ಬೆಂಗಳೂರು: ವಿನೋದ್ ರಾಜ್ (Vinod Raj) ಅವರಿಗೆ ಈಗಾಗಲೇ ಮದುವೆಯಾಗಿದೆ ಮತ್ತು ಒಬ್ಬ ಮಗನೂ ಇದ್ದಾನೆ ಎಂದು ನಿರ್ದೇಶಕ ಪ್ರಕಾಶ್ ರಾಜ್ ವಿಸ್ತಾರ ನ್ಯೂಸ್‌ನೊಂದಿಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ಅಲ್ಲದೆ, ಡಾ. ರಾಜಕುಮಾರ್ ಅವರ ಮೇಲೆ ಇರುವ ಆಪಾದನೆ ಸಹ ಸುಳ್ಳು ಎಂದು ಹೇಳಿದ್ದಾರೆ. ಲೀಲಾವತಿ ಕುಟುಂಬದ ಜತೆ ನನ್ನ ಒಡನಾಟ ಇಲ್ಲ. ದೊಡ್ಮನೆ ಅಭಿಮಾನಿಯಾಗಿ ರಾಜಕುಮಾರ್ ಅವರ ಮೇಲೆ ಇರುವ ಆಪಾದನೆ ಸುಳ್ಳು ಎಂದು ಹೇಳಲು ನಾನು ಮುಂದೆ ಬಂದಿದ್ದೇನೆ. ರಾಜಕುಮಾರ್ ಅವರು ಲೀಲಾವತಿ ಅವರಿಗೆ ಮೋಸ ಮಾಡಿದ್ದಾರೆಂಬ ಆಪಾದನೆ ಇರುವ ಕಾರಣ ಈ ವಿಚಾರವನ್ನು ಬಹಿರಂಗ ಪಡಿಸುತ್ತಿರುವುದಾಗಿ ಹೇಳಿಕೊಂಡಿದ್ದಾರೆ.
ನಿರ್ದೇಶಕ ಪ್ರಕಾಶ್ ರಾಜ್ ಮೆಹು ವಿಸ್ತಾರ ನ್ಯೂಸ್‌ನೊಂದಿಗೆ ಹೇಳಿದ್ದೇನು?
ಸಾಹಿತಿ, ಚಲನಚಿತ್ರ ನಿರ್ದೇಶಕ -ಪ್ರಕಾಶ್ ರಾಜ್ ಮೆಹೊ ಮಾತನಾಡಿ ʻʻವರನಟ ರಾಜಕುಮಾರ್ ಅವರ ಮೇಲೆ ಆಪಾದನೆ ಇರುವ ಕಾರಣ ನಾನು ಈ ಬಗ್ಗೆ ಮಾತನಾಡುತ್ತಿದ್ದೇನೆ. ರಾಜಕುಮಾರ್ ಅವರು ಮೋಸ ಮಾಡಿದ್ದಾರೆ ಎಂಬ ಆರೋಪ ಲೀಲಾವತಿ ಮಾಡಿದ್ದರು. ರವಿ ಬೆಳಗೆರೆ ಅವರಿಗೆ ಹೇಳಿ ʻರಾಜ್ ಲೀಲಾ ವಿನೋದʼ ಎಂಬ ಪುಸ್ತಕ ಬರೆಸಿದರು. ನಾನು ರಾಜಕುಮಾರ್ ಅವರಿಗೆ ಈ ವಿಚಾರ ಕೇಳಿದಾಗ ಲೀಲಾವತಿ ಅವರು ಮಹಲಿಂಗ ಭಾಗವತರ್ ಅವರನ್ನು ಮದುವೆ ಆಗಿದ್ದರು ಎಂಬ ಸುದ್ದಿ ನನಗೆ ಹೇಳಿದರು. ವಿನೋದ್ ರಾಜ್ ಮದುವೆ ಆಗಿ ಹೆಂಡತಿ, ಮಗನನ್ನು ಚೆನ್ನೈನಲ್ಲಿ ಇರಿಸಿದ್ದಾರೆʼʼ ಎಂದರು.
