ದಾವಣಗೆರೆ: ಪ್ರೀತಿಸಿದ ಹುಡುಗಿ ಕೈತಪ್ಪುತ್ತಿದ್ದಾಳೆಂಬ ಹತಾಶೆ, ಕ್ರೋಧದಲ್ಲಿ ಆಕೆಯ ಕತ್ತುಕೊಯ್ದು, ತಾನೂ ವಿಷ ಸೇವಿಸಿದ್ದ ಯುವಕ ಈಗ ಮೃತಪಟ್ಟಿದ್ದಾನೆ. ಚಾಂದ್ ಸಾದತ್ ಪೀರ್ (29) ಮೃತ ಯುವಕ. ದಾವಣಗೆರೆ ನಗರದ ಪಿಜೆ ಬಡಾವಣೆಯ ಚರ್ಚ್ ಬಳಿ ನಿನ್ನೆ ಚಾಂದ್ ಸುಲ್ತಾನ್ ಎಂಬ 24 ವರ್ಷದ ಯುವತಿಯ ಹತ್ಯೆಯಾಗಿತ್ತು. ಆಕೆ ಮನೆಯಿಂದ ಕೆಲಸಕ್ಕೆ ಸ್ಕೂಟರ್ನಲ್ಲಿ ತೆರಳುತ್ತಿದ್ದಾಗ ಇದೇ ಚಾಂದ್ ಸಾದತ್ ಅವಳನ್ನು ಮಾತನಾಡಬೇಕು ಎಂದು ನಿಲ್ಲಿಸಿ, ಕತ್ತುಕೊಯ್ದು ಓಡಿಹೋಗಿ ವಿಷ ಕುಡಿದಿದ್ದ. ಇತ್ತ ಯುವತಿಯನ್ನು ಸ್ಥಳೀಯರು ಆಸ್ಪತ್ರೆಗೆ ದಾಖಲು ಮಾಡಿದ್ದರೂ ಅವಳನ್ನು ಬದುಕಿಸಲು ಸಾಧ್ಯವಾಗಿರಲಿಲ್ಲ.
ಇಲ್ಲಿ ಚಾಂದ್ ಸಾದತ್ ಮತ್ತು ಚಾಂದ್ ಸುಲ್ತಾನ್ ಇಬ್ಬರೂ ಸಂಬಂಧಿಕರಾಗಿದ್ದು, ಚಾಂದ್ ಸುಲ್ತಾಳ್ಳನ್ನು ಸಾದತ್ ಪಾಗಲ್ನಂತೆ ಪ್ರೀತಿಸುತ್ತಿದ್ದ. ಅತಿಸುಂದರಿಯಾಗಿದ್ದ ಆಕೆಯನ್ನೇ ಮದುವೆಯಾಗುವುದು ಎಂದು ನಿರ್ಧರಿಸಿಯೂಬಿಟ್ಟಿದ್ದ. ಆಕೆಯನ್ನು ಮದುವೆಯಾಗಲು ಸಾದತ್ ಮನೆಯಲ್ಲಿ ಒಪ್ಪಿಗೆಯೂ ಇತ್ತು. ಆದರೆ ಚಾಂದ್ ಸುಲ್ತಾನ್ ಮನೆಯಲ್ಲಿ ಈ ಮದುವೆಯನ್ನು ಒಪ್ಪಿರಲಿಲ್ಲ. ಅಷ್ಟಲ್ಲದೆ, ಚಾಂದ್ ಸುಲ್ತಾನ್ಗೆ ಬೇರೊಬ್ಬನ ಜತೆ ಮದುವೆಯನ್ನೂ ನಿಶ್ಚಯ ಮಾಡಿದ್ದರು. ಇದೆಲ್ಲವನ್ನೂ ಸಹಿಸಲಾಗದ ಸಾದತ್, ತಾನು ಪ್ರೀತಿಸಿದ ಹುಡುಗಿ ತನಗಿಲ್ಲ ಎಂದರೆ, ಬೇರೆಯವರಿಗೂ ಸಿಗಬಾರದು ಎಂಬ ಕಾರಣಕ್ಕೆ ಅವಳ ಕೊಲೆ ಮಾಡಿದ್ದ.
ಇನ್ನು ಈ ಪ್ರಕರಣ ನಡೆದ ಬಳಿಕ ಸಾದತ್ ತಾನೂ ವಿಷ ಕುಡುದಿದ್ದ. ಸ್ಥಳಕ್ಕೆ ಬಂದ ಪೊಲೀಸರು ಆತನನ್ನು ವಶಕ್ಕೆ ಪಡೆದು ದಾವಣಗೆರೆ ಸಿಟಿ ಸೆಂಟ್ರಲ್ ಆಸ್ಪತ್ರೆಗೆ ದಾಖಲು ಮಾಡಿದ್ದರು. ಆದರೆ ಚಿಕಿತ್ಸೆ ಫಲಕಾರಿ ಆಗಲಿಲ್ಲ. ದಾವಣಗೆರೆ ಠಾಣೆಯಲ್ಲಿ ಕೇಸ್ ದಾಖಲಾಗಿದೆ.