ಮುಂಬಯಿ: ನಟ ಸುಶಾಂತ್ ಸಿಂಗ್ ಮೃತಪಟ್ಟಾಗ ಅದು ಆತ್ಮಹತ್ಯೆಯಲ್ಲ, ಕೊಲೆ. ಸುಶಾಂತ್ ಸಿಂಗ್ ರಜಪೂತ್ ಸಾವಿಗೆ ಬಾಲಿವುಡ್ನಲ್ಲಿರುವ ನೆಪೋಟಿಸಂ (ಸ್ವಜನಪಕ್ಷಪಾತ) ಕಾರಣ ಎಂದು ಬಲವಾಗಿ ಪ್ರತಿಪಾದಿಸುತ್ತಿರುವ ಬಾಲಿವುಡ್ ನಟಿ ಕಂಗನಾ ರಣಾವತ್, ಇದೀಗ ನಟಿ ತುನಿಶಾ ಶರ್ಮಾಳದ್ದೂ ಕೊಲೆ ಎಂದೇ ಹೇಳುತ್ತಿದ್ದಾರೆ.
ಬಾಲಿವುಡ್ನ ಕಿರತೆರೆ ನಟಿ ತುನಿಶಾ ಅವರು ಡಿಸೆಂಬರ್ 24ರಂದು ಮಹಾರಾಷ್ಟ್ರದ ಪಾಲ್ಘರ್ನಲ್ಲಿರುವ ಶೂಟಿಂಗ್ ಸೆಟ್ನಲ್ಲಿಯೇ ನೇಣುಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಈ ಕೇಸ್ನಲ್ಲಿ ತುನಿಶಾ ಮಾಜಿ ಪ್ರಿಯಕರ ಶಿಜಾನ್ ಮೊಹಮ್ಮದ್ ಖಾನ್ನ್ನು ಬಂಧಿಸಿ ಪೊಲೀಸರು ವಿಚಾರಣೆಗೆ ಒಳಪಡಿಸಿದ್ದಾರೆ. ತುನಿಶಾ ಮತ್ತು ಶಿಜಾನ್ ನಡುವೆ ಪ್ರೇಮ ಸಂಬಂಧವಿತ್ತು. ಇತ್ತೀಚೆಗಷ್ಟೇ ಶಿಜಾನ್ ಬ್ರೇಕಪ್ ಮಾಡಿಕೊಂಡಿದ್ದ. ಹೀಗಾಗಿ ಮನನೊಂದು ಖಿನ್ನತೆಗೆ ಜಾರಿದ್ದ ತುನಿಶಾ, ಶೂಟಿಂಗ್ ಸೆಟ್ನಲ್ಲಿ ಶಿಜಾನ್ ಮೇಕಪ್ ಕೋಣೆಯಲ್ಲಿರುವ ಶೌಚಗೃಹದಲ್ಲೇ ನೇಣುಬಿಗಿದುಕೊಂಡು ಮೃತಪಟ್ಟಿದ್ದಾರೆ.
