ಬೆಂಗಳೂರು: ಸಪ್ತಕ ಸಂಸ್ಥೆ ವತಿಯಿಂದ ಏ.9ರಂದು ಬೆಳಗ್ಗೆ 10 ಗಂಟೆಗೆ ʼಸ್ವರ ಶೃಂಗಾರ್ʼ ಸಂಗೀತ ಕಛೇರಿಯನ್ನು ನಗರದ ಮಲ್ಲೇಶ್ವರದ ಎಂಎಲ್ಎ ಕಾಲೇಜು ಹತ್ತಿರದ 14ನೇ ಕ್ರಾಸ್‌ನ ಸೇವಾ ಸದನದಲ್ಲಿ ಹಮ್ಮಿಕೊಳ್ಳಲಾಗಿದೆ ಎಂದು ಸಪ್ತಕ (Sapthak Bengaluru) ಸಂಚಾಲಕ ಜಿ.ಎಸ್‌.ಹೆಗಡೆ ತಿಳಿಸಿದ್ದಾರೆ.
ಬೆಂಗಳೂರಿನ ಗಾಯಕಿ ಶ್ರೇಯಾ ವಿ. ಮೂರ್ತಿ, ಶಿವಮೊಗ್ಗದ ತಬಲಾ ವಾದಕ ವಿನಾಯಕ ಸಾಗರ್‌, ಶಿರಸಿಯ ಕಾಗೇರಿಯ ಹಾರ್ಮೋನಿಯಂ ವಾದಕ ವಿನಾಯಕ ಹೆಗ್ಡೆ, ಮುಂಬೈನ ವಯೊಲಿನ್‌ ವಾದಕ ಮಾನಸ್‌ ಕುಮಾರ್‌, ಬೆಂಗಳೂರಿನ ತಬಲಾ ವಾದಕ ರಾಹುಲ್‌ ಪೊಫಲಿ ಅವರು ಸಂಗೀತ ಕಾರ್ಯಕ್ರಮವನ್ನು ನಡೆಸಿಕೊಡಲಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ | Book Award: ಉಮಾಶಂಕರ ಪ್ರತಿಷ್ಠಾನ ಪುಸ್ತಕ ಪ್ರಶಸ್ತಿಗಾಗಿ ಕೃತಿಗಳ ಆಹ್ವಾನ
ಏ.2ರಂದು ಬಸವನಗುಡಿಯಲ್ಲಿ ಛಂದ ಪುಸ್ತಕ ಸಡಗರ
ಬೆಂಗಳೂರು: ʼಛಂದ ಪುಸ್ತಕʼ ಪ್ರಕಾಶನ ಸಂಸ್ಥೆಯಿಂದ (Chanda Pustaka) ಏಪ್ರಿಲ್‌ 2ರಂದು ಬೆಳಗ್ಗೆ 10.30 ಗಂಟೆಗೆ ʼಛಂದ ಪುಸ್ತಕ ಸಡಗರʼವನ್ನು ನಗರದ ಬಸವನಗುಡಿಯ ಬಿ.ಪಿ.ವಾಡಿಯಾ ರಸ್ತೆಯ ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ವರ್ಲ್ಡ್‌ ಕಲ್ಚರ್‌ನ ವಾಡಿಯಾ ಸಭಾಂಗಣದಲ್ಲಿ ಆಯೋಜಿಸಲಾಗಿದೆ. ಕಾರ್ಯಕ್ರಮದಲ್ಲಿ ಛಂದ ಪುಸ್ತಕ ಬಹುಮಾನ-2021 ಪ್ರದಾನ ಹಾಗೂ ಎರಡು ಪುಸ್ತಕ ಬಿಡುಗಡೆ ಮಾಡಲಾಗುತ್ತದೆ.
ಕಾರ್ಯಕ್ರಮದಲ್ಲಿ ಯುವ ಬರಹಗಾರ್ತಿ ಕಾವ್ಯಾ ಕಡಮೆ ರಚನೆಯ ʼಮಾಕೋನ ಏಕಾಂತʼ ಪುಸ್ತಕಕ್ಕೆ ಛಂದ ಪುಸ್ತಕ ಬಹುಮಾನ-2021 ಪ್ರದಾನ ಮಾಡಲಾಗುತ್ತದೆ. ಇದೇ ವೇಳೆ ಯುವ ಬರಹಗಾರ ಶಶಿ ತರೀಕೆರೆ ರಚನೆಯ ʼತಿರಾಮಿಸುʼ ಕಥಾಸಂಕಲನ ಹಾಗೂ ಮರಾಠಿ ಭಾಷೆಯಲ್ಲಿ ಸಚಿನ್‌ ಕುಂಡಲ್‌ಕರ್‌ ರಚಿಸಿರುವ, ಲೇಖಕಿ ಸಪ್ನಾ ಕಟ್ಟಿ ಅವರು ಕನ್ನಡಕ್ಕೆ ಅನುವಾದಿಸಿರುವ ʼಕೋಬಾಲ್ಟ್‌ ಬ್ಲೂʼ ಪುಸ್ತಕ ಬಿಡುಗಡೆ ಮಾಡಲಾಗುತ್ತದೆ.
ಮುಖ್ಯ ಅತಿಥಿಗಳಾಗಿ ಡಾ.ಎಂ.ಎಸ್‌. ಆಶಾದೇವಿ, ಅಲಕ ತೀರ್ಥಹಳ್ಳಿ, ಇಂದ್ರಕುಮಾರ್‌ ಎಚ್‌.ಬಿ ಆಗಮಿಸಲಿದ್ದಾರೆ. ಕಾವ್ಯಾ ಕಡಮೆ, ಶಶಿ ತರೀಕೆರೆ ಹಾಗೂ ಸಪ್ನಾ ಕಟ್ಟಿ ಉಪಸ್ಥಿತರಿರಲಿದ್ದಾರೆ ಎಂದು ಛಂದ ಪುಸ್ತಕ ಪ್ರಕಾಶನದ ವಸುಧೇಂದ್ರ ಅವರು ತಿಳಿಸಿದ್ದಾರೆ.