ಬೆಂಗಳೂರು: ರಾಜ್ಯ ಸರ್ಕಾರಿ ನೌಕರರ ವೇತನ, ಭತ್ಯೆ ಮತ್ತು ಸೌಲಭ್ಯಗಳ ಪರಿಷ್ಕರಣೆಗಾಗಿ ರಚಿಸಲ್ಪಟ್ಟಿರುವ 7ನೇ ವೇತನ ಆಯೋಗವು (7th Pay Commission) ಈಗಾಗಲೇ ಸರ್ಕಾರಿ ನೌಕರರಿಂದ ಮತ್ತು ಸಾರ್ವಜನಿಕರಿಂದ ಪ್ರಶ್ನೋತ್ತರ ಮಾದರಿಯಲ್ಲಿ ಅಭಿಪ್ರಾಯ, ಬೇಡಿಕೆಗಳ ಕುರಿತು ಮಾಹಿತಿ ಪಡೆದುಕೊಂಡಿದ್ದು, ಈಗ ಓಪಿಎಸ್‌ ಜಾರಿಗಾಗಿ ಹೋರಾಟ ನಡೆಸುತ್ತಿರುವ ರಾಜ್ಯ ಸರ್ಕಾರದ ಎನ್‌ಪಿಎಸ್‌ ನೌಕರರ ಸಂಘದೊಂದಿಗೆ (NPS News) ವಿಶೇಷ ಸಭೆ ಆಯೋಜಿಸಿದೆ.
ಇದಕ್ಕಾಗಿ ಆಯೋಗವು ಜೂನ್‌ 27 ರಂದು ವಿಶೇಷ ಸಭೆ ಕರೆದಿದ್ದು, ಬೆಳಗ್ಗೆ 11.30 ಕ್ಕೆ ಆಯೋಗದ ಕಚೇರಿಯಲ್ಲಿ ಈ ಸಭೆ ನಡೆಯಲಿದೆ. ಅಗತ್ಯ ಎಲ್ಲ ಮಾಹಿತಿಯೊಂದಿಗೆ ಸಭೆಗೆ ಆಗಮಿಸಬೇಕೆಂದು ಎನ್‌ಪಿಎಸ್‌ ನೌಕರರ ಸಂಘದ ಅಧ್ಯಕ್ಷರಿಗೆ ಆಯೋಗದ ಕಾರ್ಯದರ್ಶಿ ಹೆಪ್ಸಿಬಾ ರಾಣಿ ಕೊರ್ಲಪಾಟಿ ಪತ್ರ ಬರೆದಿದ್ದಾರೆ.
ಈ ಸಭೆಯಲ್ಲಿ ಸಂಘದ ಬೇಡಿಕೆಗಳ ಕುರಿತು ಚರ್ಚಿಸಲಾಗುತ್ತದೆ. ತಮ್ಮ ಬೇಡಿಕೆಗಳ ಕುರಿತು ಪಿಪಿಟಿಯೊಂದಿಗೆ ಬನ್ನಿ. ಪಿಪಿಟಿಯಲ್ಲಿ ಪ್ರಶ್ನಾವಳಿಯ ಉತ್ತರಗಳು, ಬೇಡಿಕೆಗಳು ಮತ್ತು ಇತರೆ ವಿಷಯಗಳ ಸಂಕ್ಷಿಪ್ತ ಮಾಹಿತಿ ಇರಬೇಕು. ಮಾಹಿತಿಯು ವಸ್ತುನಿಷ್ಠ ಹಾಗು ನಿರ್ದಿಷ್ಟವಾಗಿರಬೇಕು ಹಾಗೂ ಹತ್ತು ಸ್ಲೈಡ್‌ಗಳಿಗೆ ಸೀಮಿತವಾಗಿರಬೇಕು. ಮಾಹಿತಿಯು ಸ್ಲೈಡ್‌ಗಳಲ್ಲಿ ಪುನರಾವರ್ತನೆಯಾಗಬಾರದು ಎಂದು ಸೂಚಿಸಲಾಗಿದೆ.