ವಿನೋದ್ ರಾಜ್ ಕುಟುಂಬದ ಫೋಟೊ ವೈರಲ್
ಪ್ರಕಾಶ್ ರಾಜ್ ಮೆಹು ಮಾತು ಮುಂದುವರಿಸಿ ʻʻಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿರುವ ಫೋಟೊ ವಿನೋದ್ ರಾಜ್ ಕುಟುಂಬದವರದ್ದು. ವಿನೋದ್ ರಾಜ್ ಹೆಂಡತಿ ಅನು, ಮಗ ಯುವರಾಜ್. ಯುವರಾಜ್ ಚೆನ್ನೈನಲ್ಲಿ ಇಂಜಿನಿಯರಿಂಗ್ ವಿದ್ಯಾಭ್ಯಾಸ ಮಾಡುತ್ತಿದ್ದಾರೆ. 6 ತಿಂಗಳ ಹಿಂದೆ ವಿನೋದ್ ಅವರ ಕುಟುಂಬದ ಫೋಟೊ ನನಗೆ ಬಂದಿತ್ತು. ನನ್ನ ಆಪ್ತರು ಏಪ್ರಿಲ್‌ 7ರಂದು ಯುವರಾಜ್ ಮಾರ್ಕ್ಸ್ ಕಾರ್ಡ್, ಆಸ್ತಿಯಲ್ಲಿ ನಮೂದನೆ ಆಗಿರುವ ಫೋಟೊ ಕಳುಹಿಸಿದ್ದರು. ಬಹಿರಂಗವಾಗಿ ಯಾಕೆ ವಿನೋದ್ ರಾಜ್ ಮದುವೆ ವಿಚಾರ ಹೇಳಿಕೊಂಡಿಲ್ಲ? ಅವರ ಮನೆ ಕೆಲಸದವರನ್ನೇ ಮದುವೆ ಆಗಿದ್ದಾರಂತೆ. ಇದನ್ನು ಹೇಳಿಕೊಂಡರೆ ಇನ್ನೂ ಒಳ್ಳೇ ವಿಚಾರ ಆಗುತ್ತಿತ್ತು. ಪ್ರಚಾರಕ್ಕಾಗಿ ವಿನೋದ್ ರಾಜ್ ಕುಟುಂಬದ ಬಗ್ಗೆ ಹೇಳಿಕೆ ನೀಡಿಲ್ಲ ಎಂದು ಹೇಳಿದ್ದಾರೆ.
ದೊಡ್ಮನೆ ಅಭಿಮಾನಿಯಾಗಿ ರಾಜಕುಮಾರ್ ಅವರ ಮೇಲೆ ಇರುವ ಆಪಾದನೆ ಸುಳ್ಳು ಎಂದು ಹೇಳಲು ನಾನು ಮುಂದೆ ಬಂದಿದ್ದೇನೆ. ಲೀಲಾವತಿ ಕುಟುಂಬದ ಜತೆ ನನ್ನ ಒಡನಾಟ ಇಲ್ಲ. 20 ವರ್ಷಗಳ ಹಿಂದೆ ಲೀಲಾವತಿ ಹಾಗೂ ರಾಜಕುಮಾರ್ ಅವರ ಸಂಬಂಧ ಬಗ್ಗೆ ವದಂತಿಗಳು ಹಬ್ಬಿದವು. ವಿನೋದ್ ರಾಜ್ ಮಹಾಲಿಂಗ ಅವರ ಪುತ್ರʼʼ ಎಂದು ಪ್ರಕಾಶ್ ರಾಜ್ ಮೆಹು ಹೇಳಿಕೆ ನೀಡಿದ್ದಾರೆ.
ಡಾ. ರಾಜಕುಮಾರ್ ಅವರೇ ನನಗೆ ಈ ವಿಷಯ ಹೇಳಿದ್ದು ಎಂದ ಪ್ರಕಾಶ್ ರಾಜ್ ಮೆಹು
ಲೀಲಾವತಿ ಅವರ ಆರೋಗ್ಯ ಹದಗೆಡುತ್ತಿದ್ದು, ಮಗ ವಿನೋದ್ ರಾಜ್ ಅವರ ಆರೈಕೆಯಲ್ಲಿ ಇದ್ದಾರೆ. ಇದುವರೆಗೂ ವಿನೋದ್ ರಾಜ್ ಅವರು ತಮ್ಮ ವೈಯಕ್ತಿಕ ವಿಚಾರಗಳನ್ನು ಎಲ್ಲಿಯೂ ಬಹಿರಂಗಪಡಿಸಿಲ್ಲ.
ಇದನ್ನೂ ಓದಿ: Vinod Raj: ವಿನೋದ್ ರಾಜ್‌ಗೆ ಮದುವೆಯಾಗಿದೆಯಾ? ಪತ್ನಿ, ಮಗನ ಫೋಟೊ ವೈರಲ್, ಸ್ಫೋಟಕ ಮಾಹಿತಿ ಬಿಚ್ಚಿಟ್ಟ ನಿರ್ದೇಶಕ!
ನಿರ್ದೇಶಕ ಪ್ರಕಾಶ್ ರಾಜ್ ಮೆಹು ಪೋಸ್ಟ್‌ನಲ್ಲಿ ಏನಿದೆ?
