಮಿಳು ಮತ್ತು ತೆಲುಗಿನಲ್ಲಿ ಏಕ ಕಾಲಕ್ಕೆ ರಿಲೀಸ್‌ ಆಗಿತ್ತು. ನಾಗ ಚೈತನ್ಯ, ಕೃತಿ ಶೆಟ್ಟಿ, ಅರವಿಂದ ಸ್ವಾಮಿ, ಪ್ರಿಯಾಮಣಿ ಮತ್ತಿತರರು ನಟಿಸಿದ್ದ ಈ ಚಿತ್ರ ಹೇಳಿಕೊಳ್ಳುವಷ್ಟು ಕಲೆಕ್ಷನ್‌ ಮಾಡಿರಲಿಲ್ಲ. ಇದೀಗ ʼಗೋಟ್ʼ ಚಿತ್ರದ ಮೇಲೆ ಎಲ್ಲರ ನಿರೀಕ್ಷೆ ಇದೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಮೆಂಟ್ ಮೂಲಕ ತಿಳಿಸಿ