ಈಗಾಗಲೇ ಸರ್ಕಾರಿ ನೌಕರರ ಸಂಘದೊಂದಿಗೆ ಆಯೋಗವು ಇದೇ ರೀತಿಯಾಗಿ ಚರ್ಚೆ ನಡೆಸಿತ್ತು. ಈ ಸಭೆಯಲ್ಲಿ ಮುಖ್ಯವಾಗಿ ಓಪಿಎಸ್‌ ಮತ್ತು ಎನ್‌ಪಿಎಸ್‌ ಕುರಿತ ವಿಷಯಗಳು ಚರ್ಚೆಗೆ ಬರಲಿದೆ. ಈಗಾಗಲೇ ಎನ್‌ಪಿಎಸ್‌ ನೌಕರರ ಸಂಘ ಓಪಿಎಸ್‌ ಜಾರಿಗೆ ಸಬಂಧಿಸಿದಂತೆ ಎಲ್ಲ ಮಾಹಿತಿಯನ್ನೂ ಆಯೋಗಕ್ಕೆ ಸಲ್ಲಿಸಿದೆ. ಎನ್‌ಪಿಎಸ್‌ ರದ್ದುಪಡಿಸಿ, ಓಪಿಎಸ್‌ ಜಾರಿಗೆ ಶಿಫಾರಸು ಮಾಡಬೇಕೆಂದು ಮತ್ತೊಮ್ಮೆ ಎಲ್ಲ ಮಾಹಿತಿಗಳೊಂದಿಗೆ ಮನವಿ ಮಾಡಲಾಗುವುದು ಎಂದು ಸಂಘದ ಅಧ್ಯಕ್ಷ ಶಾಂತರಾಮ ಹೇಳಿದ್ದಾರೆ.
ನೂತನ ಸರ್ಕಾರ ಅಸ್ತಿತ್ವಕ್ಕೆ ಬರುತ್ತಿದ್ದಂತೆಯೇ ಆರ್ಥಿಕ ಇಲಾಖೆಯ ಉಪ ಕಾರ್ಯದರ್ಶಿ ಉಮಾ ಕೆ. ಅವರು ಏಳನೇ ವೇತನ ಆಯೋಗಕ್ಕೆ ತನ್ನ ಕಾರ್ಯ ಕಲಾಪಗಳನ್ನು ಪೂರ್ಣಗೊಳಿಸಿ ಸರ್ಕಾರಕ್ಕೆ ವರದಿ ಸಲ್ಲಿಸಲು ಅನುಕೂಲವಾಗುವಂತೆ ಆಯೋಗದ ಕಾಲಾವಧಿಯನ್ನು ಮೇ 19ರಿಂದ 6 ತಿಂಗಳ ಕಾಲ ವಿಸ್ತರಿಸಿ ಆದೇಶ ಹೊರಡಿಸಿದ್ದರು. ಈ ಆಯೋಗವನ್ನು ನಿವೃತ್ತ ಮುಖ್ಯ ಕಾರ್ಯದರ್ಶಿ ಸುಧಾಕರ ರಾವ್‌ ಅಧ್ಯಕ್ಷತೆಯಲ್ಲಿ 2022ರ ನವೆಂಬರ್‌ 19 ರಂದು ರಚಿಸಲಾಗಿತ್ತು. ಆಯೋಗಕ್ಕೆ 6 ತಿಂಗಳ ಕಾಲಾವಕಾಶ ನೀಡಲಾಗಿತ್ತು. ಈ ಅವಧಿಯು ಮೇ. 19 ರಂದು ಅಂತ್ಯಗೊಳ್ಳಲಿದ್ದ ಹಿನ್ನೆಲೆಯಲ್ಲಿ ಅವಧಿಯನ್ನು ವಿಸ್ತರಿಸಲಾಗಿತ್ತು.
ರಾಜ್ಯದಲ್ಲಿ ಚುನಾವಣೆಯ ಚಟುವಟಿಕೆಗಳು ನಡೆಯುತ್ತಿದ್ದುದ್ದರಿಂದ ಮತ್ತು ನೀತಿ ಸಂಹಿತೆ ಜಾರಿಯಲ್ಲಿದ್ದುದ್ದರಿಂದ ಆಯೋಗಕ್ಕೆ ನಿಗಿದಿತ ಅವಧಿಯಲ್ಲಿ ವರದಿ ಸಿದ್ಧಪಡಿಸಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ ಹೆಚ್ಚಿನ ಕಾಲಾವಕಾಶವನ್ನು ಕೋರಿ ಆಯೋಗ ಸರ್ಕಾರಕ್ಕೆ ಮನವಿ ಸಲ್ಲಿಸಿತ್ತು. ಅದರಂತೆ ಆಯೋಗದ ಅವಧಿಯನ್ನು ವಿಸ್ತರಿಸಲಾಗಿತ್ತು.
ಸರ್ಕಾರಿ ನೌಕರರಿಗೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ (Click Here) ಕ್ಲಿಕ್‌ ಮಾಡಿ.
