ಹೈದರಾಬಾದ್: ದಕ್ಷಿಣ ಭಾರತದ ಬಹುಬೇಡಿಕೆಯ ನಟಿ ಸಮಂತಾ ರುತ್‌ ಪ್ರಭು (Actress Samantha) ಅವರ ನಟನೆಯ ಶಾಕುಂತಲಂ ಸಿನಿಮಾ ಇಂದು ತೆರೆ ಕಂಡಿದೆ. ಈ ಸಿನಿಮಾಕ್ಕಾಗಿ ನಟಿ ಹಲವಾರು ವಾರಗಳಿಂದ ಭಾರೀ ಪ್ರಚಾರವನ್ನೂ ಮಾಡಿದ್ದರು. ಸಿನಿಮಾ ಯಶಸ್ಸು ಕಾಣಲಿ ಎಂದು ಹಲವು ಗಣ್ಯರು ನಟಿಗೆ ಹರಸಿದ್ದರು ಕೂಡ. ಅದರಂತೆಯೇ ನಟ ವಿಜಯ್‌ ದೇವರಕೊಂಡ ಕೂಡ ಸಮಂತಾಗೆ ಶುಭ ಹಾರೈಸಿದ್ದು, ನಟಿಯನ್ನು ಹೋರಾಟಗಾರ್ತಿ ಎಂದು ಕರೆದಿದ್ದಾರೆ.
ಹೌದು. ಸಿನಿಮಾ ಬಿಡುಗಡೆಗೂ ಮೊದಲು, ಅಂದರೆ ಗುರುವಾರದಂದು ವಿಜಯ್‌ ದೇವರಕೊಂಡ ಅವರು ಸಮಂತಾಗೋಸ್ಕರ ಟ್ವಿಟರ್‌ನಲ್ಲಿ ವಿಶೇಷ ಪೋಸ್ಟ್‌ ಒಂದನ್ನು ಹಂಚಿಕೊಂಡಿದ್ದರು. ಅದರಲ್ಲಿ ಅವರು, “ಸ್ಯಾಮಿ, ನೀವು ನಿಜಕ್ಕೂ ಪ್ರೀತಿಯಿಂದ ತುಂಬಿದ್ದೀರಿ. ಯಾವಾಗಲೂ ಸರಿಯನ್ನೇ ಮಾಡುವುದಕ್ಕೆ ಬಯಸುತ್ತೀರಿ ಹಾಗೂ ಹುರಿದುಂಬಿಸುತ್ತೀರಿ. ನಿಮ್ಮ ಪೂರ್ತಿ ವೃತ್ತಿ ಜೀವನವೇ ಅದರ ಮೇಲೆ ಅವಲಂಬಿವಾಗಿದೆ ಎನ್ನುವಂತೆ ಪ್ರತಿ ಶಾಟ್‌ಗೂ ಸಾಕಷ್ಟು ಶ್ರಮ ಹಾಕುತ್ತೀರಿ. ನಿಜಕ್ಕೂ ನೀವೊಬ್ಬರು ಹೋರಾಟಗಾರ್ತಿ. ಯಾವಾಗಲೂ ನಿಮ್ಮ ಚಿತ್ರತಂಡ, ಅಭಿಮಾನಿಗಳಿಗೆ ಉತ್ತಮವಾದುದನ್ನೇ ನೀಡುವುದಕ್ಕೆ ಯತ್ನಿಸುತ್ತೀರಿ. ನಾಳೆ ಬಿಡುಗಡೆಯಾಗುತ್ತಿರುವ ನಿಮ್ಮ ಶಾಕುಂತಲಂ ಸಿನಿಮಾಗೆ ಶುಭವಾಗಲಿ” ಎಂದು ಬರೆದಿದ್ದಾರೆ.
ವಿಜಯ್‌ ಈ ಟ್ವೀಟ್‌ ಅನ್ನು ಮಾಡುತ್ತಿದ್ದಂತೆಯೇ ಅದನ್ನು ರಿಟ್ವೀಟ್‌ ಮಾಡಿರುವ ನಟಿ ಸಮಂತಾ, “ಈ ಬಗ್ಗೆ ಪ್ರತಿಕ್ರಿಯಿಸುವುದಕ್ಕೆ ಮಾತುಗಳೇ ಇಲ್ಲ. ನಿಜವಾಗಿಯೂ ಇದರ ಅಗತ್ಯತೆ ಇತ್ತು. ಧನ್ಯವಾದಗಳು ಹೀರೋ” ಎಂದು ಬರೆದಿದ್ದಾರೆ.
ಇದನ್ನೂ ಓದಿ: Actress Samantha : ಪುಷ್ಪಾ 2 ಸಿನಿಮಾದಲ್ಲಿ ಹೆಜ್ಜೆ ಹಾಕ್ತಾರಾ ಸಮಂತಾ? ಅವರೇ ಕೊಟ್ಟ ಉತ್ತರವಿದು
ಸಮಂತಾ ಮತ್ತು ವಿಜಯ್‌ ದೇವರಕೊಂಡ ಅವರ ಕುಶಿ ಚಿತ್ರದಲ್ಲಿ ಒಟ್ಟಾಗಿ ನಟಿಸುತ್ತಿದ್ದಾರೆ. ಇದು ರೊಮ್ಯಾಂಟಿಕ್‌ ಕಾಮಿಡಿ ಚಿತ್ರವಾಗಿರಲಿದೆ. ಇದಕ್ಕೂ ಮೊದಲು ಈ ಜೋಡಿ ಮಹಾನಟಿ ಸಿನಿಮಾದಲ್ಲಿ ಒಟ್ಟಾಗಿ ಕಾಣಿಸಿಕೊಂಡಿದ್ದರು. ಆ ಸಿನಿಮಾದಲ್ಲಿ ದುಲ್ಕರ್‌ ಸಲ್ಮಾನ್‌ ಮತ್ತು ಕೀರ್ತಿ ಸುರೇಶ್‌ ಕೂಡ ಬಣ್ಣ ಹಚ್ಚಿದ್ದರು. ಸಮಂತಾ ಮತ್ತು ವಿಜಯ್‌ ಜೋಡಿಯಾಗಿ ನಟಿಸುತ್ತಿರುವ ಕುಶಿ ಸಿನಿಮಾ ಸೆಪ್ಟೆಂಬರ್‌ 1ರಂದು ಬಿಡುಗಡೆಯಾಗಲಿದೆ.