ಲಖನೌ: 2005ರಲ್ಲಿ ನಡೆದಿದ್ದ ಬಹುಜನ ಸಮಾಜ ಪಾರ್ಟಿ ಶಾಸಕ ರಾಜು ಪಾಲ್ ಹತ್ಯೆ ಕೇಸ್ನ ಪ್ರಮುಖ ಸಾಕ್ಷಿಯಾಗಿದ್ದ ಉಮೇಶ್ ಪಾಲ್ ಹತ್ಯೆಯ ಬೆನ್ನಲ್ಲೇ, ಗ್ಯಾಂಗ್ಸ್ಟರ್, ಮಾಜಿ ರಾಜಕಾರಣಿ ಅತೀಕ್ ಅಹ್ಮದ್ ಮತ್ತು ಆತನ ಬೆಂಬಲಿಗರ ವಿರುದ್ಧ ಸರ್ಕಾರ ಕಠಿಣ ಕ್ರಮ ಕೈಗೊಳ್ಳುತ್ತಿದೆ. ರಾಜುಪಾಲ್ ಹತ್ಯೆ ಕೇಸ್ನಲ್ಲೇ ಆತೀಕ್ ಮತ್ತು ಆತನ ತಮ್ಮ ಅಶ್ರಾಫ್ ಇಬ್ಬರೂ ಜೈಲುಪಾಲಾಗಿದ್ದಾರೆ. ಆದರೆ ಉಮೇಶ್ ಪಾಲ್ ಪ್ರಮುಖ ಸಾಕ್ಷಿಯಾಗಿದ್ದರಿಂದ ಇವರ ಬೆಂಬಲಿಗರೇ ಹತ್ಯೆ ಮಾಡಿದ್ದಾರೆಂದು ಹೇಳಲಾಗಿದೆ.
ಉಮೇಶ್ ಪಾಲ್ ಹಂತಕ ಅರ್ಬಾಜ್ ಖಾನ್ನನ್ನು ಈಗಾಗಲೇ ಯುಪಿ ಪೊಲೀಸರು ಎನ್ಕೌಂಟರ್ ಮಾಡಿದ್ದಾರೆ. ಅಷ್ಟೇ ಅಲ್ಲ, ಆತಿಕ್ ಸಂಬಂಧಿಕರ ಮನೆಯನ್ನು ಜೆಸಿಬಿ ಮೂಲಕ ಧ್ವಂಸ ಮಾಡಲಾಗಿದೆ. ಅಷ್ಟೇ ಅಲ್ಲ ಆತಿಕ್ ಅಹ್ಮದ್ ಇಡೀ ಕುಟುಂಬದ ಮೇಲೆ ಪೊಲೀಸ್ ಕಣ್ಗಾವಲು ಇದೆ. ಆತನ ಪತ್ನಿ ಶೈಷ್ಟಾ, ಸೋದರ ಅಶ್ರಾಫ್ (ಈಗಾಗಲೇ ಜೈಲಿನಲ್ಲಿದ್ದಾನೆ), ಅವರ ಪುತ್ರರು ಎಲ್ಲರ ಹೆಸರೂ ಎಫ್ಐಆರ್ನಲ್ಲಿದೆ. ಒಟ್ಟಾರೆ ಈ ಕುಟುಂಬದ ವಿರುದ್ಧ ಒಟ್ಟು 160 ಎಫ್ಐಆರ್ಗಳು ದಾಖಲಾಗಿದ್ದಾಗಿ ವರದಿಯಾಗಿದೆ.
ಇದನ್ನೂ ಓದಿ: Prayagraj Encounter: ಉತ್ತರ ಪ್ರದೇಶದಲ್ಲಿ ಉಮೇಶ್ ಪಾಲ್ ಹತ್ಯೆ ಆರೋಪಿ ಅರ್ಬಾಜ್ ಖಾನ್ ಎನ್ಕೌಂಟರ್
ಈಗಾಗಲೇ ಗುಜರಾತ್ನ ಸಬರಮತಿ ಜೈಲಿನಲ್ಲಿರುವ ಆತಿಕ್ ವಿರುದ್ಧ 100 ಕೇಸ್ಗಳು ದಾಖಲಾಗಿವೆ. ಆತನ ತಮ್ಮ ಅಶ್ರಾಫ್ ವಿರುದ್ಧ 52 ಕೇಸ್ಗಳು, ಆತಿಕ್ ಪತ್ನಿ ವಿರುದ್ಧ ಮೂರು, ಪುತ್ರರಾದ ಅಲಿ ವಿರುದ್ಧ ನಾಲ್ಕು ಮತ್ತು ಉಮರ್ ಅಹ್ಮದ್ ವಿರುದ್ಧ ಒಂದು ಕೇಸ್ ದಾಖಲಾಗಿದೆ. ಈ ಮಧ್ಯೆ ಆತಿಕ್ ಅಹ್ಮದ್ ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದಾನೆ. ನನ್ನ ಮತ್ತು ನನ್ನ ಕುಟುಂಬದ ವಿರುದ್ಧ ಸುಳ್ಳು ಕೇಸ್ ದಾಖಲಾಗಿದೆ. ಉತ್ತರ ಪ್ರದೇಶ ಪೊಲೀಸರು ನಮ್ಮನ್ನು ಎನ್ಕೌಂಟರ್ ಮಾಡುವ ಸಾಧ್ಯತೆಯೂ ಇದ್ದು, ರಕ್ಷಣೆ ಬೇಕು ಎಂದು ಮನವಿ ಮಾಡಿದ್ದಾರೆ.