NPS ನೌಕರರ ವಾದವೇನು?
ನೂತನ ಪಿಂಚಣಿ ವ್ಯವಸ್ಥೆಯು ಸರ್ಕಾರ ಹಾಗೂ ಸರ್ಕಾರಿ ನೌಕರರ ನಡುವೆ ಇರುವ ಸಂಬಂಧವನ್ನು ದೂರ ಮಾಡುತ್ತಿದೆ. ಈ ಅವೈಜ್ಞಾನಿಕವಾದ ಯೋಜನೆಯನ್ನು ರದ್ದುಪಡಿಸಬೇಕು ಎಂದು ಆಗ್ರಹಿಸಿರುವ ಎನ್‌ಪಿಎಸ್‌ ನೌಕರರ ಸಂಘ, ಈಗಾಗಲೇ ರಾಜಸ್ಥಾನ, ಛತ್ತೀಸ್‌ಗಢ, ಜಾರ್ಖಂಡ್‌, ಪಂಚಾಬ್‌ ಮತ್ತು ಹಿಮಾಚಲ ಪ್ರದೇಶ ಸರ್ಕಾರಗಳು ಎನ್‌ಪಿಎಸ್‌ ಯೋಜನೆಯನ್ನು ರದ್ದು ಪಡಿಸಿವೆ. ಈ ಹಿನ್ನೆಲೆಯಲ್ಲಿ ರಾಜ್ಯದಲ್ಲಿ ನೂತನ ಪಿಂಚಣಿ ಯೋಜನೆಯನ್ನು ರದ್ದುಪಡಿಸಲು ಮತ್ತು ಹಳೆ ಪಿಂಚಣಿ ಯೋಜನೆಯನ್ನು ಜಾರಿಗೊಳಿಸಲು ಶಿಫಾರಸು ಮಾಡಿ ಎಂದು ಎನ್‌ಪಿಎಸ್‌ ನೌಕರರ ಸಂಘ ಈಗಾಗಲೇ ಆಯೋಗಕ್ಕೆ ಸಲ್ಲಿಸಿರುವ ಮನವಿಯಲ್ಲಿ ಒತ್ತಾಯಿಸಿದೆ.
ಹಲವು ದೇಶಗಳಲ್ಲಿ ಎನ್‌ಪಿಎಸ್‌ ವಿಫಲ
ಈ ಯೋಜನೆಯು ಪ್ರಪಂಚದ ಅನೇಕ ದೇಶಗಳಲ್ಲಿ ವಿಫಲಗೊಂಡಿರುವ ಪಿಂಚಣಿ ಯೋಜನೆಯಾಗಿದ್ದು, ಫ್ರಾನ್ಸ್‌, ಸ್ಪೇನ್‌, ಗ್ರೀಸ್‌, ಡೆನ್ಮಾರ್ಕ್‌, ಅಮೆರಿಕ ಮತ್ತು ಬ್ರಿಟನ್‌ನಲ್ಲಿ ಈ ಯೋಜನೆಯಡಿ ಹೂಡಿರುವ ನೌಕರರ ಹಣವು 2008 ರಲ್ಲಿ ಉಂಟಾದ ಷೇರು ಮಾರುಕಟ್ಟೆ ಕುಸಿತದಿಂದ ಸಂಪೂರ್ಣ ನಷ್ಟ ಹೊಂದಿರುತ್ತವೆ. ನೌಕರರ ಹಾಗೂ ಜನಸಾಮಾನ್ಯರ ಹಣವನ್ನು ಹೂಡಿಕೆ ಮಾಡಿದ್ದ ಕಂಪನಿಗಳು ದಿವಾಳಿಯಾಗಿವೆ. (ಉದಾ: ಅಮೆರಿಕದ ಜನರಲ್‌ ಇನ್ಸೂರೆನ್ಸ್‌ ಕಂಪನಿ ಲಿಮಿಟೆಡ್‌) ಇದರಿಂದಾಗಿ ಅಲ್ಲಿನ ನೌಕರರು ಪಿಂಚಣಿ ಹಣ, ವಿಮೆ ಹಣ ಹಾಗೂ ಉಳಿತಾಯದ ಹಣವನ್ನು ಸಂಪೂರ್ಣವಾಗಿ ಕಳೆದುಕೊಂಡು ನಿರ್ಗತಿಕರಾಗಿದ್ದಾರೆ ಎಂದು ಸಂಘವು ಮನವಿಯಲ್ಲಿ ಹೇಳಿದೆ.