ಸ್ಫೋಟಕ ಮಾಹಿತಿ
ಇದುವರೆಗಿನ ವಿವಾದಕ್ಕೆ ಎಷ್ಟೇ ಸ್ಪಷ್ಟನೆ ಕೊಟ್ಟರೂ ಕೆಲವರು ಒಪ್ಪುತ್ತಿರಲಿಲ್ಲ ಅಂತವರಿಗೆ ಇದು ಸತ್ಯ ಸಾಕ್ಷಿ!
ಮೊದಲನೆಯ ವಿಷಯ: ಲೀಲಾವತಿಯವರ ಗಂಡ ಮಹಾಲಿಂಗ ಭಾಗವತರ್ ಅನ್ನುವುದು. ಇದು ಈ ಕೆಳಗೆ ಕೊಟ್ಟಿರುವ ಲೀಲಾವತಿಯವರ ಚೆನ್ನೈ ಆಸ್ತಿಯ ಪತ್ರ ತಮಿಳು ಭಾಷೆಯಲ್ಲಿದೆ. ಅದರಲ್ಲಿ ಮಹಾಲಿಂಗ ಭಾಗವತರ್ ಅವರ ಪತ್ನಿ ಲೀಲಾವತಿ ಅಮ್ಮಾಳ್ (ಲೀಲಾವತಿಯಮ್ಮ) ಅನ್ನುವುದು ಸ್ಪಷ್ಟವಾಗಿದೆ!!
ಎರಡನೆಯ ವಿಷಯ: ವಿನೋದ್ ರಾಜ್ ಮದುವೆಯನ್ನೇ ಆಗದೆ ತಾಯಿಯ ಸೇವೆಯಲ್ಲಿ ನಿರತರಾಗಿದ್ದಾರೆ ಅನ್ನುವವರಿಗೆ ಮಾಹಿತಿ. ಈ ಕೆಳಗಿನ ಫೋಟೊದಲ್ಲಿ ಸೋಫಾ ಮೇಲೆ ಕುಳಿತಿರುವವರು ವಿನೋದ್ ರಾಜ್ ಹೆಂಡತಿ ಮತ್ತು ಮಗ. ಅವರು ಚೆನ್ನೈನಲ್ಲಿದ್ದು, ಮಗ ಇಂಜಿನಿಯರಿಂಗ್ ಓದುತ್ತಿದ್ದಾನೆ!!!
ಈ ಫ್ಯಾಮಿಲಿ ಫೋಟೊ ನನಗೆ ಸಿಕ್ಕಿ ಆರು ತಿಂಗಳ ಮೇಲಾಯ್ತು, ಆಗೇನಾದರೂ ಈ ಫೋಟೋ ಪ್ರಕಟಿಸಿದ್ದರೆ ಖಂಡಿತಾ “ಅವರು ಯಾರೋ ಅಭಿಮಾನಿಗಳು” ಅಂದು ಬಿಡುತ್ತಿದ್ದರು ಅದಕ್ಕಾಗಿ ಸೂಕ್ತ ದಾಖಲೆಗಾಗಿ ಕಾಯುತ್ತಿದ್ದೆ ಇಂದು ಗೆಳೆಯರೊಬ್ಬರು ಚೆನ್ನೈನಿಂದ ಈ Marks Card ಮತ್ತು ಆಸ್ತಿ ದಾಖಲೆ ಪತ್ರ ಕಳುಹಿಸಿ ಕೊಟ್ಟರು. ಆದ್ದರಿಂದ ಇಂದು ಇವನ್ನು ಬಹಿರಂಗಪಡಿಸಿದ್ದೇನೆ ಎಂದು ಬರೆದುಕೊಂಡಿದ್ದಾರೆ.
ಆದರೆ, ಈ ಬಗ್ಗೆ ವಿನೋದ್ ರಾಜ್ ಯಾವುದೇ ಮಾಹಿತಿಯನ್ನು ಹಂಚಿಕೊಂಡಿಲ್ಲ. ಸದ್ಯ ಲೀಲಾವತಿಯವರ ಆರೈಕೆಯಲ್ಲಿರುವ ವಿನೋದ್, ನೆಲಮಂಗಲದ ಬಳಿಯ ಅವರ ತೋಟದ ಮನೆಯಲ್ಲಿಯೇ ವೈದ್ಯರ ಸಲಹೆ ಮೇರೆಗೆ ನಟಿ ಲೀಲಾವತಿ ಅವರಿಗೆ ಚಿಕಿತ್ಸೆಯನ್ನು ನೀಡಲಾಗುತ್ತಿದೆ.