ಮುಂಬೈ: 2023ರ ಕೊನೆಯ ಭಾಗಕ್ಕೆ ಬಂದು ನಿಂತಿದ್ದೇವೆ. ಇನ್ನೇನು ಕೆಲವೇ ದಿನಗಳಲ್ಲಿ ಇಡಿ ಜಗತ್ತೇ ಹೊಸ ವರ್ಷವನ್ನು ಬರಮಾಡಿಕೊಳ್ಳಲಿದೆ. ಇದೀಗ ಸರ್ಚ್‌ ಎಂಜಿನ್‌ ಗೂಗಲ್‌ ಈ ವರ್ಷ ಭಾರತದಲ್ಲಿ ಅತೀ ಹೆಚ್ಚು ಸರ್ಚ್‌ ಆದ ಟಿವಿ ಶೋಗಳ (10 most searched shows) ಪಟ್ಟಿ ಬಿಡುಗಡೆ ಮಾಡಿದೆ (Year Ender 2023).
‘ಫರ್ಜಿ’ (Farzi)
‘ಫರ್ಜಿ’ ಹಿಂದಿ ವೆಬ್‌ ಸೀರಿಸ್‌ ಮೊದಲ ಸ್ಥಾನದಲ್ಲಿದೆ. ಬಾಲಿವುಡ್‌ ನಟ ಮೊದಲ ಬಾರಿಗೆ ಕಾಣಿಕೊಂಡ ವೆವ್‌ ಸೀರಿಸ್‌ ಇದು. ರಾಜ್ & ಡಿಕೆ ನಿರ್ದೇಶನದ ಈ ಶೋದಲ್ಲಿ ದಕ್ಷಿಣ ಭಾರತದ ವಿಜಯ್ ಸೇತುಪತಿ, ಕೆಕೆ ಮೆನನ್‌, ರಾಶಿ ಖನ್ನಾ ಮತ್ತಿತರರು ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಪ್ರೈಮ್‌ ವಿಡಿಯೊದಲ್ಲಿ ಪ್ರಸಾರವಾಗುತ್ತಿದೆ.
‘ವೆಡ್ನೆಸ್‌ ಡೇ’ (Wednesday)
ಅಮೆರಿಕ ಮೂಲದ ಈ ಹಾರರ್‌ ಕಾಮಿಡಿ ಶೋ ನೆಟ್‌ಫ್ಲಿಕ್ಸ್‌ನಲ್ಲಿ ಪ್ರಸಾರವಾಗುತ್ತಿದೆ. ಚಾರ್ಲ್ಸ್ ಆಡಮ್ಸ್ ಅವರ ವೆಡ್ನೆಸ್‌ ಡೇ ಆಡಮ್ಸ್ ಪಾತ್ರವನ್ನು ಆಧರಿಸಿ ಈ ಟಿವಿ ಸೀರಿಸ್‌ ತಯಾರಿಸಲಾಗಿದೆ. ಜೆನ್ನಾ ಒರ್ಟೆಗಾ ಮುಖ್ಯ ಪಾತ್ರದಲ್ಲಿ ನಟಿಸಿದ್ದು, ಗ್ವೆಂಡೋಲಿನ್ ಕ್ರಿಸ್ಟಿ, ರಿಕಿ ಲಿಂಡ್ಹೋಮ್, ಜೇಮಿ ಮೆಕ್ಶೇನ್, ಹಂಟರ್ ಡೂಹಾನ್, ಪರ್ಸಿ ಹೈನ್ಸ್ ವೈಟ್, ಎಮ್ಮಾ ಮೈಯರ್ಸ್, ಜಾಯ್ ಸಂಡೇ, ಜಾರ್ಜಿ ಫಾರ್ಮರ್, ನವೋಮಿ ಜೆ. ಒಗಾವಾ ಮತ್ತಿತರರು ಪೋಷಕ ಪಾತ್ರದಲ್ಲಿ ಅಭಿನಯಿಸಿದ್ದಾರೆ. ಇದು ಎರಡನೇ ಸ್ಥಾನ ಪಡೆದುಕೊಂಡಿದೆ.