ನಮ್ಮ ದೇಶದ ಜಿಡಿಪಿಯ ಬಹುಪಾಲು ಹಣ ನೌಕರರಿಗೆ ನೀಡುವ ವೇತನ ಮತ್ತು ಪಿಂಚಣಿಗೆ ಹೋಗುತ್ತದೆ ಎಂಬ ಅಂಶವನ್ನೇ ಆಧಾರವಾಗಿಟ್ಟು, ಎನ್‌ಪಿಎಸ್‌ ಯೋಜನೆಯನ್ನು ಜಾರಿಗೆ ತರಲಾಗಿದೆ ಎಂದು ಹೇಳಲಾಗುತ್ತದೆ. ಆದರೆ ವಾಸ್ತವವಾಗಿ ಇದು ಸತ್ಯಕ್ಕೆ ದೂರವಾದ ಮಾತಾಗಿದೆ. ವಿವಿಧ ರಾಷ್ಟಗಳಲ್ಲಿ ನೌಕರರಿಗೆ ನೀಡುವ ವೇತನ ಮತ್ತು ಪಿಂಚಣಿಗೆ ಜಿಡಿಪಿಯ ಪಾಲು ಇಂತಿದೆ; ಬ್ರೆಜಿಲ್‌ ಶೇ. 5, ಚೀನಾ ಶೇ. 10.6, ಇಟಲಿ ಶೇ.14.2, ಉಕ್ರೇನ್‌ ಶೇ. 15.4, ಅಮೇರಿಕದಲ್ಲಿ ಶೇ. 33 ರಷ್ಟಾಗಿದ್ದು, ಇಲ್ಲಿ ವೃದ್ಯಾಪ್ಯ ಸಂಬಂಧಿ ಸಾಮಾಜಿಕ ಆರ್ಥಿಕ ಭದ್ರತೆಗಾಗಿ ಇದನ್ನು ಮೀಸಲಿರಿಸಲಾಗಿದೆ. ಆದರೆ ಭಾರತ ಶೇ.0.93 ಮಾತ್ರ. ಸರ್ಕಾರವು ವೇತನ ಹಾಗೂ ಪಿಂಚಣಿಗಾಗಿ ವೆಚ್ಚ ಮಾಡುವ ಒಟ್ಟು ಮೊತ್ತದಲ್ಲಿ ಸರ್ಕಾರದ ವಿಧಾನಮಂಡಲ ಸದಸ್ಯರ ಹಾಗೂ ಕೇಂದ್ರ ಸೇವೆಗೆ ಸೇರಿರುವ ಅಧಿಕಾರಿಗಳ (ಐಎಎಸ್‌, ಐಪಿಎಸ್‌) ವೇತನ ಹಾಗೂ ಪಿಂಚಣಿಯು ಸೇರಿರುತ್ತದೆ ಎಂದು ಎನ್‌ಪಿಎಸ್‌ ನೌಕರರ ಸಂಘವು ಆಯೋಗದ ಗಮನ ಸೆಳೆದಿದೆ.
ಸರ್ಕಾರಕ್ಕೆ ಹೊರೆಯ ಮಾತೇ ಇಲ್ಲ
ಎನ್‌ಪಿಎಸ್‌ ಯೋಜನೆಯನ್ನು ರದ್ದುಪಡಿಸಿ, ಓಪಿಎಸ್‌ ಜಾರಿಗೆ ತರುವುದರಿಂದ ತಕ್ಷಣಕ್ಕೆ ರಾಜ್ಯ ಸರ್ಕಾರದ ಮೇಲೆ ಆರ್ಥಿಕ ಹೊರೆಯಾಗುತ್ತದೆ ಎಂಬ ಅಭಿಪ್ರಾಯವಿದೆ. ಆದರೆ ಈ ಯೋಜನೆಯಿಂದ ಸರ್ಕಾರಕ್ಕೆ ಯಾವುದೇ ಆರ್ಥಿಕ ಪ್ರಯೋಜನವಾಗಿರುವುದಿಲ್ಲ ಎಂದು ವಾದಿಸಿರುವ ನೌಕರರ ಸಂಘ ಇದನ್ನು ಹೀಗೆ ಸಮರ್ಥಿಸಿಕೊಂಡಿದೆ.
