ಕಾರವಾರ: ಕಾರವಾರ ತಾಲೂಕಿನ ಕದ್ರಾ ಅರಣ್ಯ ವಲಯದ ವಿರ್ಜೆ ಬೀಟ್‌ನ ಅರಣ್ಯ ವೀಕ್ಷಕ ಬಿಲಾಲ್ ಶೇಖ್ ಎಂಬುವವರು ಗಾಯಗೊಂಡಿದ್ದ ಹಾರುವ ಅಳಿಲನ್ನು (Flying Squirrel ) ರಕ್ಷಿಸಿ ಅದಕ್ಕೆ ಸೂಕ್ತ ಚಿಕಿತ್ಸೆ ನೀಡಿ ಪುನಃ ಕಾಡಿಗೆ ಬಿಟ್ಟಿದ್ದಾರೆ.
ಈ ಅಳಿಲು ಮರದಿಂದ ಮರಕ್ಕೆ ಹಾರುವ ವೇಳೆ ಆಕಸ್ಮಿಕವಾಗಿ ರೆಂಬೆಗಳಿಗೆ ತಾಗಿ ಗಾಯಗೊಂಡು ಮಲ್ಲಾಪುರ ಟೌನ್‌ಶಿಪ್‌ನ ಎನ್‌ಪಿಸಿಐಎಲ್ ಸಿಬ್ಬಂದಿಯೊಬ್ಬರ ಮನೆಯ ಟೆರೇಸ್ ಮೇಲೆ ಬಿದ್ದಿತ್ತು. ಇದರ ಬಗ್ಗೆ ಎಲ್ಲೆಡೆ ಸುದ್ದಿಯೂ ಆಗಿತ್ತು.
ಈ ಬಗ್ಗೆ ಸ್ಥಳೀಯರು ಅರಣ್ಯ ರಕ್ಷಕ ನಾಗರಾಜ್ ಅವರಿಗೆ ಕರೆ ಮಾಡಿ ತಿಳಿಸಿದ್ದರು. ನಾಗರಾಜ್ ಅವರು ಬಿಲಾಲ್ ಅವರಿಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕೆ ತೆರಳಿದ ಬಿಲಾಲ್, ಹಾರುವ ಅಳಿಲಿಗೆ ಅಗತ್ಯ ಚಿಕಿತ್ಸೆ ಕೊಡಿಸಿ, ವಲಯ ಅರಣ್ಯ ಅಧಿಕಾರಿ ಲೋಕೇಶ್ ಪಾಟಣಕರ್ ಅವರ ಮಾರ್ಗದರ್ಶನದಲ್ಲಿ ಪುನಃ ಕಾಡಿಗೆ ಬಿಟ್ಟಿದ್ದಾರೆ.
ಹಾರುವ ಅಳಿಲುಗಳು ಸಂಪೂರ್ಣವಾಗಿ ನಿಶಾಚರಿಯಾಗಿದ್ದು, ಹಗಲಿನಲ್ಲಿ ಗೊಚರಿಸುವುದು ತುಂಬಾ ವಿರಳವಾಗಿದೆ. ಈ ಅಳಿಲು ಗಾಯಗೊಂಡಿದ್ದ ಪರಿಣಾಮ ಹಾರಲಾಗದೇ ಮನೆಯ ಬಳಿ ಬಿದ್ದಿರಬಹುದೆಂದು ಎಂದು ಪಶು ವೈದ್ಯರು ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ | Tamanna Bhatia | ಡೇಟಿಂಗ್‌ ಸುದ್ದಿ ಬೆನ್ನಲೇ ಮಾಲಿವುಡ್‌ಗೆ ಎಂಟ್ರಿ ಕೊಟ್ಟ ಮಿಲ್ಕಿ ಬ್ಯೂಟಿ ತಮನ್ನಾ?
