ಬೆಂಗಳೂರು: ಕೆಲವು ದಿನಗಳ ಹಿಂದೆ ರಾಕಿಂಗ್‌ ಸ್ಟಾರ್ ಯಶ್ (Actor Yash) ಅವರಿಗೆ ರಾಧಿಕಾ ಅವರ ಪೋಸ್ಟ್‌ ಮೂಲಕ ಅವರ ಅಭಿಮಾನಿಗಳು ಸಿನಿಮಾ ಅಪ್ಡೇಟ್ ನೀಡಬೇಕು ಇಲ್ಲ ಅಂದರೆ ಸ್ಟ್ರೈಕ್ ಮಾಡುವುದಾಗಿ ಧಮ್ಕಿ ಹಾಕಿದ್ದರು. ಇದೀಗ ಯಶ್ ಅಭಿಮಾನಿಗಳಿಗೆ ಸಿಹಿ ಸುದ್ದಿ ಬಂದಿದೆ. ಹೌದು, ವಿಜಯ್‌ ಅಭಿನಯದ ʻವಾರಿಸುʼ ಸಿನಿಮಾ ಖ್ಯಾತಿಯ ನಿರ್ಮಾಪಕ ದಿಲ್ ರಾಜು ಅವರು ಯಶ್ ಜತೆ ಕೆಲಸ ಮಾಡಲಿದ್ದಾರೆ ಎಂಬ ಟ್ವೀಟ್ ವೈರಲ್ ಆಗಿದೆ. ಸದ್ಯ ರಾಮ್ ಚರಣ್ ನಟನೆಯ 15ನೇ ಸಿನಿಮಾ ‘ಗೇಮ್ ಚೇಂಜರ್’ ಸಿನಿಮಾವನ್ನು ದಿಲ್‌ರಾಜು ನಿರ್ಮಾಣ ಮಾಡುತ್ತಿದ್ದಾರೆ.
ದಿಲ್ ರಾಜು ಟ್ವಿಟರ್‌ನಲ್ಲಿ ಆಸ್ಕ್ ದಿಲ್ ರಾಜು ಎಂಬ ಹ್ಯಾಷ್ ಟ್ಯಾಗ್ ಮೂಲಕ ಅಭಿಮಾನಿಗಳಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ. ಇತ್ತೀಚೆಗೆ, ಅಭಿಮಾನಿಯೊಬ್ಬರು ದಿಲ್ ರಾಜು ಅವರನ್ನು ಕೆಜಿಎಫ್ ಸ್ಟಾರ್ ಯಶ್ ಅವರೊಂದಿಗಿನ ಚಿತ್ರವನ್ನು ನಿರೀಕ್ಷಿಸಬಹುದೇ ಎಂದು ಕೇಳಿದರು, ಅದಕ್ಕೆ ಅವರು ‘ಹೌದು’ ಎಂದು ಉತ್ತರಿಸಿದ್ದಾರೆ. ಯಶ್ 19ನೇ ಚಿತ್ರಕ್ಕೆ ದಿಲ್ ರಾಜು ಬಂಡವಾಳ ಹೂಡುತ್ತಾರಾ ಎನ್ನುವ ಪ್ರಶ್ನೆಯೂ ಮೂಡಿದೆ. ದಿಲ್ ರಾಜು ಪರವಾಗಿ ಉತ್ತರಿಸಿರುವ ಶ್ರೀ ವೆಂಕಟೇಶ್ವರ ಕ್ರಿಯೇಷನ್ಸ್, ‘ಹೌದು’ ಎನ್ನುವ ಉತ್ತರ ನೀಡಿದೆ. ಸದ್ಯ ಈ ಟ್ವೀಟ್ ವೈರಲ್ ಆಗುತ್ತಿದೆ.
ಶ್ರೀ ವೆಂಕಟೇಶ್ವರ ಕ್ರಿಯೇಷನ್ಸ್ ಟ್ವೀಟ್
ಇದನ್ನೂ ಓದಿ: Actor Yash: ಯಶ್ ಸಿನಿಮಾ ಅಪ್ಡೇಟ್ ಕೊಡದಿದ್ದರೆ ಸ್ಟ್ರೈಕ್! ರಾಧಿಕಾ ಪಂಡಿತ್‌ಗೆ ಫ್ಯಾನ್ಸ್‌ ಧಮ್ಕಿ
ದಿಲ್ ರಾಜು ಯಾರು?
ದಿಲ್ ರಾಜು ತೆಲುಗು ಚಲನಚಿತ್ರ ನಿರ್ಮಾಪಕ, ಅವರು ತಮ್ಮ ಜೆರ್ಸಿ ಮತ್ತು ವಾರಿಸು ಚಿತ್ರಗಳಿಗೆ ಹೆಸರುವಾಸಿಯಾಗಿದ್ದಾರೆ. 2003ರಲ್ಲಿ ಶ್ರೀ ವೆಂಕಟೇಶ್ವರ ಕ್ರಿಯೇಷನ್ಸ್ ಪ್ರಾರಂಭಿಸಿದರು. ದಿಲ್ ರಾಜು ನಿರ್ಮಿಸಿದ ಮೊದಲ ಚಿತ್ರ ʻದಿಲ್ʼ ಅದೇ ವರ್ಷದಲ್ಲಿ ಬಿಡುಗಡೆಯಾಯಿತು. ರಾಮ ರಾಮ ಕೃಷ್ಣ ಕೃಷ್ಣ, ಬೊಮ್ಮರಿಲ್ಲು, ಶಾದಿ ಮುಬಾರಕ್, ಮತ್ತು ಕೋತಾ ಬಂಗಾರು ಲೋಕಂ ಸೇರಿದಂತೆ ವಿವಿಧ ತೆಲುಗು ಚಿತ್ರಗಳನ್ನು ನಿರ್ಮಿಸಿದ್ದಾರೆ.
ಯಶ್ ಅವರು ಕೆಜಿಎಫ್ ಸಿನಿಮಾ ಬಳಿಕ ಯಶ್ ಯಾವುದೇ ಸಿನಿಮಾ ಬಗ್ಗೆ ಅಪ್ಡೇಟ್ ಹಂಚಿಕೊಂಡಿಲ್ಲ. ವಿಶ್ಯಾದ್ಯಂತ ಬಾಕ್ಸ್ ಆಫೀಸ್ನಲ್ಲಿ ಈ ಚಿತ್ರ 1,400 ಕೋಟಿ ರೂ. ಗಳಿಕೆ ಕಂಡಿದೆ. ಈ ಸಿನಿಮಾ ತೆರೆಗೆ ಬರುತ್ತಿದ್ದಂತೆ ಯಶ್ ಮುಂದಿನ ಸಿನಿಮಾ ಬಗ್ಗೆ ಅವರ ಅಭಿಮಾನಿಗಳಲ್ಲಿ ಕುತೂಹಲ ಹೆಚ್ಚಿದೆ. ಇದಕ್ಕೆ ಈವರೆಗೆ ಉತ್ತರ ಸಿಕ್ಕಿಲ್ಲ. ಅಭಿಮಾನಿಗಳು ಕೂಡ ಕಾದು ಕಾದು ಸುಸ್ತಾಗಿದ್ದಾರೆ.