ಮಂಗಳೂರು: ಇಲ್ಲಿನ ನಾಗುರಿ ಬಳಿ ಶನಿವಾರ ಸಂಜೆ 4.40ರ ಹೊತ್ತಿಗೆ ಆಟೋ ಸ್ಫೋಟವಾಗಿದ್ದು ಈಗ ರಾಷ್ಟ್ರಮಟ್ಟದಲ್ಲಿ ಸಂಚಲನ ನಡೆಸಿದ ಸುದ್ದಿಯಾಗಿ ಮಾರ್ಪಾಡಾಗಿದೆ. ಮೊದಲು ಇದು ಸಿಲಿಂಡರ್ ಬ್ಲಾಸ್ಟ್ ಕೇಸ್ ಅಂದುಕೊಳ್ಳಲಾಯಿತು. ಆದರೆ ಈಗ ಅದೊಂದು ಭಯೋತ್ಪಾದಕ ಕೃತ್ಯ ಎಂಬುದು ಸಾಬೀತಾಗಿದೆ. ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿಯವರೂ ಇದನ್ನೇ ಹೇಳಿದ್ದು, ರಾಷ್ಟ್ರೀಯ ತನಿಖಾ ದಳ (ಎನ್ಐಎ) ವಿವಿಧ ಆಯಾಮಗಳಲ್ಲಿ ತನಿಖೆ ನಡೆಸುತ್ತಿದೆ.
ಭಯೋತ್ಪಾದನಾ ಕೃತ್ಯವೆಂದು ಸಾಬೀತಾಗುತ್ತಿದ್ದಂತೆ ಹತ್ತು-ಹಲವು ಪ್ರಶ್ನೆಗಳು, ಅನುಮಾನಗಳು ಎದ್ದಿವೆ. ಅದರಲ್ಲಿ ಮುಖ್ಯವಾಗಿ ಗಮನ ಹೋಗುತ್ತಿರುವುದು ನಿಷೇಧಿತ ಪಿಎಫ್ಐ ಸಂಘಟನೆಯತ್ತ. ಎರಡು ತಿಂಗಳ ಹಿಂದೆ ಕೇಂದ್ರ ಸರ್ಕಾರ ಈ ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾವನ್ನು ಬ್ಯಾನ್ ಮಾಡಿದೆ. ಹೀಗೆ ಬ್ಯಾನ್ ಮಾಡುವುದಕ್ಕೂ ಮೊದಲು ದೇಶಾದ್ಯಂತ, ಕರ್ನಾಟಕವೂ ಸೇರಿ (ಅದರಲ್ಲೂ ವಿಶೇಷವಾಗಿ ಮಂಗಳೂರು) ಎಲ್ಲ ಕಡೆ ಪಿಎಫ್ಐ ಕಚೇರಿಗಳು, ಮುಖಂಡರ ಮನೆಗಳ ಮೇಲೆ ಎನ್ಐಎ (ರಾಷ್ಟ್ರೀಯ ತನಿಖಾ ದಳ) ನಿರಂತರವಾಗಿ ದಾಳಿ ನಡೆಸಿತ್ತು. ಸೆಪ್ಟೆಂಬರ್ ತಿಂಗಳಾದ್ಯಂತ ಪಿಎಫ್ಐ ಮತ್ತು ಎಸ್ಎಫ್ಐ ಗಳ ಮೇಲೆ ರೇಡ್ ನಡೆದು, ಪಿಎಫ್ಐ ಉಗ್ರಕೃತ್ಯಗಳಿಗೆ ನೆರವು ನೀಡುವ ಸಂಘಟನೆ ಎಂದು ಸಾಬೀತಾಗಿತ್ತು. ಅಂತಿಮವಾಗಿ ಸೆಪ್ಟೆಂಬರ್ 28ರಂದು ಪಿಎಫ್ಐ ನಿಷೇಧಗೊಂಡಿತ್ತು. ಆ ಸಮಯದಲ್ಲಿ ಮಂಗಳೂರಿನಲ್ಲಿಯೇ ಪಿಎಫ್ಐನ 12 ಕಚೇರಿಗಳಿಗೆ ಬೀಗ ಹಾಕಲಾಗಿದೆ.