‘ಅಸುರ್‌ 2’ (Asur 2)
ಜಿಯೋ ಸಿನಿಮಾದಲ್ಲಿ ಪ್ರಸಾರವಾಗುತ್ತಿರುವ ಈ ಹಿಂದಿ ವೆವ್‌ ಸೀರಿಸ್‌ನಲ್ಲಿ ಅರ್ಷದ್‌ ವಾರ್ಸ್‌, ಬರುನ್ ಸೋಬ್ತಿ, ಅನುಪ್ರಿಯಾ ಗೊಯೆಂಕಾ, ರಿದ್ಧಿ ದೊಗ್ರಾ ಮತ್ತಿತರರು ನಟಿಸಿದ್ದಾರೆ. ಥ್ರಿಲ್ಲರ್‌ ಶೈಲಿಯ ಈ ಶೋಗೆ ಒನಿ ಸೇನ್‌ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಇದು ಮೂರನೇ ಸ್ಥಾನದಲ್ಲಿದೆ.
ʼರಾಣಾ ನಾಯ್ಡುʼ (Rana Naidu)
ʼರಾಣಾ ನಾಯ್ಡುʼ 4ನೇ ಪ್ಲೇಸ್‌ನಲ್ಲಿದೆ. ಸುಪರ್ನ್‌ ವರ್ಮ ಮತ್ತು ಕರಣ್‌ ಅನ್ಶುಮಾನ್‌ ನಿರ್ದೇಶನದ ಈ ಹಿಂದಿ ಟಿವಿ ಸೀರಿಸ್‌ನಲ್ಲಿ ರಾಣಾ ದಗ್ಗುಬಾಟಿ ಮತ್ತು ವೆಂಕಟೇಶ್ ಅಭಿನಯಿಸಿದ್ದಾರೆ. ನೆಟ್‌ಫ್ಲಿಕ್ಸ್‌ನಲ್ಲಿ ಪ್ರಸಾರವಾಗುತ್ತಿರುವ ಈ ಸೀರಿಸ್‌ನ ಎರಡನೇ ಸೀಸನ್ ಶೀಘ್ರ ಆರಂಭವಾಗಲಿದೆ.
‘ದಿ ಲಾಸ್ಟ್‌ ಆಫ್‌ ಅಸ್‌’ (The Last of Us)
ಅಮೇರಿಕನ್ ಟಿವಿ ಸೀರಿಸ್‌ ಇದು. ವಿಡಿಯೊ ಗೇಮ್‌ ಆಧರಿಸಿ ಈ ಸೀರಿಸ್‌ ಅನ್ನು ರಚಿಸಲಾಗಿದೆ. ಪೆಡ್ರೊ ಪಾಸ್ಕಲ್,
ಬೆಲ್ಲಾ ರಾಮ್ಸೆ ಮತ್ತಿತರರು ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಈ ಥ್ರಿಲ್ಲರ್‌ ಭಾರತದಲ್ಲಿ ಬಹು ಜನಪ್ರಿಯವಾಗಿದೆ. ಅತೀ ಹೆಚ್ಚು ಹುಡುಕಲ್ಪಟ್ಟ 5ನೇ ಟಿವಿ ಶೋ ಆಗಿ ಹೊರಹೊಮ್ಮಿದೆ.
‘ಸ್ಕ್ಯಾಮ್‌ 2003’ (Scam 2003)
ಸೋನಿ ಲೈವ್‌ನಲ್ಲಿ ಸ್ಟ್ರೀಮಿಂಗ್‌ ಆಗುತ್ತಿರುವ ಸ್ಕ್ಯಾಮ್‌ 2003 ತುಷಾರ್‌ ಹೀರನಂದಾನಿ ನಿರ್ದೇಶಿಸಿದ್ದಾರೆ. ಗಗನ್‌ ದೇವ್‌ ರಾಯರ್‌, ಹೇಮಂಗ್‌ ವ್ಯಾಸ್‌, ಮುಕೇಶ್‌ ತಿವಾರಿ, ಭರತ್‌ ಜಾಧವ್‌ ಮತ್ತಿತರರು ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಸ್ಟ್ಯಾಂಪ್‌ ಪೇಪರ್‌ ಹಗರದ ಮುಖ್ಯ ಸೂತ್ರದಾರ ಅಬ್ದುಲ್‌ ಕರೀಂ ತೆಲಗಿ ಜೀವನವನ್ನಾಧರಿಸಿ ಈ ಹಿಂದಿ ಟಿವಿ ಸೀರಿಸ್‌ ತಯಾರಾಗಿದೆ.
