ಬೆಳಗಾವಿ: ಭಾರತದ ಕ್ರಿಕೆಟ್‌ ದೇವರು, ಮಾಸ್ಟರ್‌ ಬ್ಲಾಸ್ಟರ್ ಖ್ಯಾತಿಯ ಸಚಿನ್ ತೆಂಡೂಲ್ಕರ್ (Sachin Tendulkar) ಅವರು ಬೆಳಗಾವಿಯ ರಸ್ತೆ ಬದಿಯ ಹೋಟೆಲೊಂದರಲ್ಲಿ ಚಹಾ ಸೇವಿಸಿ ಸಂಭ್ರಮಿಸಿದ್ದಾರೆ. ಬೆಳಗಾವಿ ತಾಲೂಕಿನ ಮಚ್ಚೆಯಲ್ಲಿರುವ ಫೌಜಿ ಟೀ ಸ್ಟಾಲ್‌ನಲ್ಲಿ ಚಹಾ ಸೇವನೆ ಮಾಡಿದ್ದು, ಅದರ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.
ರಾಷ್ಟ್ರೀಯ ಹೆದ್ದಾರಿ ‘4ಎ’ ಪಕ್ಕದಲ್ಲಿರುವ ವೈಜು ನಿಟ್ಟೂರ್‌ಕರ್‌ ಎಂಬುವರ ಹೋಟೆಲ್‌ನಲ್ಲಿ ಅವರ ಮುಂದೆ ಸಚಿನ್ ತೆಂಡೂಲ್ಕರ್ ಅವರು ಕಾರು ನಿಲ್ಲಿಸಿದ್ದಾರೆ. ಜತೆಗಿದ್ದ ಕಾರಿನಿಂದ ಇಳಿದ ಅಂಗರಕ್ಷಕರು ಸಚಿನ್ ಹೋಟೆಲ್‌ಗೆ ಬಂದು ಚಹಾ ಆರ್ಡರ್‌ ಮಾಡಿದ್ದರು. ಚಹಾ ಕುಡಿದ ಸಚಿನ್ ಅವರು ಕಾರಿನಿಂದ ಇಳಿದು ಬಂದು ಚಹಾ ಮಾಡಿದ ಹೋಟೆಲ್ ಮಾಲೀಕರಿಗೆ ಧನ್ಯವಾದ ತಿಳಿಸಿದ್ದಾರೆ. ಈ ವೇಳೆ ಅವರಿಗೆ ಕಾರಿನಲ್ಲಿ ಇದ್ದದ್ದು ಸಚಿನ್ ಅವರೆಂಬುದು ಗೊತ್ತಾಗಿದೆ.
ಸಚಿನ್ ಅವರು ಹೋಟೆಲ್ ಮಾಲೀಕ ವೈಜು ಅವರಿಗೆ ಸೆಲ್ಫಿ ನೀಡುವ ಜತೆಗೆ ಆಟೋಗ್ರಾಫ್‌ ಕೂಡ ಕೊಟ್ಟಿದ್ದಾರೆ. ಅಂತೆಯೆ ಹೋಟೆಲ್‌ನಲ್ಲಿದ್ದ ಮಗುವೊಂದರ ಜತೆಯೂ ಫೋಟೋ ತೆಗೆಸಿಕೊಂಡಿದ್ದಾರೆ. ಸಚಿನ್ ಅವರು ಅಲ್ಲಿಂದ ಗೋವಾ ಕಡೆಗೆ ಪ್ರಯಾಣ ಬೆಳೆಸಿದರು ಎನ್ನಲಾಗಿದೆ.