ಬೆಂಗಳೂರು: ಇಂದಿನಿಂದ ರಾಜ್ಯದಲ್ಲಿ ಮಹಿಳೆಯರಿಗೆ ಸರ್ಕಾರಿ ಬಸ್ಗಳಲ್ಲಿ ಉಚಿತ ಪ್ರಯಾಣ (Free Bus Travel). ಒಂದು ರೂಪಾಯಿ ಖರ್ಚಿಲ್ಲದೆ ಸಂಚಾರ ಮಾಡಬಹುದಾಗಿದೆ. ಕಾಂಗ್ರೆಸ್ನ ಐದು ಗ್ಯಾರಂಟಿ (Congress Guarantee)ಗಳಲ್ಲಿ ಒಂದಾದ ಶಕ್ತಿ ಯೋಜನೆಗೆ ಸಿಎಂ ಸಿದ್ದರಾಮಯ್ಯ ಇಂದು ಚಾಲನೆ ನೀಡಲಿದ್ದಾರೆ. ಈ ಶಕ್ತಿ ಯೋಜನೆ ಫಲಾನುಭವಿಗಳಾದ ಮಹಿಳೆಯರಂತೂ ಫುಲ್ ಖುಷಿಯಾಗಿದ್ದಾರೆ. ಹಾಗೇ, ಪ್ರತಿದಿನ ಮಹಿಳೆಯರ ಉಚಿತ ಪ್ರಯಾಣಕ್ಕೆ ಹೇಗೆ ಟಿಕೆಟ್ ನೀಡಲಾಗುತ್ತದೆ ಎಂಬ ಕುತೂಹಲ, ಪ್ರಶ್ನೆಗೂ ಉತ್ತರ ಸಿಕ್ಕಿದೆ.
ಸಾಮಾನ್ಯವಾಗಿ ಬಸ್ಗಳಲ್ಲೆಲ್ಲ ಈಗ ಎಲೆಕ್ಟ್ರಾನಿಕ್ ಟಿಕೆಟ್ ಯಂತ್ರ (ETM-ಇಟಿಎಂ)ದಿಂದಲೇ ಟಿಕೆಟ್ ನೀಡಲಾಗುತ್ತದೆ. ಇಲ್ಲಿ ನಿರ್ವಾಹಕ ಕೈಯಿಂದ ಬರೆದು ಕೊಡುವ ಪ್ರಮೇಯ ಇರುವುದಿಲ್ಲ. ಈ ವಿದ್ಯುಚ್ಚಾಲಿತ ಟಿಕೆಟ್ ಯಂತ್ರದಿಂದಲೇ ಈಗ ಮಹಿಳೆಯರ ಉಚಿತ ಪ್ರಯಾಣಕ್ಕೂ ಟಿಕೆಟ್ ನೀಡಲಾಗುತ್ತದೆ. ಇಟಿಎಂಗಳಲ್ಲಿ ಈಗಾಗಲೇ Women Ticket ಎಂಬ ಆಯ್ಕೆ ಬಂದಿದೆ. ನಿರ್ವಾಹಕರು ಇನ್ನು ಮುಂದೆ ಮಹಿಳೆಯರಿಗೆ ಟಿಕೆಟ್ ಕೊಡುವಾಗ ಆ Women Ticket ಆಯ್ಕೆಯನ್ನು ಒತ್ತಿ, ಉಳಿದಂತೆ ಅವರು ಹೋಗಬೇಕಾದ ಊರಿನ ಹೆಸರನ್ನು ಸೆಲೆಕ್ಟ್ ಮಾಡಿ, ಕೊನೆಯಲ್ಲಿ Enter ಬಟನ್ ಒತ್ತಿದಾಗ ಟಿಕೆಟ್ ಹೊರಬರುತ್ತದೆ. ಆ ಟಿಕೆಟ್ ಮೇಲೆ ಮಹಿಳೆಯರ ಉಚಿತ ಚೀಟಿ ಎಂದೇ ಬರೆದುಕೊಂಡಿರುತ್ತದೆ. ಅಷ್ಟೇ ಅಲ್ಲ, ಮೊತ್ತದ ಎದುರು ನಿಮಗೆ ಶೂನ್ಯ ಎಂದು ನಮೂದಾಗಿರುತ್ತದೆ.
