ಮುಂಬೈ: ಆಮೀರ್‌ ಖಾನ್‌ ನಟನೆಯ 3 ಈಡಿಯಟ್ಸ್ ಸಿನಿಮಾ ಭಾರತದಲ್ಲಿ ಅತ್ಯಂತ ಯಶಸ್ಸು ಕಂಡ ಸಿನಿಮಾಗಳಲ್ಲಿ ಒಂದು. ಕಾಲೇಜ್‌ ಹುಡುಗರ ಜೀವನವನ್ನೇ ಇಟ್ಟುಕೊಂಡು ಮಾಡಿದ್ದ ಆ ಸಿನಿಮಾ ಇಂದಿಗೂ ಅನೇಕರ ಫೇವರಿಟ್‌ ಸಿನಿಮಾಗಳಲ್ಲಿ ಒಂದು. ಹೀಗಿರುವಾಗ ಸಿನಿಮಾದ ಎರಡನೇ ಭಾಗದ (3 Idiots 2) ಬಗ್ಗೆಯೂ ಚರ್ಚೆ ಆರಂಭವಾಗಿದೆ. ಅದರ ಬಗ್ಗೆ ಸಿನಿಮಾದಲ್ಲಿ ರಾಜು ಪಾತ್ರದಲ್ಲಿ ಮಿಂಚಿದ್ದ ಶರ್ಮಾನ್‌ ಜೋಶಿ ಅವರು ಮಾತನಾಡಿದ್ದಾರೆ ಕೂಡ.
ಶರ್ಮಾನ್‌ ಜೋಶಿ ಅವರು 3 ಈಡಿಯಟ್ಸ್ 2 ಸಿನಿಮಾದ ಬಗ್ಗೆ ಮಾತನಾಡಿದ್ದು, ಸಿನಿಮಾದ ನಿರ್ದೇಶಕರಾದ ರಾಜ್‌ಕುಮಾರ್‌ ಹಿರಾನಿ ಅವರು ಸಿನಿಮಾದ ಎರಡನೇ ಭಾಗವನ್ನು ಮಾಡಲು ಉತ್ಸುಕರಾಗಿದ್ದಾರೆ ಎಂದು ತಿಳಿಸಿದ್ದಾರೆ. “ರಾಜ್‌ ಸರ್‌ಗೆ ಜನರ ಪ್ರೀತಿಯ ಬಗ್ಗೆ ಅರಿವಿದೆ. ಅವರು ವೀಕ್ಷಕರಿಗೆ ನಿರಾಸೆಯಾಗುವಂತೆ ಮಾಡುವುದಿಲ್ಲ. ಈ ಸಿನಿಮಾದ ಎರಡನೇ ಭಾಗ ಮಾಡಲು ಹಲವಾರು ಐಡಿಯಾಗಳ ಬಗ್ಗೆ ಅವರು ನನ್ನೊಂದಿಗೆ ಮಾತನಾಡಿದ್ದಾರೆ. ಆದರೆ ಅದಾಗಿ ಕೆಲವು ತಿಂಗಳು ಬಿಟ್ಟು ಕೇಳಿದರೆ ಆ ಐಡಿಯಾ ವರ್ಕ್‌ ಔಟ್‌ ಆಗುತ್ತಿಲ್ಲ ಎನ್ನುತ್ತಾರೆ. ಆದರೆ ಅವರು ಈ ಸಿನಿಮಾ ಮಾಡುವ ಬಗ್ಗೆ ಹೆಚ್ಚು ಉತ್ಸುಕರಾಗಿರುವುದಂತೂ ಹೌದು. ಸಿನಿಮಾ ಮಾಡಲು ನಮಗೂ ತುಂಬಾ ಖುಷಿಯಿದೆ. ಜನರು ಕೂಡ ಅಷ್ಟೇ ಖುಷಿಯಿಂದ ಸಿನಿಮಾ ನೋಡುತ್ತಾರೆ ಎಂದು ನಮಗೆ ತಿಳಿದಿದೆ” ಎಂದಿದ್ದಾರೆ.
ಇದನ್ನೂ ಓದಿ: Viral Video : ಬುಲೆಟ್‌ ಬೈಕಲ್ಲಿ ರಿವಾಲ್ವರ್ ಹಿಡಿದು ಯುವಕರ ಶೋಕಿ, ಇಬ್ಬರು ಪುಂಡರ ಅರೆಸ್ಟ್‌
ಅಂದ ಹಾಗೆ ಈ ಸಿನಿಮಾದ ಎರಡನೇ ಭಾಗದ ಬಗ್ಗೆ ಮಾರ್ಚ್‌ ತಿಂಗಳಲ್ಲಿ ಕೂಡ ಸುದ್ದಿಯಾಗಿತ್ತು. ಜಾಹಿರಾತು ಒಂದರ ಸಲುವಾಗಿ ಆಮೀರ್‌ ಖಾನ್‌, ಆರ್‌ ಮಾಧವನ್‌ ಮತ್ತು ಶರ್ಮಾನ್‌ ಜೋಶಿ ಅವರು ಒಟ್ಟಾಗಿದ್ದರು. ಆದರೆ ಆ ಭೇಟಿ ಸಿನಿಮಾ ಬಗ್ಗೆ ಮಾತುಕತೆಗಿದ್ದಿರಬಹುದು ಎಂದು ಸುದ್ದಿಗಳು ಹರಿದಾಡಿದ್ದವು. ಈ ಬಗ್ಗೆ ನಟಿ ಕರೀನಾ ಕಪೂರ್‌ ಕೂಡ ವಿಡಿಯೊ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದರು. “ನನ್ನ ಬಿಟ್ಟು ಇವರು ಮೂರೇ ಜನರು ಸಿನಿಮಾದ ಎರಡನೇ ಭಾಗಕ್ಕೆ ಸಿದ್ಧರಾಗಿಬಿಟ್ಟರಾ? ಹಾಗೆ ಮಾಡವುದಕ್ಕೆ ಸಾಧ್ಯವೇ ಇಲ್ಲ” ಎಂದು ಹಾಸ್ಯಮಯವಾಗಿ ವಿಡಿಯೊದಲ್ಲಿ ಹೇಳಿದ್ದರು.
3 ಈಡಿಯಟ್ಸ್ ಸಿನಿಮಾ 2009ರ ಡಿಸೆಂಬರ್‌ನಲ್ಲಿ ಬಿಡುಗಡೆಯಾಯಿತು. ಆಮೀರ್‌ ಖಾನ್‌, ಶರ್ಮಾನ್‌ ಜೋಶಿ, ಆರ್‌ ಮಾಧವನ್‌, ಕರೀನಾ ಕಪೂರ್‌, ಬೋಮನ್‌ ಇರಾನಿ ಮತ್ತು ಮೋನಾ ಸಿಂಗ್‌ ನಟಿಸಿದ್ದ ಈ ಸಿನಿಮಾ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿತ್ತು. ಸಿನಿಮಾ ವಿಶ್ವಾದ್ಯಂತ 400 ಕೋಟಿ ರೂ ಗಳಿಕೆ ಮಾಡಿಕೊಂಡಿತ್ತು.