ಹೀಗೆ ಪಿಎಫ್ಐ ನಿಷೇಧ ಮಾಡಿದ್ದಕ್ಕೆ, ಅದರ ಪ್ರತೀಕಾರವಾಗಿ ಮಂಗಳೂರಿನಲ್ಲಿ ಆಟೋ ಬಾಂಬ್ ಸ್ಫೋಟ ನಡೆಯಿತಾ? ಎಂಬ ಅನುಮಾನ ದೊಡ್ಡಮಟ್ಟದಲ್ಲಿ ತನಿಖಾ ಸಿಬ್ಬಂದಿ ಮತ್ತು ಜನಸಾಮಾನ್ಯರನ್ನು ಕಾಡುತ್ತಿದೆ. ಆ ಬಗ್ಗೆಯೂ ಕೂಲಂಕುಷ ಪರಿಶೀಲನೆ ಶುರುವಾಗಿದೆ. ಇನ್ನು ಇಲ್ಲಿ ಸ್ಫೋಟವಾದ ಐಇಡಿಯನ್ನು ಸ್ಥಳೀಯವಾಗಿ ಸಿಗುವ ರಾಸಾಯನಿಕ ಬಳಸಿಯೇ ತಯಾರಿಸಲಾಗಿದೆ ಎಂದೂ ಹೇಳಲಾಗುತ್ತಿದೆ. ಈ ಬಾಂಬ್ನ್ನು ತಯಾರಿಸಿ ಸ್ಫೋಟಗೊಳಿಸಿ, ಅದನ್ನು ಹಿಂದು ಹೆಸರಿನ ತಲೆಗೆ ಕಟ್ಟಲು ಸ್ಲೀಪರ್ ಸೆಲ್ ರಚಿಸಿ, ಎರಡು ತಿಂಗಳುಗಳಿಂದಲೂ ತರಬೇತಿ ನೀಡಲಾಗುತ್ತಿತ್ತು. ಈ ಸ್ಲೀಪರ್ಸೆಲ್ನಲ್ಲಿ ಕೆಲಸ ಮಾಡುತ್ತಿದ್ದವರು ಬಿಇ ಪದವೀಧರರು, ಆಟೋವನ್ನು ಒಂದು ನಿರ್ದಿಷ್ಟ ಪ್ರದೇಶದಲ್ಲಿ ಇಟ್ಟು ಸ್ಫೋಟಿಸಲು ಯೋಜನೆ ರೂಪಿಸಲಾಗಿತ್ತು ಎಂಬಿತ್ಯಾದಿ ಮಾಹಿತಿಗಳೂ ಹೊರಬಿದ್ದಿವೆ. ಆದರೆ ತನಿಖಾ ವರದಿಯಲ್ಲೇ ಇವೆಲ್ಲವೂ ಸ್ಪಷ್ಟವಾಗಬೇಕಿದೆ.
ಮಂಗಳೂರು ಪೊಲೀಸರು ಫುಲ್ ಅಲರ್ಟ್ ಆಗಿದ್ದು, ನಿಷೇಧಿತ ಪಿಎಫ್ಐ ಸಂಘಟನೆ ಬೆನ್ನತ್ತಿದ್ದಾರೆ. ಆ ಸಂಘಟನೆಯಲ್ಲಿದ್ದ ಮುಖಂಡರ ಜಾಡು ಹಿಡಿದಿದ್ದಾರೆ. ಮಂಗಳೂರಿನಲ್ಲಿ ಇಲ್ಲದವರ ಬಗ್ಗೆ ಮಾಹಿತಿಯನ್ನೂ ಕಲೆ ಹಾಕುತ್ತಿದ್ದಾರೆ. ಈಗಾಗಲೇ ಸಿಕ್ಕಿಬಿದ್ದಿರುವ ಆರೋಪಿಯನ್ನೂ ಎನ್ಐಎ ಮತ್ತು ಪೊಲೀಸರು ವಿಚಾರಣೆ ನಡೆಸಿ, ಮಾಹಿತಿಗಳನ್ನು ಕಲೆಹಾಕುತ್ತಿದ್ದಾರೆ.
ಇದನ್ನೂ ಓದಿ: Mangalore Blast | ಇಬ್ಬರು ನುರಿತ ಎಫ್ಎಸ್ಎಲ್ ತಜ್ಞರು ಮಂಗಳೂರಿಗೆ; ತನಿಖೆ ಮತ್ತಷ್ಟು ಚುರುಕು