ಬೆಂಗಳೂರು: ಜಗದ ಕವಿ ಕುವೆಂಪು ಹಾಗೂ ವರಕವಿ ದಾ.ರಾ. ಬೇಂದ್ರೆ (Dattatreya Ramachandra Bendre) ಇವರಿಬ್ಬರು ಕನ್ನಡ ಸಾಹಿತ್ಯದ ಎರಡು ಕಣ್ಣುಗಳು ಇದ್ದಂತೆ. ಯಾವುದೇ ತರಹದ ಬೇಸರವಾದಾಗ ನೆನಪಾಗುವುದೇ ಬೇಂದ್ರೆ ಅವರು ಬರೆದ ಸಾಹಿತ್ಯ. ಕಾರಣ ಅದರಲ್ಲಿ ಜೀವನದ ಎಲ್ಲ ಕಾಲಘಟ್ಟಗಳು ಅಡಕವಾಗಿವೆ ಎಂದು ಬೇಂದ್ರೆಯವರ ಜತೆಗಿನ ಒಡನಾಟದ ನೆನಪುಗಳನ್ನು ನಾಡೋಜ. ಡಾ.ಮಹೇಶ ಜೋಶಿ ಹಂಚಿಕೊಂಡರು.
ಬೆಂಗಳೂರಿನ ಚಾಮರಾಜಪೇಟೆಯ ಶ್ರೀ ಕೃಷ್ಣರಾಜ ಪರಿಷತ್ತಿನ ಮಂದಿರದಲ್ಲಿ ವರಕವಿ ಡಾ. ದ.ರಾ.ಬೇಂದ್ರೆ ಅವರ ೧೨೭ನೆಯ ಜನ್ಮದಿನದ ಹಿನ್ನೆಲೆಯಲ್ಲಿ ಇಳಿದು ಬಾ ತಾಯಿ ಇಳಿದು ಬಾ.. ಬೇಂದ್ರೆ ನಮನ ವಿಶೇಷ ಕಾರ್ಯಕ್ರಮದಲ್ಲಿ ಅಧ್ಯಕ್ಷತೆ ವಹಿಸಿ ಮಾತನಾಡಿ, ನಿತ್ಯವೂ ನೂತನವಾಗಿರುವ ಸಾಹಿತ್ಯವನ್ನು ನೀಡಿ ಹೋದ ದತ್ತಾತ್ರೇಯ ರಾಮಚಂದ್ರ ಬೇಂದ್ರೆಯವರ ನೆನಪು ಕನ್ನಡಕ್ಕೆ, ಕನ್ನಡ ನಾಡಿಗೆ ಸದಾ ಚೇತೋಹಾರಿ ಎಂದು ಬಣ್ಣಿಸಿದರು.
ಕಾಲೇಜಿನಲ್ಲಿ ಓದುತ್ತಿದ್ದಾಗಲೇ ಕವಿತೆಗಳನ್ನು ಬರೆಯುತ್ತಿದ್ದ ಬೇಂದ್ರೆಯವರು ೧೯೧೮ರಲ್ಲಿ ಮೊದಲ ಕವನ ಪ್ರಭಾತ ಎಂಬ ಪತ್ರಿಕೆಯಲ್ಲಿ ಪ್ರಕಟವಾಯಿತು. ಅಲ್ಲಿಂದಾಚೆಗೆ ಅವರು ಕಾವ್ಯ ರಚನೆ ಮಾಡುತ್ತಲೇ ಬಂದರು. ಗರಿ, ಕಾಮಕಸ್ತೂರಿ, ಸೂರ್ಯಪಾನ, ನಾದಲೀಲೆ, ನಾಕುತಂತಿ ಮೊದಲಾದ ಕವನ ಸಂಕಲನಗಳನ್ನು ಪ್ರಕಟಿಸಿದರು. ಕವಿತೆಗಳನ್ನಲ್ಲದೆ ನಾಟಕಗಳು, ಸಂಶೋಧನಾತ್ಮಕ ಲೇಖನಗಳು, ವಿಮರ್ಶೆಗಳನ್ನು ಬೇಂದ್ರೆ ಬರೆದು ಕನ್ನಡ ಸಾಹಿತ್ಯ ಲೋಕವನ್ನು ಶ್ರೀಮಂತಗೊಳಿಸಿದರು ಎಂದು ನಾಡೋಜ ಡಾ. ಮಹೇಶ ಜೋಶಿ ನೆನಪಿಸಿಕೊಂಡರು.