- ಪ್ರಸ್ತುತ ದಿನಾಂಕ:01/04/2006ರ ಹಿಂದೆ ನಿವೃತ್ತರಾದ ನೌಕರರಿಗೆ ಪಿಂಚಣಿಯನ್ನು ಒದಗಿಸುವುದರ ಜೊತೆಗೆ ದಿನಾಂಕ 01/04/2006ರ ನಂತರ ಸೇವೆಗೆ ಸೇರಿರುವ ಸುಮಾರು 2,98,717 ನೇರ ಸರ್ಕಾರಿ ನೌಕರರಿಗೆ ಹಾಗೂ ವಿವಿಧ ನಿಗಮ ಮಂಡಳಿ, ಸ್ವಾಯತ್ತ ಸಂಸ್ಮೆಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸುಮಾರು 3,50,000 ನೌಕರರಿಗೆ ಸರ್ಕಾರ ತನ್ನ ಪಾಲಿನ ವಂತಿಗೆಯಾಗಿ ಶೇ.14 ರಷ್ಟನ್ನು ಪಾವತಿಸಬೇಕಾದ ಅನಿವಾರ್ಯತೆ ಉಂಟಾಗಿದೆ. ವಾರ್ಷಿಕ ಮೊತ್ತವು ಸುಮಾರು ರೂ. 3,000 ಕೋಟಿ ಆಗಲಿದೆ.
- ದಿನಾಂಕ:01/04/2006 ರಿಂದ 10.12.2022 ರವರೆಗೆ ಸರ್ಕಾರವು ತನ್ನ ಪಾಲಿನ ವಂತಿಗೆಯಾಗಿ ನೇರ ಸರ್ಕಾರಿ ನೌಕರರಿಗೆ ಸುಮಾರು ರೂ.10,000/- ಕೋಟಿಗಳನ್ನು 150(ಗೆ ಪಾವತಿಸಿರುತ್ತದೆ.
- ಜೊತೆಗೆ ಸರ್ಕಾರವು ಎನ್‌ಎಸ್‌ಡಿಎಲ್‌-ಸಿಎಆರ್‌ಗೆ ಈ ಯೋಜನೆಯ ನಿರ್ವಹಣೆಗೆ ಸೇವಾ ಶುಲ್ಕವಾಗಿ ಸುಮಾರು 68 ಕೋಟಿಗಳನ್ನು ಪಾವತಿಸಿರುತ್ತದೆ.
- ಎನ್‌ಪಿಎಸ್‌ ಯೋಜನೆ ದಿನಾಂಕ: 01.04.2006 ರಲ್ಲಿ ಇದ್ದ ಮಾದರಿಯಲ್ಲಿ ಈಗ ಇಲ್ಲ.
- ಸರ್ಕಾರದ ವಂತಿಗೆ-ನೌಕರರ ವಂತಿಗೆ ಕ್ರಮವಾಗಿ ಶೇ.10 ಇದ್ದದ್ದು, ಪ್ರಸ್ತುತ ಕ್ರಮವಾಗಿ ಶೇ.14.10 ಆಗಿದೆ.
- ಸರ್ಕಾರದ ಆದೇಶ ಸಂಖ್ಯೆ: ಆಇ-ಪಿಇಎನ್‌/149/2022, ದಿನಾಂಕ:19.10.2022 ರನ್ವಯ ಮರಣ ಮತ್ತು ನಿವೃತ್ತಿ ಉಪಧನ (ಡಿಸಿಆರ್‌ಜಿ) ವನ್ನು ದಿನಾಂಕ:01.04.2006 ರಿಂದ ಪೂರ್ವನ್ವಯವಾಗುವಂತೆ ಮರುಸ್ಥಾಪಿಸಲಾಗಿದೆ.
- ಮರಣ ಹೊಂದಿರುವ ನೌಕರರ ಅವಲಂಬಿತರಿಗೆ ಓಪಿಎಸ್‌ ನೌಕರರಂತೆ ಕುಟುಂಬ ಪಿಂಚಣಿ ಜಾರಿಗೊಳಿಸಲಾಗಿದೆ. ಎನ್‌ಪಿಎಸ್‌ ವಂತಿಗೆ ಹಣವನ್ನು ಕ್ರಮವಾಗಿ ಸರ್ಕಾರ ಮತ್ತು ಅವಲಂಬಿತರಿಗೆ ಹಿಂದಿರುಗಿಸಲಾಗುತ್ತಿದೆ.