‘ಬಿಗ್‌ಬಾಸ್‌’ ಸೀಸನ್ 17 (Bigg Boss-Hindi season 17)
ಬಾಲಿವುಡ್‌ ಸೂಪರ್‌ ಸ್ಟಾರ್‌ ಸಲ್ಮಾನ್‌ ಖಾನ್‌ ನಡೆಸಿಕೊಡುತ್ತಿರುವ ಭಾರತದ ಅತ್ಯಂತ ಜನಪ್ರಿಯ ಶೋ ಬಿಗ್‌ಬಾಸ್‌. ಸದ್ಯ ಹಿಂದಿ ಅವತರಣಿಕೆಯ 17ನೇ ಸೀಸನ್ ನಡೆಯುತ್ತಿದೆ. ಕಲರ್ಸ್‌ ಚಾನಲ್‌ನಲ್ಲಿ ಇದು ಪ್ರಸಾರವಾಗುತ್ತಿದೆ. ಜತೆಗೆ ಜಿಯೋ ಸಿನಿಮಾದಲ್ಲೂ ವೀಕ್ಷಿಸಬಹುದು.
ʼಗನ್ಸ್ & ಗುಲಾಬ್ಸ್ʼ (Guns & Gulaabs)
ರಾಜ್ ಮತ್ತು ಡಿಕೆ ರಚಿಸಿ, ನಿರ್ದೇಶಿಸಿರುವ ಹಿಂದಿಯ ಕ್ರೈಮ್‌ ಥ್ರಿಲ್ಲರ್‌ ʼಗನ್ಸ್ & ಗುಲಾಬ್ಸ್ʼನಲ್ಲಿ ಮಾಲಿವುಡ್‌ ಸ್ಟಾರ್‌ ದುಲ್ಕಾರ್‌ ಸಲ್ಮಾನ್‌, ರಾಜ್ ಕುಮಾರ್‌ ರಾವ್ ಮುಂತಾದವರು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ನೆಟ್‌ಫ್ಲಿಕ್ಸ್‌ನಲ್ಲಿ ಪ್ರಸಾರವಾಗುತ್ತಿದೆ. ಇದು 8ನೇ ಸ್ಥಾನದಲ್ಲಿದೆ.
‘ಸೆಕ್ಸ್‌ / ಲೈಫ್ಸ್‌’ (Sex/Life)
ಇದು ಕೂಡ ಅಮೆರಿಕನ್‌ ಟಿವಿ ಸೀರಿಸ್‌. ನೆಟ್‌ಫ್ಲಿಕ್ಸ್‌ನಲ್ಲಿ ಪ್ರಸಾರವಾಗುತ್ತಿರುವ ಈ ಶೋ 9ನೇ ಸ್ಥಾನದಲ್ಲಿದೆ. ಸಾರಾ ಶಾಹಿ, ಮೈಕ್ ವೋಗೆಲ್, ಆಡಮ್ ಡೆಮೋಸ್ ಮತ್ತಿತರರು ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದಾರೆ.
‘ತಾಜಾ ಖಬರ್‌’ (Taaza Khabar)
ಹಿಮಾಂಕ್‌ ಗೌರ್‌ ನಿರ್ದೇಶನದ ಈ ಹಿಂದಿ ಕಾಮಿಡಿ ಥ್ರಿಲ್ಲರ್‌ ಜಾನರ್‌ನ ವೆಬ್‌ಸೀರಿಸ್‌ ಅತೀ ಹೆಚ್ಚು ಹುಡುಕಲ್ಪಟ್ಟ ಟಿವಿ ಶೋಗಳ ಪೈಕಿ 10ನೇ ಸ್ಥಾನದಲ್ಲಿದೆ. ಭುವನ್ ಬಾಮ್, ಶ್ರೇಯಾ ಪಿಲ್ಗಾಂವ್ಕರ್, ಜೆ.ಡಿ.ಚಕ್ರವರ್ತಿ, ದೇವನ್ ಭೋಜನಿ ಮತ್ತಿತರರು ನಟಿಸಿದ್ದಾರೆ. ಡಿಸ್ನಿ ಪ್ಲಸ್‌ ಹಾಟ್‌ ಸ್ಟಾರ್‌ನಲ್ಲಿ ಪ್ರಸಾರವಾಗುತ್ತಿದೆ.
ಇದನ್ನೂ ಓದಿ: Year Ender 2023: ಈ ವರ್ಷ ಗೆದ್ದು ಬೀಗಿದ ಸ್ಟಾರ್‌ ನಟರ ಚಿತ್ರಗಳಿವು