ತುನಿಶಾ ಸಾವಿನ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಹಾಕಿದ ಕಂಗನಾ ರಣಾವತ್ ‘ಮಹಿಳೆ ಎಲ್ಲವನ್ನೂ ನಿಭಾಯಿಸಬಲ್ಲಳು. ನಿಜವಾದ ಪ್ರೀತಿ ಕಳೆದು ಹೋದಾಗ, ಮದುವೆ ಮುರಿದು ಬಿದ್ದಾಗ, ಸಂಬಂಧ ಒಡೆದು ಹೋದಾಗ ಅಥವಾ ಪ್ರೀತಿಸಿದವರು ದೂರವಾದಾಗಿನ ಕ್ಷಣಗಳನ್ನು ಸ್ತ್ರೀಯಾದವಳು ನಿಭಾಯಿಸುತ್ತಾಳೆ, ಆ ನೋವುಗಳನ್ನೆಲ್ಲ ಸಹಿಸಿಕೊಂಡು ಬದುಕು ಮುಂದುವರಿಸುತ್ತಾಳೆ. ಆದರೆ ತನ್ನ ಪ್ರೇಮಕಥೆಯಲ್ಲಿ ‘ಪ್ರೀತಿ’ಯೇ ಇಲ್ಲ ಎಂಬುದನ್ನು ಆಕೆ ಎಂದಿಗೂ ಸಹಿಸಿಕೊಳ್ಳುವುದಿಲ್ಲ. ಅಂದರೆ, ತಾನು ಪ್ರೀತಿಸಿದವನು, ತನ್ನನ್ನು ಪ್ರೀತಿಸಿಯೇ ಇಲ್ಲ, ಸುಮ್ಮನೆ ಜತೆಗಿದ್ದ ಎಂಬುದನ್ನು ಆಕೆ ಯಾವತ್ತಿಗೂ ಸಹಿಸಲಾರಳು. ಆ ನೋವನ್ನು ತಡೆದುಕೊಳ್ಳಲು ಆಕೆಗೆ ಸಾಧ್ಯವಾಗುವುದೇ ಇಲ್ಲ. ಪ್ರೀತಿಸಿಕೊಂಡ ವ್ಯಕ್ತಿ ತಿರುಗಿ ಪ್ರೀತಿಸಿಲಿಲ್ಲ. ಆತ ಇವಳನ್ನು ಕೇವಲ ದೈಹಿಕವಾಗಿ ಮತ್ತು ಭಾವನಾತ್ಮಕವಾಗಿ ಬಳಸಿಕೊಂಡ. ಅವಳ ಪ್ರೀತಿ ಮತ್ತು ದುರ್ಬಲತೆಯನ್ನೇ ಅಸ್ತ್ರವಾಗಿಸಿಕೊಂಡು, ಆಕೆಯನ್ನೇ ಶೋಷಿಸಿದ. ಈ ವಿಷಯ ಆಕೆಯ ಅರಿವಿಗೆ ಬರುತ್ತಿದ್ದಂತೆ, ಅವಳು ತನ್ನನ್ನೇ ವಿರೂಪಗೊಳಿಸಿಕೊಳ್ಳಲು ಪ್ರಾರಂಭಿಸಿದಳು. ಅಂತಿಮವಾಗಿ ಒಂದು ಶಾಕಿಂಗ್ ನಿರ್ಧಾರ ತೆಗೆದುಕೊಂಡುಬಿಟ್ಟಿದ್ದಾಳೆ. ನಾನು ಪ್ರೀತಿಸಲ್ಪಡುತ್ತಿಲ್ಲ ಎಂಬ ವಾಸ್ತವ ಅರ್ಥವಾಗುತ್ತಿದ್ದಂತೆ ಅವಳು ತನ್ನ ಗ್ರಹಿಕಾ ಸಾಮರ್ಥ್ಯ ಕಳೆದುಕೊಂಡಳು. ಇದ್ದರೂ-ಸತ್ತರೂ ಏನೂ ವ್ಯತ್ಯಾಸ ಇಲ್ಲ ಎಂಬ ಸ್ಥಿತಿ ಅದು. ಹಾಗಾಗಿಯೇ ಆಕೆ ತನ್ನ ಜೀವನನ್ನು ಕೊನೆಗೊಳಿಸಿಕೊಂಡಳು. ಅವಳು ಒಬ್ಬಳೇ ಇದನ್ನು ಮಾಡಿಲ್ಲ. ಇದೊಂದು ಕೊಲೆ ಎಂದೇ ಭಾವಿಸಬೇಕು’ ಎಂದು ಭಾವನಾತ್ಮಕ ಸಾಲುಗಳನ್ನು ಬರೆದಿದ್ದಾರೆ.