ಹಾರುವ ಅಳಿಲುಗಳನ್ನು ಸ್ಥಳೀಯವಾಗಿ ಹಾರುವ ಬೆಕ್ಕು ಎಂದು ಸಹ ಕರೆಯಲಾಗುತ್ತದೆ. ವೈಜ್ಞಾನಿಕವಾಗಿ ಪೆಟೌರಿಸ್ಟಾ ಫಿಲಿಪೆನ್ಸಿಸ್(Petaurista philippensis) ಎಂದು ಕರೆಯಲ್ಪಡುವ ಈ ಅಳಿಲುಗಳು ವಾಸ್ತವವಾಗಿ ಪಕ್ಷಿಗಳ ರೀತಿ ಸಂಪೂರ್ಣವಾಗಿ ಹಾರುವ ಸಾಮರ್ಥ್ಯವನ್ನು ಹೊಂದಿಲ್ಲ. ಆದರೆ ಅವುಗಳು ತಮ್ಮ ವಿಶಿಷ್ಟ ರೀತಿಯ ಚರ್ಮದ ರಚನೆಯಿಂದಾಗಿ ಅದನ್ನು ರೆಕ್ಕೆಯಂತೆ ಅಗಲವಾಗಿಸಿಕೊಂಡು ಒಂದು ಮರದಿಂದ ಇನ್ನೊಂದು ಮರಕ್ಕೆ ಜಿಗಿಯುತ್ತವೆ. ಜತೆಗೆ ಕೈ ಕಾಲು ಮತ್ತು ಬಾಲದ ಸಹಾಯದಿಂದ ಹಾರುವ ದಿಕ್ಕನ್ನು ನಿಯಂತ್ರಿಸುತ್ತವೆ. ಇದು ದೂರದಿಂದ ನೋಡಿದಾಗ ಅಳಿಲು ಹಾರುತ್ತಿರುವಂತೆ ಕಾಣುತ್ತದೆ.
ಇದನ್ನೂ ಓದಿ | Sikh Helmet | ಮಕ್ಕಳಿಗಾಗಿ ವಿಶೇಷ ಹೆಲ್ಮೆಟ್‌ ತಯಾರಿಸಿದ ತಾಯಿ! ಈ ಹೆಲ್ಮೆಟ್‌ಗೀಗ ಎಲ್ಲಿಲ್ಲದ ಬೇಡಿಕೆ
ಪಶ್ಚಿಮ ಘಟ್ಟಗಳಲ್ಲಿ ಭಾರತೀಯ ದೈತ್ಯ ಹಾರುವ ಅಳಿಲು (Indian Giant Flying Squirrel) ಎಂದು ಗುರುತಿಸಲಾಗಿರುವ ಈ ಜೀವಿಯು ಈ ಭಾಗದಲ್ಲಿ ಇರುವ ಅತ್ಯಂತ ಚಿಕ್ಕ ಹಾರುವ ಅಳಿಲುಗಳ ಪೈಕಿ ಒಂದು ಎಂದು ಹೇಳಲಾಗುತ್ತದೆ. ಈ ಅಳಿಲು 32 ಸೆಂ.ಮೀ ಉದ್ದವಿದ್ದು, ಇದು ದಕ್ಷಿಣ ಭಾರತದಲ್ಲಿ ಕಂಡುಬರುವ ವಿಶಿಷ್ಟ ಜಾತಿಯ ತಳಿಯಾಗಿದೆ. ಹಾರುವ ಅಳಿಲುಗಳ ಪೈಕಿ ಕರ್ನಾಟಕದಲ್ಲಿ ಎರಡು ವಿಧದ ತಳಿಗಳಿವೆ. ಈ ಪೈಕಿ ಒಂದು ಟ್ರಾವಂಕೂರ್ ಹಾರುವ ಅಳಿಲು (Tranvancore Flying Squirrel) ಎಂದು ಗುರುತಿಸಿಕೊಂಡಿದ್ದರೆ, ಇನ್ನೊಂದು ಭಾರತೀಯ ದೈತ್ಯ ಹಾರುವ ಅಳಿಲು (Indian Giant Flying Squirrel) ಎಂದು ಕರೆಸಿಕೊಂಡಿದೆ. ಅಳಿವಿನ ಅಂಚಿನಲ್ಲಿರುವ ಈ ಟ್ರಾವಂಕೂರ್ ಹಾರುವ ಅಳಿಲು ದಕ್ಷಿಣ ಕನ್ನಡದ ಸುಳ್ಯ ಹಾಗೂ ಕೇರಳದ ಪಶ್ಚಿಮ ಘಟ್ಟಗಳಲ್ಲಿ ಕಂಡುಬರುತ್ತವೆ.
ಇದನ್ನೂ ಓದಿ | IndiGo Flight | ಇಂಡಿಗೋ ಫ್ಲೈಟ್‌ನಲ್ಲಿ ಕುಡಿದು, ಪರಸ್ಪರ ಜಗಳವಾಡಿದ ಇಬ್ಬರು ಪ್ರಯಾಣಿಕರು