ಇದನ್ನೂ ಓದಿ: Child Marriage: ಬಾಲಕಿಯ ವರಸಿದ ಮೂರು ಮಕ್ಕಳ ತಂದೆ; ಪೊಲೀಸ್‌ ಠಾಣೆ ಮೆಟ್ಟಿಲೇರಿದ ಮೊದಲ ಪತ್ನಿ
೧೯೬೮ರಲ್ಲಿ ಭಾರತ ಸರ್ಕಾರದಿಂದ ಪದ್ಮಶ್ರೀ ಪ್ರಶಸ್ತಿ, ೧೯೭೩ರಲ್ಲಿ ನಾಕುತಂತಿ ಕೃತಿಗೆ ಜ್ಞಾನಪೀಠ ಪ್ರಶಸ್ತಿ, ಕಾಶಿ ವಿದ್ಯಾಪೀಠ, ವಾರಾಣಸಿ, ಮೈಸೂರು ಹಾಗೂ ಕರ್ನಾಟಕ ವಿಶ್ವವಿದ್ಯಾನಿಲಯಗಳ ಗೌರವ ಡಾಕ್ಟರೇಟ್, ಕೇಂದ್ರ ಸಾಹಿತ್ಯ ಅಕಾಡೆಮಿಯ ಫೆಲೋಷಿಪ್ ಹೀಗೆ ಬೇಂದ್ರೆಯವರಿಗೆ ದೊರೆತ ಗೌರವಗಳು ಅಸಂಖ್ಯ. ಆದರೆ ಅದೇ ರೀತಿಯಲ್ಲಿ ಬಡತನವನ್ನು ಅನುಭವಿಸಿದ ಅವರ ಪ್ರತಿ ಮಾತುಗಳು ಮೇಲ್ನೊಟಕ್ಕೆ ಹಾಸ್ಯ ಎಂಬಂತೆ ಕಂಡರೂ ಪ್ರತಿ ಕ್ಷಣ ಜೀವನದ ಪಾಠವನ್ನು ಹೇಳುವಂತಿರುತ್ತಿದ್ದವು ಎಂದರು.
ಸಂಸ್ಕೃತಿಯ ಜೀವಂತಿಕೆ ನೀಡಿದವರು ಬೇಂದ್ರೆ
ಬೇಂದ್ರೆಯವರ ಸೃಜನಶೀಲತೆಯ ವಿಶಿಷ್ಠೆತೆಯ ಕುರಿತು ಬೆಂಗಳೂರು ವಿ.ವಿ. ಕನ್ನಡ ಅಧ್ಯಯನ ಕೇಂದ್ರದ ನಿಕಟಪೂರ್ವ ನಿರ್ದೇಶಕರಾದ ಡಾ. ಬಸವರಾಜ ಕಲ್ಗುಡಿ ಮಾತನಾಡಿ, ಕನ್ನಡಕ್ಕೆ ಸಾಹಿತ್ಯಕ ಹಾಗೂ ಸಂಸ್ಕೃತಿಯ ಜೀವಂತಿಕೆ ನೀಡಿದ ಅಪರೂಪದ ಕವಿ ಆಗಿದ್ದರು. ಬೇಂದ್ರೆ ಅವರು ಸಂಖ್ಯಾಶಾಸ್ತ್ರವನ್ನು ಇಟ್ಟುಕೊಂಡು ಕವನಗಳನ್ನು ಬರೆದರು. ಅವರು ಬರೆದ ನಾಲ್ಕುತಂತಿ ಎನ್ನುವ ಕವನದ ಆತ್ಯಂತಿಕ ಅರ್ಥವನ್ನು ಇನ್ನೂ ಸರಿಯಾಗಿ ವಿಮರ್ಶಕರು ಅರ್ಥ ಮಾಡಿಕೊಳ್ಳುವುದಕ್ಕೆ ಕಷ್ಟವಾಗುತ್ತಿದೆ. ಬೇಂದ್ರೆಯವರು ಬರೆದ ಭಾವಗೀತೆಯಲ್ಲಿಯೂ ಓಂಕಾರ ಶಂಖನಾದಕ್ಕಿಂತ ಕಿಂಚಿದೂನ ಎನ್ನುವಂತೆ ಹೇಳುತ್ತ ಬದುಕಿನ ಪರಮಾರ್ಥವನ್ನು ನೀಡಿದ್ದಾರೆ. ಬೇಂದ್ರೆ ಅವರ ಸಾಹಿತ್ಯದಲ್ಲಿ ವ್ಯಕ್ತಿ ವಿಶಿಷ್ಟತೆಗಳನ್ನು ಹುಡುಕಾಟದ ಬದಲು ಜೀವನ ಸೃಜನಶೀಲತೆ ಹುಡುಕಾಟ ದಾರಿಯಾಗಿತ್ತು. ಸಮರಸದ ರಸ ಭಾವವನ್ನು ಸಂಸ್ಕೃತಿಯೊಂದಿಗೆ ನಮ್ಮ ಭಾಷೆಗೆ ತಾಯ್ತನದ ಗುಣವಿದೆ ಎಂದು ಬಣ್ಣಿಸಿದರು.
