ಕನ್ನಡದಲ್ಲಿ ರಕ್ಷಿತ್‌ ಶೆಟ್ಟಿ ಅವರ ʼಚಾರ್ಲಿʼ ಸಿನಿಮಾ ಬಿಡುಗಡೆಯಾಗಿ ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ವೀಕ್ಷಕರ ಮನಸ್ಸು ಗೆದ್ದಿತ್ತು. ಅದರಲ್ಲಿದ್ದ ನಾಯಿಯನ್ನು ಕಂಡೇ ಅನೇಕರು ನಾಯಿ ಸಾಕುವುದಕ್ಕೆ ಆರಂಭಿಸಿದರು ಕೂಡ. ಇದೀಗ ನಾಯಿಗಳ ಮತ್ತೊಂದು ಸಿನಿಮಾ ತೆರೆಗೆ ಬರುವುದಕ್ಕೆ ಸಿದ್ಧವಾಗುತ್ತಿದೆ. ಮಲಯಾಳಂನಲ್ಲಿ ವಾಲಟ್ಟಿ (Valatty Movie) ಹೆಸರಿನಲ್ಲಿ ನಾಯಿಗಳ ಸಿನಿಮಾ ತಯಾರಾಗಿದ್ದು, ಭಾರೀ ಮೆಚ್ಚುಗೆಯನ್ನೂ ಪಡೆದುಕೊಳ್ಳುತ್ತಿದೆ.
ʼವಾಲಟ್ಟಿʼ ಸಿನಿಮಾದ ಟ್ರೈಲರ್‌ ಅನ್ನು ಜುಲೈ10ರಂದು ಬಿಡುಗಡೆ ಮಾಡಲಾಗಿದೆ. ಅದರಲ್ಲಿ ಎರಡು ನಾಯಿಗಳ ನಡುವೆ ಪ್ರೇಮ ಹುಟ್ಟುವುದು, ಮತ್ತೊಂದು ನಾಯಿ ಅವುಗಳ ಜತೆ ನಿಲ್ಲುವುದನ್ನು ತೋರಿಸಲಾಗಿದೆ. ಅದಲ್ಲದೆ ಹಲವಾರು ನಾಯಿಗಳು ಈ ಸಿನಿಮಾದಲ್ಲಿ ನಟಿಸಿವೆ ಎನ್ನುವ ಗುಟ್ಟನ್ನು ಸಿನಿಮಾದ ಟ್ರೈಲರ್‌ ಬಿಟ್ಟುಕೊಟ್ಟಿದೆ. 9 ನಾಯಿಗಳು ಈ ಸಿನಿಮಾದಲ್ಲಿ ಮುಖ್ಯ ಪಾತ್ರ ವಹಿಸಿವೆ. ಅದಕ್ಕೆಂದೇ ಅವುಗಳಿಗೆ ಎರಡು ವರ್ಷಗಳ ಕಾಲ ತರಬೇತಿಯನ್ನು ಕೊಡಲಾಗಿದೆ.
ಇದನ್ನೂ ಓದಿ: Video Viral : ಕುದಾಪುರದಲ್ಲಿ ಓಡಾಡ್ತು ಚಿರತೆ! ವಿಡಿಯೊ ನಕಲಿ ಎಂದ ಡಿಆರ್‌ಡಿಒ
ಈ ಸಿನಿಮಾದ ಟ್ರೈಲರ್‌ ನೋಡಿರುವ ಜನರು ಭಾರೀ ಮೆಚ್ಚುಗೆಯನ್ನು ವ್ಯಕ್ತಪಡಿಸುತ್ತಿದ್ದಾರೆ. ನಾಯಿಗಳಿಂದ ನಟನೆ ಮಾಡಿಸಿರುವ ಸಾಹಸದ ಬಗ್ಗೆಯೂ ಭಾರೀ ಚರ್ಚೆಯಾಗುತ್ತಿದೆ. ಹಾಗೆಯೇ ಸಿನಿಮಾದ ಮೇಕಿಂಗ್‌ ಕೂಡ ಜನರ ಮನ ಸೆಳೆಯುತ್ತಿದೆ. ಇದಕ್ಕೂ ಮೊದಲು ಸಿನಿಮಾದ ಪೋಸ್ಟರ್‌ ಅನ್ನು ಬಿಡುಗಡೆ ಮಾಡಲಾಗಿತ್ತು. ಅದು ಕೂಡ ಜನರ ಪ್ರೀತಿ ಪಡೆಯುವಲ್ಲಿ ಯಶಸ್ವಿಯಾಗಿತ್ತು.
ದೇವನ್‌ ಅವರು ಈ ಸಿನಿಮಾ ಮೂಲಕ ನಿರ್ದೇಶಕರಾಗಿ ಹೊರ ಹೊಮ್ಮುತ್ತಿದ್ದಾರೆ. ʼಹೋಮ್‌ʼ ಸಿನಿಮಾ ಮೂಲಕ ಎಲ್ಲರ ಮನಸ್ಸನ್ನು ಗೆದ್ದಿದ್ದ ನಿರ್ಮಾಪಕ ವಿಜಯ್‌ ಬಾಬು ಅವರು ಈ ಸಿನಿಮಾಕ್ಕೆ ಬಂಡವಾಳವನ್ನು ಹೂಡಿದ್ದಾರೆ. ಈ ಸಿನಿಮಾ ಇದೇ ಜುಲೈ 14ರಂದು ಮಲಯಾಳಂ ಭಾಷೆಯಲ್ಲಿ ಬಿಡುಗಡೆಯಾಗುತ್ತಿದೆ. ಹಾಗೆಯೇ ಜುಲೈ 21ರಂದು ಕನ್ನಡ, ತೆಲುಗು, ತಮಿಳು ಮತ್ತು ಹಿಂದಿಯಲ್ಲಿ ಬಿಡುಗಡೆಯಾಗುತ್ತಿದೆ.
ಇದನ್ನೂ ಓದಿ: Viral Video: ಮೆಟ್ರೋದಲ್ಲಿ ವಿಚಿತ್ರವಾಗಿ ಡಾನ್ಸ್‌ ಮಾಡಿದ ಯುವತಿ; ನೋಡದಿರೋದೇ ವಾಸಿ ಎಂದ ಜನ
ರತ್ನನ್‌ ಪ್ರಪಂಚ ಸಿನಿಮಾ ನಿರ್ದೇಶಕರಾದ ರೋಹಿತ್‌ ಪಡಕಿ ಅವರು ಈ ಸಿನಿಮಾವನ್ನು ಕನ್ನಡಕ್ಕೆ ಡಬ್ಬಿಂಗ್‌ ಮಾಡಿಸಿದ್ದಾರೆ. ಕನ್ನಡ ಕೆಆರ್‌ಜಿ ಸ್ಟುಡಿಯೋಸ್ ವಿಶ್ವದಾದ್ಯಂತ ಈ ಸಿನಿಮಾವನ್ನು ಬಿಡುಗಡೆ ಮಾಡುತ್ತಿದೆ.