ಬೆಂಗಳೂರಿನ ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (HAL) ಏರ್ಪೋರ್ಟ್ನಲ್ಲಿ ದೊಡ್ಡಮಟ್ಟದ ವಿಮಾನ ದುರಂತವೊಂದು ಸ್ವಲ್ಪದರಲ್ಲೇ ತಪ್ಪಿದೆ. ಎಚ್ಎಎಲ್ನಿಂದ ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಹೊರಟಿದ್ದ VT-KBN ಎಂಬ ಪ್ರೀಮಿಯರ್ ಎ1 ವಿಮಾನವೊಂದು ವಾಪಸ್ ಎಚ್ಎಲ್ ಏರ್ಪೋರ್ಟ್ಗೇ ಬಂದು ಭಯಾನಕ ರೀತಿಯಲ್ಲಿ ಲ್ಯಾಂಡಿಂಗ್ (Aircraft Emergency Landing) ಆಗಿದೆ. ವಿಮಾನದ ಮೂಗಿನ ಭಾಗದಲ್ಲಿ (ಮುಂಭಾಗ) ತಾಂತ್ರಿಕ ದೋಷ ಕಾಣಿಸಿಕೊಂಡಿದ್ದರಿಂದ ಅಪಘಾತವಾಗಿದೆ.
ಎಚ್ಎಲ್ಎನ್ನ ರನ್ವೇ ಮೇಲೆ ಸ್ವಲ್ಪದೂರ ಚಲಿಸಿದ ವಿಮಾನದ ಮುಂದಿನ ಭಾಗ ಅಪ್ಪಳಿಸಿದೆ. ಅಲ್ಲಿ ಮಳೆನೀರು ಕೂಡ ನಿಂತಿತ್ತು. ಲ್ಯಾಂಡ್ ಆದ ರೀತಿ ನೋಡಿದರೆ, ವಿಮಾನ ರನ್ವೇದಲ್ಲಿ ಮಗುಚಿಬೀಳುತ್ತದೆ ಎಂದೇ ಭಾವಿಸಲಾಗಿತ್ತು. ಅಂಥದ್ದೇನೂ ಆಗದೆ, ಅಂತಿಮವಾಗಿ ಸುರಕ್ಷಿತ ಲ್ಯಾಂಡ್ ಆಗಿದೆ. ಪೈಲಟ್ಗಳು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಈ ವಿಡಿಯೊ ವೈರಲ್ ಆಗಿದೆ.
ಈ VT-KBN ವಿಮಾನದಲ್ಲಿ ಪ್ರಯಾಣಿಕರು ಇರಲಿಲ್ಲ. ಇಬ್ಬರು ಪೈಲೆಟ್ಗಳು ಇದ್ದರು. ಅಂತಿಮವಾಗಿ ವಿಮಾನದ ಮುಂದಿನ ಚಕ್ರ ರನ್ವೇಗೆ ಅಪ್ಪಳಿಸಿದ ರೀತಿಯಲ್ಲಿ ಲ್ಯಾಂಡ್ ಆಗಿದೆ. ವಿಮಾನ ಎಚ್ಎಎಲ್ನಿಂದ ಹೊರಟ ಕೆಲವೇ ಕ್ಷಣದಲ್ಲಿ ಅದರಲ್ಲಿ ತಾಂತ್ರಿಕ ದೋಷ ಕಾಣಿಸಿದೆ. ಕೂಡಲೇ ವಿಮಾನವನ್ನು ಪೈಲೆಟ್ಗಳು ವಾಪಸ್ ಎಚ್ಎಎಲ್ಗೆ ತಂದು ಸುರಕ್ಷಿತವಾಗಿ ಲ್ಯಾಂಡ್ ಮಾಡಿಸಿದ್ದಾರೆ. ಈ ವಿಮಾನ ಸೇಫ್ ಆಗಿ ಲ್ಯಾಂಡ್ ಆಗುತ್ತದೆ ಎಂದು ಯಾರೂ ಅಂದುಕೊಂಡಿರಲಿಲ್ಲ. ಇನ್ನು ಎಚ್ಎಎಲ್ ಏರ್ಪೋರ್ಟ್ನಲ್ಲಿ ಆಗಬಹುದಾದ ಅವಘಡವನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ಎಲ್ಲ ವ್ಯವಸ್ಥೆ ಮಾಡಿಕೊಳ್ಳಲಾಗಿತ್ತು. ಹೆಚ್ಚಿನ ರಕ್ಷಣಾ ಸಿಬ್ಬಂದಿ ನಿಯೋಜನೆಗೊಂಡಿದ್ದರು.