ಮಹಾನ್ ಅಂತಃಕರಣವಾದಿ
ಬಳಿಕ ಮಾತನಾಡಿದ ಹಿರಿಯ ಕವಿಯತ್ರಿ ಪ್ರೊ.ಎಂ.ಆರ್. ಕಮಲಾ, ಬೇಂದ್ರೆಯವರು ಹೇಳಿದಂತೆ ಅಂತಃಕರಣ ಅಂದರೆ ಮೈ ಮ್ಯಾಲಿನ ಒಡವೆನೂ ಅಲ್ಲ, ವಸ್ತುವೂ ಅಲ್ಲ, ಅದು ಒಳಗಿನ ಇಂದ್ರಿಯ, ಅದು ತಾಯಿಗೆ ಮಾತ್ರ ಅರ್ಥವಾಗುವ ಪರಿ ಎಂದು ಬಣ್ಣಿಸುತ್ತಾರೆ. ಅವರು ಬರವಣಿಗೆಯಲ್ಲಿ ಅಂತಃಕರಣ ಇರುವುದು ನಾವೆಲ್ಲ ಕಂಡಿದ್ದೇವೆ. ಆದರೆ, ಅವರೊಳಗೆ ಇದ್ದ ಅಂತಃಕರಣದ ರೂಪವೇ ಅವರು ಬರೆದ ಕವನಗಳಲ್ಲಿ ತುಂಬು ತುಳುಕುವ ಭಾವ ಕಾಣುವುದಕ್ಕೆ ಸಾಧ್ಯವಾಗಿದೆ.
೨೦ನೇ ಶತಮಾನದಲ್ಲಿ ಗಂಡು ಹೆಣ್ಣನ್ನು ಸಮಾನ ನೆಲೆಯಲ್ಲಿ ನಿಲ್ಲಿಸಿ ಸಮಾನತೆಯನ್ನು ತರುವುದರಲ್ಲಿ ಅವರು ಬರೆದ ಕವನ ಅಂತಃಕರಣದ ಪ್ರತಿರೂಪ. ʻಬಿತ್ತಿದರೆ ಕಾಳು ಹನಿ ಹನಿಯಾಗಿ.. ತಾಯಿ ಬರ್ತಾಳ ತೆನಿ ತೆನಿಯಾಗಿʼ ಎಂದು ಹೇಳುವಾಗಲೂ ಬೇಂದ್ರೆಯವರಲ್ಲಿ ಪ್ರಕೃತಿಯ ಬಗ್ಗೆ ಅಡಗಿದ್ದ ಅಂತಃಕರಣ ಎದ್ದು ಕಾಣುತ್ತದೆ ಎಂದರು. ʻಒಲವುʼ ಎನ್ನುವ ಶಬ್ಧಕ್ಕೆ ಬೇಂದ್ರೆ ಅವರು ಸಾಕಷ್ಟು ಅರ್ಥವನ್ನು ಇಟ್ಟುಕೊಂಡು ಸಾಹಿತ್ಯವನ್ನು ಕನ್ನಡಕ್ಕೆ ನೀಡಿದವರು ಮಹಾನ್ ಅಂತಃಕರಣವಾದಿ ಎಂದು ಬಣ್ಣಿಸಿದರು.
ಇದನ್ನೂ ಓದಿ: Murder Case: ಮಂಗಳೂರು ಜ್ಯುವೆಲ್ಲರಿಗೆ ನುಗ್ಗಿ ನೌಕರನಿಗೆ ಚಾಕು ಇರಿದು ಕೊಂದ ಮುಸುಕುಧಾರಿ
ಕಾರ್ಯಕ್ರಮದಲ್ಲಿ ಬೇಂದ್ರೆಯವರ ಕಾವ್ಯಗಳ ಗಾಯನವನ್ನು ಸ್ಮಿತಾ ಕಾರ್ತಿಕ್ ಹಾಗೂ ಅವರ ಸಂಗಡಿಗರು ಅರ್ಥಪೂರ್ಣವಾಗಿ ಪ್ರಸ್ತುತಪಡಿಸಿದರು. ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿಗಳಾದ ನೇ.ಭ.ರಾಮಲಿಂಗ ಶೆಟ್ಟಿ ಅವರು ಸ್ವಾಗತಿಸಿದರು. ಡಾ, ಪದ್ಮಿನಿ ನಾಗರಾಜು ಅವರು ವಂದಿಸಿದರು, ಗೌರವ ಕೋಶಾಧ್ಯಕ್ಷರಾದ ಡಾ. ಬಿ.ಎಂ.ಪಟೇಲ್ ಪಾಂಡು ಕಾರ್ಯಕ್ರಮ ನಿರೂಪಿಸಿದರು.