ಬೆಂಗಳೂರು: ಹಿರಿಯ ನಟಿ ಲೀಲಾವತಿ ಅವರ ಪುತ್ರ, ನಟ ವಿನೋದ್ ರಾಜ್ (Vinod Raj) ಅವರು ಇತ್ತೀಚಿನ ದಿನಗಳಲ್ಲಿ ಹಲವು ವಿಚಾರಗಳಿಂದಾಗಿ ಸುದ್ದಿಯಲ್ಲಿದ್ದಾರೆ. ಇದೀಗ ಅದೇ ವಿನೋದ್ ರಾಜ್ ತಮಟೆಯ ಸದ್ದಿಗೆ ಮೈ ಚಳಿ ಬಿಟ್ಟು ಹೆಜ್ಜೆ ಹಾಕಿದ್ದು, ಅವರ ನೃತ್ಯದ ವಿಡಿಯೊ ಸಾಮಾಜಿಕ ಜಾಲತಾಣಗಳ ತುಂಬೆಲ್ಲ ಹರಿದಾಡುತ್ತಿದೆ.
ಹೌದು. ವಿನೋದ್ ರಾಜ್ ಅವರು ತಮಟೆಯ ಸದ್ದಿಗೆ ಕುಣಿದಿದ್ದಾರೆ. ಅದೂ ಯುವಕರೇ ನಾಚುವಂತೆ ಸಾಕಷ್ಟು ಎನರ್ಜಿ ಹಾಕಿ ನೃತ್ಯ ಮಾಡಿದ್ದಾರೆ. ಹಾಫ್‌ ಶರ್ಟ್‌ ಹಾಗೂ ಅದಕ್ಕೆ ಸರಿಹೊಂದುವಂತಹ ಲುಂಗಿ ತೊಟ್ಟ ಅವರು ಕುಣಿಯುತ್ತಿರುವ ವಿಡಿಯೊ ವೈರಲ್‌ ಆಗಿದೆ. ಯಾವುದೋ ದೇವರ ಉತ್ಸವದ ಮೆರವಣಿಗೆ ಸಾಗುತ್ತಿದ್ದು, ಅದರೊಂದಿಗೆ ಹೊರಟಿದ್ದ ತಮಟೆಯವರ ಸದ್ದಿಗೆ ವಿನೋದ್ ಕುಣಿದಿದ್ದಾರೆ ಎನ್ನುವುದು ವಿಡಿಯೊದಿಂದ ತಿಳಿದುಬಂದಿದೆ. ವಿಡಿಯೊದ ಕೊನೆಯಲ್ಲಿ ವಿನೋದ್ ಅವರು ಅಲ್ಲೇ ನಿಂತಿದ್ದ ತಮ್ಮ ಕಾರನ್ನು ಹತ್ತುವುದಕ್ಕೆ ಸಜ್ಜಾಗುವುದನ್ನು ಕಾಣಬಹುದು.
ವಿನೋದ್ ರಾಜ್ ಅವರು ಡ್ಯಾನ್ಸ್ ವಿಚಾರದಲ್ಲಿ ಎಂದಿಗೂ ಒಂದು ಕೈ ಮುಂದೇ. ಅವರ ಡ್ಯಾನ್ಸ್ ರಾಜ ಡ್ಯಾನ್ಸ್ ಸಿನಿಮಾದಲ್ಲಿ “ಡ್ಯಾನ್ಸ್ ಡ್ಯಾನ್ಸ್ ರಾಜ ಡ್ಯಾನ್ಸ್, ನೀವೆ ನನ್ನ ತಾಯಿ ತಂದೆ” ಹಾಡಿಗೆ ವಿನೋದ್ ಮಾಡಿದ ನೃತ್ಯ ಎಂದಿಗೂ ಮರೆಯುವಂತದ್ದಲ್ಲ. ಇದೀಗ ವಿನೋದ್ ಹಾಕಿರುವ ಹೆಜ್ಜೆ ನೋಡಿರುವ ಅಭಿಮಾನಿಗಳು ಮತ್ತೊಮ್ಮೆ ಡ್ಯಾನ್ಸ್ ರಾಜ ಡ್ಯಾನ್ಸ್ ಸಿನಿಮಾದ ನೃತ್ಯ ನೋಡಿದಂತಾಗುತ್ತಿದೆ ಎಂದು ಕಾಮೆಂಟ್‌ಗಳನ್ನು ಮಾಡಲಾರಂಭಿಸಿದ್ದಾರೆ.
ವಿನೋದ್ ರಾಜ್ ಮತ್ತು ಲೀಲಾವತಿ ಅವರು ಇತ್ತೀಚೆಗೆ ಹಲವು ವಿಚಾರಗಳಿಂದ ಸುದ್ದಿಯಲ್ಲಿದ್ದಾರೆ. ವಿನೋದ್ ರಾಜ್ ಅವರಿಗೆ ಮದುವೆಯಾಗಿ ಒಬ್ಬ ಮಗನಿದ್ದಾನೆ, ಆತ ಇಂಜಿನಿಯರಿಂಗ್‌ ವಿದ್ಯಾಭ್ಯಾಸ ಮಾಡುತ್ತಿದ್ದಾನೆ ಎನ್ನುವ ವಿಚಾರ ಇತ್ತೀಚೆಗೆ ಎಲ್ಲೆಡೆ ಹರಿದಾಡಿದೆ. ಹಾಗೆಯೇ ಲೀಲಾವತಿ ಅವರ ಪತಿ ವಿಚಾರದಲ್ಲೂ ಸಾಕಷ್ಟು ಚರ್ಚೆ ಚಾಲ್ತಿಯಲ್ಲಿದೆ.