ಪದವಿಪೂರ್ವ ವೈದ್ಯಕೀಯ ಕೋರ್ಸ್ಗಳ ಪ್ರವೇಶ ಪರೀಕ್ಷೆ ನೀಟ್ ಯುಜಿ 2022ರ (ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ- NEET UG 2022 ) ಕೀ ಉತ್ತರಗಳು ಇಂದು ಬಿಡುಗಡೆಯಾಗುವ ಸಾಧ್ಯತೆ ಇದೆ. ಜುಲೈ 17ರಂದು ನೀಟ್ ಯುಜಿ 2022ರ ಪರೀಕ್ಷೆ ನಡೆದಿತ್ತು. ಒಂದು ತಿಂಗಳು ಕಳೆದರೂ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ ಕೀ ಉತ್ತರಗಳನ್ನು ಬಿಡುಗಡೆ ಮಾಡಿರಲಿಲ್ಲ ಮತ್ತು ಯಾವಾಗ ಬಿಡುಗಡೆ ಮಾಡುತ್ತೇವೆ ಎಂದು ಒಂದು ದಿನಾಂಕವನ್ನೂ ನಿಗದಿಪಡಿಸಿರಲಿಲ್ಲ. ಪರೀಕ್ಷೆ ಬರೆದವರು ಕಾಯುತ್ತಲೇ ಇದ್ದರು. ಇಂದು ಎನ್ಟಿಎಯ ಅಧಿಕೃತ ವೆಬ್ಸೈಟ್ neet.nta.nic.in ನಲ್ಲಿ ಕೀ ಉತ್ತರಗಳು ಬಿಡುಗಡೆಯಾಗುವ ಸಾಧ್ಯತೆ ಇದ್ದು, ನೀಟ್ ಯುಜಿ 2022ರ ಪರೀಕ್ಷಾ ಫಲಿತಾಂಶ ಆಗಸ್ಟ್ 21ಕ್ಕೆ ಪ್ರಕಟಗೊಳ್ಳಲಿದೆ.
ಇಂದು ನೀಟ್ ಕೀ ಉತ್ತರದೊಂದಿಗೆ ಪರೀಕ್ಷೆ ಪ್ರಶ್ನೆ ಪತ್ರಿಕೆ ಮತ್ತು ಅಭ್ಯರ್ಥಿಗಳ ಪ್ರತಿಕ್ರಿಯಾ ಶೀಟ್ಗಳೂ ಕೂಡ ಎನ್ಟಿಎ ವೆಬ್ಸೈಟ್ನಲ್ಲಿ ಲಭ್ಯವಾಗಲಿದೆ. ಹಾಗೇ, ಪರೀಕ್ಷೆ ಬರೆದಿರುವವರಿಗೆ ಏನಾದರೂ ಆಕ್ಷೇಪಣೆಗಳು ಇದ್ದರೆ, ಅದನ್ನು ಸಲ್ಲಿಸಲು ಕೂಡ ಅವಕಾಶ ಕಲ್ಪಿಸಲಾಗುತ್ತದೆ. ಎಂಬಿಬಿಎಸ್, ಬಿಡಿಎಸ್, ಬಿಎಎಂಎಸ್, ಬಿಎಸ್ಎಂಎಸ್, ಬಿಯುಎಂಎಸ್ ಮತ್ತು ಬಿಎಚ್ಎಂಎಸ್ ಮತ್ತು ಇತರ ಕೋರ್ಸ್ಗಳಿಗೆ ಸೇರಲು ಬಯಸುವ ಸುಮಾರು 18 ಲಕ್ಷ ವಿದ್ಯಾರ್ಥಿಗಳು ಈ ಸಲ ನೀಟ್ ಯುಜಿ ಪರೀಕ್ಷೆ ಬರೆದಿದ್ದರು.
ಕೀ ಉತ್ತರ ಚೆಕ್ ಮಾಡುವ ವಿಧಾನ ಹೀಗಿದೆ
1. ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯ ಅಧಿಕೃತ ವೆಬ್ಸೈಟ್ neet.nta.nic.in ಗೆ ಭೇಟಿ ನೀಡಿ.
2. ಹೋಂ ಪೇಜ್ನಲ್ಲಿ ಕಾಣಿಸುವ ‘NEET 2022 Answer Key’ ಮೇಲೆ ಕ್ಲಿಕ್ ಮಾಡಿ.
3. ಅಲ್ಲಿ ನಿಮ್ಮ ಕ್ರೆಡೆನ್ಷಿಯಲ್ಗಳನ್ನು ದಾಖಲಿಸಿ, ಲಾಗಿನ್ ಆಗಿ.
4. ಆಗ ಸ್ಕ್ರೀನ್ ಮೇಲೆ ನೀಟ್ ಯುಜಿ ಕೀ ಉತ್ತರಗಳು ಕಾಣಿಸುತ್ತವೆ.
ಇದೇ ಮಾದರಿಯ ವಿಧಾನಗಳನ್ನು ಅನುಸರಿಸಿ nta.ac.in ವೆಬ್ಸೈಟ್ನಲ್ಲೂ ಕೀ ಉತ್ತರಗಳನ್ನು ನೋಡಬಹುದು.
ಆಕ್ಷೇಪಣೆ ಸಲ್ಲಿಸುವುದು ಹೇಗೆ?
ನೀಟ್ ಯುಜಿ ಕೀ ಉತ್ತರಗಳು ಬಿಡುಗಡೆಯಾಗುತ್ತಿದ್ದಂತೆ, ಎನ್ಟಿಎಯ ವೆಬ್ಸೈಟ್ neet.nta.nic.inನಲ್ಲಿ ಒಂದು ವಿಂಡೋ ಆ್ಯಕ್ಟಿವೇಟ್ ಆಗುತ್ತದೆ. ಅಲ್ಲಿ ಹೋಗಿ ಆಕ್ಷೇಪಣೆಗಳನ್ನು ಸಲ್ಲಿಸಬಹುದು. ನೇರವಾಗಿ ಆನ್ಲೈನ್ ಮೂಲಕ ಇಲ್ಲಿಯೇ ಸಲ್ಲಿಸಬೇಕು ಹೊರತು, ಯಾವುದೇ ಪತ್ರದಲ್ಲಿ ಬರೆದು ಪೋಸ್ಟ್ ಅಥವಾ ಇನ್ಯಾವುದೇ ಮಾದರಿಯಲ್ಲಿ ಕಳಿಸಿದರೆ ಅದು ಸ್ವೀಕಾರಾರ್ಹವಲ್ಲ.
ಇದನ್ನೂ ಓದಿ: Neet Exam 2022 | ನೀಟ್ ಪರೀಕ್ಷೆಗೆ ಕ್ಷಣಗಣನೆ; ರಾಜ್ಯದ 1.19 ಲಕ್ಷ ವಿದ್ಯಾರ್ಥಿಗಳು ಪರೀಕ್ಷೆ ಬರೆಯುವ ನಿರೀಕ್ಷೆ