ಹಾಸನ: ಹದಿಹರೆಯದಲ್ಲಿ ಪ್ರೇಮಪಾಶದಲ್ಲಿ ಬಿದ್ದಿದ್ದ ಬಾಲಕಿಯೊಬ್ಬಳು ತನ್ನ ಪ್ರಿಯಕರನ ಅನುಮಾನದ ಕಾಟ (Love Torture) ತಾಳಲಾರದೆ, ಮನೆಯಲ್ಲಿಯೂ ವಿಚಾರ ತಿಳಿದಿದ್ದರಿಂದ ಮನನೊಂದು ವಿಷ ಸೇವಿಸಿದ್ದ ಪ್ರಕರಣದಲ್ಲಿ ಚಿಕಿತ್ಸೆ ಫಲಿಸದೆ ಶುಕ್ರವಾರ ಮೃತಪಟ್ಟಿದ್ದಾಳೆ. ಈ ಹಿನ್ನೆಲೆಯಲ್ಲಿ ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ ಕೇಸ್‌ನಲ್ಲಿ ಪ್ರಿಯಕರನನ್ನು ಪೊಲೀಸರು ಬಂಧಿಸಿದ್ದಾರೆ.
ಸಕಲೇಶಪುರ ತಾಲೂಕಿನ ಯಸಳೂರು ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಈ ಪ್ರಕರಣ ನಡೆದಿದೆ. ಹದಿಹರೆಯದ ಪ್ರೇಮಕ್ಕೆ ಅಪ್ರಾಪ್ತ ವಯಸ್ಸಿನ ಬಾಲಕಿಯೊಬ್ಬಳು ಬಲಿಯಾದಂತೆ ಆಗಿದೆ. ಲೋಕೇಶ್ ಬಂಧಿತ ಆರೋಪಿಯಾಗಿದ್ದಾನೆ.
ಈಕೆಯನ್ನು ಪ್ರೀತಿಯ ಬಲೆಯಲ್ಲಿ ಬೀಳಿಸಿಕೊಂಡಿದ್ದ ಲೋಕೇಶ್, ಪ್ರತಿ ದಿನ ಭೇಟಿ ಮಾಡುತ್ತಿದ್ದ. ಹೀಗೇ ಒಂದು ದಿನ ಮತ್ತೊಬ್ಬ ಸ್ನೇಹಿತನೊಂದಿಗೆ ಬಾಲಕಿ ಓಡಾಟ ನಡೆಸಿದ್ದು ಕಂಡು ಲೋಕೇಶ್ ಸಿಟ್ಟಾಗಿದ್ದ. ಮಂಗಳವಾರ ತನ್ನ ಪ್ರಿಯತಮೆ ಇನ್ನೊಬ್ಬನೊಂದಿಗೆ ಬೈಕ್‌ನಲ್ಲಿ ಜಾಲಿ ರೈಡ್ ಹೋಗಿದ್ದನ್ನು ಲೋಕೇಶ್ ಕಂಡಿದ್ದಾನೆ. ಬೈಕ್‌ನಲ್ಲಿ ಹೋದವನೂ ಸಹ ಅಪ್ರಾಪ್ತ ವಯಸ್ಸಿನ ಬಾಲಕನಾಗಿದ್ದಾನೆ ಎಂಬ ವಿಚಾರ ತಿಳಿದುಬಂದಿದೆ.
ಇದರಿಂದ ಲೋಕೇಶ್ ವಿಪರೀತವಾಗಿ ಕೋಪಗೊಂಡಿದ್ದ. ಹೀಗಾಗಿ ಬಾಲಕಿಯನ್ನು ಅಡ್ಡ ಹಾಕಿ ಈ ಬಗ್ಗೆ ಪ್ರಶ್ನೆ ಮಾಡಿದ್ದ. ಆಕೆ ಏನೇ ಸಮಜಾಯಿಷಿ ಕೊಟ್ಟರೂ ಲೋಕೇಶ್ ಮನಸ್ಸು ತಣ್ಣಗಾಗಲಿಲ್ಲ. ವಿಪರೀತವಾಗಿ ಜಗಳ ಮಾಡಿದ್ದ. ಬಾಲಕಿ ಮೇಲೆ ಪದೇ ಪದೆ ಅನುಮಾನಗೊಳ್ಳುತ್ತಿದ್ದ. ಇನ್ನು ಈ ಬಾಲಕಿ ಜಾಲಿ ರೈಡ್ ವಿಷಯ ಮನೆಯವರಿಗೂ ಗೊತ್ತಾಗಿದೆ. ಇದೇ ಕಾರಣದಿಂದ ಪೋಷಕರು ಬಾಲಕಿಗೆ ಬುದ್ಧಿ ಮಾತನ್ನೂ ಹೇಳಿದ್ದಾರೆ. ಇದರಿಂದ ಮನನೊಂದ ಬಾಲಕಿಯು ಬುಧವಾರ ವಿಷ ಕುಡಿದಿದ್ದಾಳೆ.
ಇದನ್ನೂ ಓದಿ: BSF Recruitment 2023: ಬಿಎಸ್‌ಎಫ್‌ನ 1410 ಕಾನ್ಸ್‌ಟೇಬಲ್ ಹುದ್ದೆಗಳಿಗೆ ಅರ್ಜಿ ಆಹ್ವಾನ
ತೀವ್ರ ಅಸ್ವಸ್ಥಗೊಂಡಿದ್ದ ಬಾಲಕಿಯನ್ನು ಹಾಸನದ ಜಿಲ್ಲಾಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗುತ್ತಿತ್ತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಶುಕ್ರವಾರ ಮೃತಪಟ್ಟಿದ್ದಾಳೆ. ಲೋಕೇಶ್ ವಿರುದ್ಧ ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ ಆರೋಪದಡಿ ಯಳಸೂರು ಪೊಲೀಸರು ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ. ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.