- ಈ ಅಂಶಗಳ ಹಿನ್ನೆಲೆಯಲ್ಲಿ ಪ್ರಸ್ತುತ ಸರ್ಕಾರಕ್ಕೆ ಎನ್‌ಪಿಎಸ್‌ ಯೋಜನೆಯಿಂದ ಯಾವುದೇ ತರಹದ ಆರ್ಥಿಕ ಪ್ರಯೋಜನವಾಗಿರುವುದಿಲ್ಲ. ಬದಲಾಗಿ ಈ ಯೋಜನೆಯನ್ನು ರದ್ದುಗೊಳಿಸುವುದರಿ೦ದ ಸರ್ಕಾರದ ವಂತಿಗೆ ರೂ. 9,500 ಕೋಟಿ ಸರ್ಕಾರದ ಅಭಿವೃದ್ದಿ ಯೋಜನೆಗಳಿಗೆ ಲಭ್ಯವಾಗುತ್ತದೆ.
- ಜೊತೆಗೆ ನೌಕರರ ಪಾಲಿನ ವಂತಿಗೆ ರೂ.8,500 ಕೋಟಿಗಳನ್ನು ನೌಕರರ ಜಿಪಿಎಫ್‌ ಖಾತೆಗೆ ವರ್ಗಾಯಿಸಿದಲ್ಲಿ; ಈ ಹಣವು ಕೂಡ ಸರ್ಕಾರದ ಅಭಿವೃದ್ದಿ ಕಾರ್ಯಗಳಿಗೆ ಪರೋಕ್ಷವಾಗಿ ಲಭ್ಯವಾಗಲಿದೆ (ಈಗಾಗಲೇ ಎನ್‌ಪಿಎಸ್‌ ಯೋಜನೆಯನ್ನು ರದ್ದುಗೊಳಿಸಿರುವ ರಾಜಸ್ಥಾನ ಸರ್ಕಾರವು ಈ ಮಾದರಿಯನ್ನು ಅನುಸರಿಸಿದೆ).
ಇದನ್ನೂ ಓದಿ : NPS News : ಸರ್ಕಾರಿ ನೌಕರರಿಗೆ ಕನಿಷ್ಠ ಪಿಂಚಣಿ ಜಾರಿ ವರದಿ; ವಿತ್ತ ಸಚಿವಾಲಯ ಸ್ಪಷ್ಟನೆ ಏನು?
ರಾಜ್ಯ ಸರ್ಕಾರಕ್ಕಿದೆ ರದ್ದಿನ ಅಧಿಕಾರ
ಪಿಎಫಆರ್‌ಡಿಎ ಕಾಯ್ದೆಯ ಕಲಂ 12(5) ರಲ್ಲಿ ಎನ್‌ಪಿಎಸ್‌ ಯೋಜನೆಯನ್ನು ಅಳವಡಿಸಿಕೊಳ್ಳುವ ಅಥವಾ
ಬಿಡುವ ಸಂಪೂರ್ಣ ಅಧಿಕಾರವನ್ನು ರಾಜ್ಯ ಸರ್ಕಾರಗಳ ವಿವೇಚನೆಗೆ ಬಿಟ್ಟಿರುತ್ತದೆ. ಜೊತೆಗೆ ಕೇಂದ್ರ ಸರ್ಕಾರವು ಸಂಘದ ಮನವಿಗೆ ನೀಡಿರುವ ಸೃಷ್ಟೀಕರಣದಲ್ಲಿ ಇದೆ ಅಭಿಪ್ರಾಯವನ್ನು ಕೂಡ ವ್ಯಕ್ತಪಡಿಸಿದೆ ಎಂದು ಎನ್‌ಪಿಎಸ್‌ ನೌಕರರ ಸಂಘ ದಾಖಲೆ ಒದಗಿಸಿದೆ.
ಈ ಯೋಜನೆಯು ನೌಕರರ ಸಂಧ್ಯಾಕಾಲದ ಬದುಕಿಗೆ ಸಾಮಾಜಿಕ ಆರ್ಥಿಕ ಭದ್ರತೆಯನ್ನು ನೀಡದೇ ಇರುವುದರಿಂದ ಈ ಯೋಜನೆಯನ್ನು ರದ್ದುಗೊಳಿಸುವಂತೆ ನಿರಂತರ ಹೋರಾಟವನ್ನು ನಡೆಸಲಾಗಿದೆ ಎಂದು ಎನ್‌ಪಿಎಸ್‌ ನೌಕರರ ಸಂಘವು ತಾನು ಇದುವರೆಗೆ ನಡೆಸಿದ ಹೋರಾಟದ ಕುರಿತು ಆಯೋಗಕ್ಕೆ ವಿವರಿಸಿದೆ.