ಹೈದರಾಬಾದ್‌: ಈ ವರ್ಷದ ಸಂಕ್ರಾಂತಿ ಜತೆ ಸಿನಿಮಾ ಹಬ್ಬವೂ ನಡೆದಿದೆ. ಗೋಪಿಚಂದ್‌ ಮಲಿನೇನಿ ಅವರ ʼವೀರ ಸಿಂಹ ರೆಡ್ಡಿʼ (Veera Simha Reddy) ಸಿನಿಮಾ ಬಿಡುಗಡೆಯಾಗಿ ಐದೇ ದಿನಗಳಲ್ಲಿ 73 ಕೋಟಿ ರೂ. ಬಾಚಿಕೊಂಡಿದೆ. ತಳಪತಿ ವಿಜಯ್‌ ಅವರ ʼವರಿಸುʼ, ಅಜಿತ್‌ ಕುಮಾರ್‌ ಅವರ ʼಥುನಿವುʼ ಸಿನಿಮಾಗಳೂ ಕೂಡ ಸ್ಪರ್ಧೆಯಲ್ಲಿದ್ದರೂ ವೀರ ಸಿಂಹ ರೆಡ್ಡಿ ಒಳ್ಳೆಯ ಕಲೆಕ್ಷನ್‌ ಮಾಡಿಕೊಂಡಿದೆ.
ಇದನ್ನೂ ಓದಿ: Nandamuri Balakrishna | ಬಾಲಯ್ಯ ಅಭಿನಯದ ʻವೀರ ಸಿಂಹ ರೆಡ್ಡಿʼ ಸಿನಿಮಾ ಗಳಿಸಿದ್ದೆಷ್ಟು?
ಅಂದ ಹಾಗೆ ಈ ಸಿನಿಮಾದಲ್ಲಿ ಕನ್ನಡದ ನಟ ದುನಿಯಾ ವಿಜಯ್‌ ಕೂಡ ಕಾಣಿಸಿಕೊಂಡಿರುವುದು ವಿಶೇಷ. ನಂದಮುರಿ ಬಾಲಕೃಷ್ಣ ಅವರು ಮುಖ್ಯ ಪಾತ್ರದಲ್ಲಿ ನಟಿಸಿರುವ ಈ ಚಿತ್ರದಲ್ಲಿ ನಟ, ನಟಿಯರು ಪಡೆದಿರುವ ಸಂಭಾವನೆ ವಿವರ ಇಲ್ಲಿದೆ.
ಶೃತಿ ಹಾಸನ್‌
ನಟಿ ಶೃತಿ ಹಾಸನ್‌ ಈ ಸಿನಿಮಾದಲ್ಲಿ ʼಈಶಾʼ ಪಾತ್ರದಲ್ಲಿ ನಟಿಸಿದ್ದಾರೆ. ನಂದಮುರಿ ಬಾಲಕೃಷ್ಣ ಅವರಿಗೆ ಜೋಡಿಯಾಗಿ ನಟಿಸಿರುವ ಇವರು ಈ ಸಿನಿಮಾಕ್ಕಾಗಿ ಬರೋಬ್ಬರಿ 2.5 ಕೋಟಿ ರೂ. ಸಂಭಾವನೆ ಪಡೆದಿದ್ದಾರೆ.
ಲಾಲ್‌
ರಾಷ್ಟ್ರೀಯ ಪ್ರಶಸ್ತಿ ಪಡೆದಿರುವ ನಟ ಲಾಲ್‌ ಕೂಡ ಈ ಸಿನಿಮಾದ ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಸಿದ್ದಪ್ಪ ಹೆಸರಿನ ಪಾತ್ರದಲ್ಲಿ ನಟಿಸಿರುವ ಅವರು ಆ ಪಾತ್ರಕ್ಕಾಗಿ ಒಟ್ಟು 85 ಲಕ್ಷ ರೂ. ಸಂಭಾವನೆ ಪಡೆದಿದ್ದಾರೆ.
ವರಲಕ್ಷ್ಮಿ ಶರತ್‌ಕುಮಾರ್‌
ವರಲಕ್ಷ್ಮಿ ಅವರು ಈ ಸಿನಿಮಾದಲ್ಲಿ ವೀರ ಸಿಂಹ ರೆಡ್ಡಿ ಅವರ ಮಲತಂಗಿ, ಪ್ರತಾಪ್‌ ರೆಡ್ಡಿ ಅವರ ಪತ್ನಿ ಭಾನುಮತಿ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಪಾತ್ರಕ್ಕಾಗಿ ನಟಿ 45 ಲಕ್ಷ ರೂ. ಸಂಭಾವನೆಯನ್ನು ಪಡೆದಿದ್ದಾರೆ.
ಹನಿ ರೋಸ್‌
ಚಿತ್ರದಲ್ಲಿ ವೀರಸಿಂಹ ರೆಡ್ಡಿ ಅವರ ಪತ್ನಿಯಾಗಿ ನಟಿ ಹನಿ ರೋಸ್‌ ಬಣ್ಣ ಹಚ್ಚಿದ್ದಾರೆ. ಆ ಪಾತ್ರಕ್ಕಾಗಿ ನಟಿ ಒಟ್ಟು 1 ಕೋಟಿ ರೂ. ಅನ್ನು ಸಂಭಾವನೆ ರೂಪದಲ್ಲಿ ಸ್ವೀಕರಿಸಿದ್ದಾರೆ.
ದುನಿಯಾ ವಿಜಯ್‌
ಕನ್ನಡದ ನಟ ದುನಿಯಾ ವಿಜಯ್‌ ಅವರು ವೀರ ಸಿಂಹ ರೆಡ್ಡಿ ಸಿನಿಮಾದಲ್ಲಿ ಮುಖ್ಯ ವಿಲನ್‌ ಆಗಿ ಕಾಣಿಸಿಕೊಂಡಿದ್ದಾರೆ. ಮುಸಲಿ ಮಡುಗು ಪ್ರತಾಪ್‌ ರೆಡ್ಡಿ ಪಾತ್ರಕ್ಕೆ ಜೀವ ತುಂಬಿರುವ ದುನಿಯಾ ವಿಜಿ ಆ ಪಾತ್ರಕ್ಕಾಗಿ ಒಟ್ಟು 1 ಕೋಟಿ ರೂ. ಅನ್ನು ಸಂಭಾವನೆಯಾಗಿ ಸ್ವೀಕರಿಸಿದ್ದಾರೆ.
ನಂದಮುರಿ ಬಾಲಕೃಷ್ಣ
ಕೊನೆಯದಾಗಿ, ಸಿನಿಮಾದಲ್ಲಿ ಮುಖ್ಯ ಪಾತ್ರವಾಗಿರುವ ನಂದಮುರಿ ಬಾಲಕೃಷ್ಣ ಅವರು ತಮ್ಮ ಪಾತ್ರಕ್ಕಾಗಿ ನಿರ್ಮಾಪಕರಿಂದ 25 ಕೋಟಿ ರೂ. ಅನ್ನು ಸ್ವೀಕರಿಸಿದ್ದಾರೆ.