ಸಾಗರ: ಪೊಲೀಸರೆಂದರೆ ಹಾಗೇ, ನಿರಂತರ ಕೆಲಸ. ವಾರದ ಏಳೂ ದಿನವೂ ಸೇವೆ, ರಜೆ ಸಿಕ್ಕರಾಯಿತು. ಇಲ್ಲದಿದ್ದರೆ ಇಲ್ಲ ಎನ್ನುವಂತಹ ನೌಕರಿ. ಇಲ್ಲಿ ಕೆಲಸ ಮಾಡುವವರು ಕುಟುಂಬದವರಿಗಿಂತ ಹಾಗೂ ತಮ್ಮ ವೈಯಕ್ತಿಕ ಜೀವನಕ್ಕಿಂತ ಹೆಚ್ಚಾಗಿ ಸಾರ್ವಜನಿಕ ಜೀವನಕ್ಕಾಗಿ ಹೆಚ್ಚಿನ ಸಮಯವನ್ನು ಮುಡಿಪಾಗಿಡಬೇಕು. ಇಂತಹ ಜಂಜಾಟಗಳ ಮಧ್ಯೆ ಶಿವವೊಗ್ಗ ಜಿಲ್ಲೆಯ ಸಾಗರದ ಪೊಲೀಸ್ ಠಾಣೆಯಲ್ಲಿ ಕಾನ್ಸ್ಟೇಬಲ್ ಒಬ್ಬರಿಗೆ ಅದೇ ಠಾಣೆಯ ಸಿಬ್ಬಂದಿ ಸೀಮಂತ ಕಾರ್ಯಕ್ರಮವನ್ನು ನೆರವೇರಿಸಿದ್ದಾರೆ.
ಕಾನ್ಸ್ಟೇಬಲ್ ಶಿಲ್ಪಾ ಎಂಬುವವರಿಗೆ ಅದೇ ಠಾಣೆಯ ಪೊಲೀಸ್ ನಿರೀಕ್ಷಕ ಸೀತಾರಾಂ ಮತ್ತು ಠಾಣೆಯ ಇತರ ಅಧಿಕಾರಿ, ಸಿಬ್ಬಂದಿಯು ಸಾಂಪ್ರದಾಯಿಕವಾಗಿ ಸೀಮಂತ ಕಾರ್ಯಕ್ರಮವನ್ನು ಸೋಮವಾರ (ಡಿ.೧೨) ನೆರವೇರಿಸಿದರು.
ಸಿಹಿ ತಿಂಡಿಗಳು ಸೇರಿದಂತೆ ವಿವಿಧ ಉಡುಗೊರೆ ಕೊಟ್ಟು ಸಹೋದ್ಯೋಗಿಗೆ ಶುಭ ಹಾರೈಸಿ, ಉಡಿ ತುಂಬಿ ಕಳುಹಿಸಿಕೊಟ್ಟರು. ಸದಾ ಜಂಜಾಟ, ಬಂದೋಬಸ್ತ್, ಓಡಾಟದಲ್ಲೇ ಮುಳುಗಿರುವ ಪೊಲೀಸರ ಈ ಕಾರ್ಯಕ್ಕೆ ಸಾರ್ವಜನಿಕರಿಂದ ಮೆಚ್ಚುಗೆ ವ್ಯಕ್ತವಾಗಿದ್ದರೆ, ಶಿಲ್ಪಾ ಸಹ ಸಹೋದ್ಯೋಗಿಗಳ ಪ್ರೀತಿಗೆ ಸಂತಸಗೊಂಡಿದ್ದಾರೆ.
ಇದನ್ನೂ ಓದಿ | Sabarimala yatre | ಮೈಸೂರಿನಿಂದ ತೆರಳಿದ ಅಯ್ಯಪ್ಪ ಭಕ್ತರ ಮೇಲೆ ಹಲ್ಲೆ: ತಪ್ಪಿಲ್ಲದಿದ್ದರೂ ಹೊಡೆದು ಕೊನೆಗೆ ಕ್ಷಮೆ ಯಾಚನೆ