ಹಾಗೇ, ‘ಪ್ರೀತಿಸಿದವಳ/ಮದುವೆಯಾದವಳ ಒಪ್ಪಿಗೆ ಇಲ್ಲದೆ ಪುರುಷರು ಬಹುಪತ್ನಿಯರನ್ನು/ ಹಲವು ಹುಡುಗಿಯರ ಜತೆ ಸಂಬಂಧ ಇಟ್ಟುಕೊಳ್ಳುವುದನ್ನು ಕ್ರಿಮಿನಲ್ ಅಪರಾಧ ಎಂದೇ ಪರಿಗಣಿಸಬೇಕು. ಒಬ್ಬ ಮಹಿಳೆಯನ್ನು ದೈಹಿಕವಾಗಿ, ಮಾನಸಿಕವಾಗಿ, ಭಾವನಾತ್ಮಕವಾಗಿ ಕಾಳಜಿ ಮಾಡದೆ, ಆಕೆಯ ಭಾವನೆಗಳ ಜವಾಬ್ದಾರಿಯನ್ನು ತೆಗೆದುಕೊಳ್ಳದೆ ಕೇವಲ ಲೈಂಗಿಕವಾಗಿ ಬಳಸಿಕೊಂಡು ನಂತರ ಏಕಾಏಕಿ, ಸರಿಯಾದ ಕಾರಣವೇ ಇಲ್ಲದೆ ಸಂಬಂಧ ಮುರಿದುಕೊಳ್ಳುವುದು ಕೂಡ ಕ್ರಿಮಿನಲ್ ಅಪರಾಧ ಆಗಬೇಕು’ ಎಂದು ಕಂಗನಾ ಇನ್ಸ್ಟಾಗ್ರಾಂ ಸ್ಟೋರಿ ಹಾಕಿದ್ದಾರೆ.
‘ನಾವು ನಮ್ಮ ಹೆಣ್ಣುಮಕ್ಕಳ ಬಗ್ಗೆ ಕಾಳಜಿ ವಹಿಸಬೇಕು. ಹೆಣ್ಣನ್ನು ಸಂರಕ್ಷಿಸಿ, ಕಾಪಾಡಿಕೊಳ್ಳುವುದು ಸರ್ಕಾರಗಳ ಹೊಣೆ. ಈ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಗಮನ ಹರಿಸಲಿ. ಹೆಣ್ಣನ್ನು ಗೌರವಿಸದ ನೆಲ ನಾಶವಾಗುತ್ತದೆ. ಶ್ರೀರಾಮ, ಕೃಷ್ಣ ಎಲ್ಲರೂ ಮಹಿಳೆಯರನ್ನು ಗೌರವಿಸಿದವರು. ಇಂಥ ನಾಡಿನಲ್ಲಿ ಮಹಿಳೆಯರ ಮೇಲೆ ಆ್ಯಸಿಡ್ ಹಾಕುವುದು, ಅವರನ್ನು ಕತ್ತರಿಸಿ, ತುಂಡರಿಸಿ ಕೊಲ್ಲುವುದು ನಿಜಕ್ಕೂ ಆಘಾತಕಾರಿ. ಇಂಥ ಕೃತ್ಯಗಳನ್ನು ಎಸಗಿದವರ ವಿರುದ್ಧ ತತ್ಕ್ಷಣದ ಕ್ರಮ ಜರುಗಬೇಕು. ಅವರಿಗೆ ಮರಣದಂಡನೆ ಶಿಕ್ಷೆ ವಿಧಿಸಬೇಕು’ ಎಂದು ಕಂಗನಾ ರಣಾವತ್ ಹೇಳಿದ್ದಾರೆ.
ಇದನ್ನೂ ಓದಿ: Kangana Ranaut | ನಾನು ಯಾವತ್ತೂ ಆ ರೀತಿ ಡ್ಯಾನ್ಸ್‌ ಮಾಡಿಲ್ಲ: ಕಂಗನಾ ರಣಾವತ್