ಇಟಿಎಂ ಕೆಟ್ಟರೆ ಏನು ಮಾಡ್ಬೇಕು?
ಈಗ ಎಲೆಕ್ಟ್ರಾನಿಕ್ ಟಿಕೆಟ್ ಯಂತ್ರಗಳು ಚಾಲ್ತಿಯಲ್ಲಿ ಬಂದಿದ್ದರೂ ಕೂಡ ಕೆಲವೊಮ್ಮೆ ಅವು ಕೆಟ್ಟು ಹೋದಾಗ ಅಥವಾ ಇನ್ಯಾವುದೋ ಕಾರಣಕ್ಕೆ ಕೆಲವು ಬಸ್ಗಳಲ್ಲಿ ನಿರ್ವಾಹಕರು ಟಿಕೆಟ್ನ್ನು ಕೈಯಲ್ಲಿ ಬರೆದು ಕೊಡುವುದನ್ನು ನೋಡಿದ್ದೀರಿ. ಇನ್ನು ಶಕ್ತಿ ಯೋಜನೆಗಾಗಿಯೂ ಅಂಥ ಮ್ಯಾನ್ಯುವಲ್ ಟಿಕೆಟ್ಗಳನ್ನು ಸಿದ್ಧಪಡಿಸಲಾಗಿದೆ. ಇದನ್ನು ಗುಲಾಬಿ ಬಣ್ಣದಲ್ಲಿ ವಿಶೇಷವಾಗಿ ತಯಾರಿಸಲಾಗಿದೆ. ಅದರ ಮೇಲೆ ಶಕ್ತಿ ಯೋಜನೆಯಡಿ ಮಹಿಳಾ ಉಚಿತ ಟಿಕೆಟ್ ಎಂದು ಬರೆಯಲಾಗಿದ್ದು, ಪ್ರಯಾಣದ ಸ್ಥಳ ಎಲ್ಲಿಂದ..ಎಲ್ಲಿಗೆ ಎಂದು ನಮೂದಿಸಲಾಗಿದೆ. ಅದನ್ನು ತುಂಬಲು ಜಾಗ ಬಿಡಲಾಗಿದೆ. ಅಂದರೆ ನಿರ್ವಾಹಕರು ಪ್ರಯಾಣಿಕಳ ಬಳಿ ಕೇಳಿ, ಸ್ಥಳವನ್ನು ನಮೂದಿಸಿ ಟಿಕೆಟ್ ಕೊಡಬೇಕು. ಅದರ ಮೇಲೆ ಕೂಡ ಶೂನ್ಯ ಮೊತ್ತ ಎಂದು ಬರೆಯಲಾಗಿದೆ.
ಈ ಪಿಂಕ್ ಟಿಕೆಟ್ ಕೆಎಸ್ಆರ್ಟಿಸಿ ಬಸ್ಗಳಲ್ಲಿ ಕೊಡಲಾಗುತ್ತದೆ. ಇನ್ನು ಬಿಎಂಟಿಸಿ ಬಸ್ಗಳಲ್ಲಿ ಬಿಳಿ ಬಣ್ಣದ ಟಿಕೆಟ್ ಮೇಲೆ ಉಚಿತ ಪ್ರಯಾಣ ಎಂದು ಸೀಲ್ ಹಾಕಿ ಕೊಡಲಾಗುತ್ತದೆ. ಇಂದು ಶಕ್ತಿ ಯೋಜನೆಗೆ ಚಾಲನೆ ಸಿಗುತ್ತಿದ್ದಂತೆ, ಕೆಎಸ್ಆರ್ಟಿಸಿ ಬಸ್ನಲ್ಲಿ ಪ್ರಯಾಣ ಮಾಡಲಿರುವ ಮಹಿಳೆಯರಿಗೆ ಇದೇ ಪಿಂಕ್ ಬಣ್ಣದ ಮತ್ತು ಬಿಎಂಟಿಸಿ ಬಸ್ ಹತ್ತುವ ಮಹಿಳೆಯರಿಗೆ ಬಿಳಿ ಬಣ್ಣದ ಟಿಕೆಟ್ ವಿತರಿಸಲಾಗುತ್ತದೆ.