ಶ್ರೀನಗರ: ಜಮ್ಮು-ಕಾಶ್ಮಿರದ ಸರ್ಕಾರಿ ಉದ್ಯೋಗಿ ರಾಹುಲ್ ಭಟ್ ಮತ್ತು ಗಾಯಕಿ ಅಮ್ರೀನ್ ಭಟ್ ಹಂತಕ ಸೇರಿ, ಲಷ್ಕರೆ ತೊಯ್ಬಾ ಸಂಘಟನೆಗೆ (LeT Terrorists) ಸೇರಿದ ಒಟ್ಟು ಮೂವರು ಭಯೋತ್ಪಾದಕರನ್ನು ಇಂದು ಜಮ್ಮು-ಕಾಶ್ಮೀರದ ಬಡ್ಗಾಂವ್ನಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಜಮ್ಮು-ಕಾಶ್ಮಿರದ ಖಾನಾಸಾಹಿಬ್ ಎಂಬಲ್ಲಿನ ವಾಟರ್ರ್ಹೈಲ್ನಲ್ಲಿ ಉಗ್ರರು ಇರುವ ಖಚಿತ ಮಾಹಿತಿ ಆಧರಿಸಿ ಭದ್ರತಾ ಪಡೆಗಳ ಸಿಬ್ಬಂದಿ ಕಾರ್ಯಾಚರಣೆಗೆ ಇಳಿದಿದ್ದರು. ಸ್ಥಳವನ್ನು ಸಂಪೂರ್ಣವಾಗಿ ಸುತ್ತುವರಿದಿದ್ದರು.
ಈ ಬಗ್ಗೆ ಕಾಶ್ಮೀರದ ಎಡಿಜಿಪಿ ಹೇಳಿಕೆ ಬಿಡುಗಡೆ ಮಾಡಿದ್ದು, ‘ಲಷ್ಕರೆ ತೊಯ್ಬಾ (ಟಿಆರ್ಎಫ್)ದ ಮೂವರು ಉಗ್ರರನ್ನು ಬಂಧಿಸಲಾಗಿದೆ. ಅದರಲ್ಲಿ ಲತೀಫ್ ರಾಥರ್ ಕೂಡ ಸಿಕ್ಕಿಬಿದ್ದಿದ್ದಾನೆ. ಈತ ರಾಹುಲ್ ಭಟ್ ಮತ್ತು ಅಮ್ರೀನ್ ಭಟ್ ಹತ್ಯೆ ಪ್ರಕರಣದ ನೇರ ಆರೋಪಿ ಎಂದಿದ್ದಾರೆ.
ಅಮ್ರೀನ್ ಭಟ್ ಮತ್ತು ರಾಹುಲ್ ಭಟ್ ಹತ್ಯೆ
ಅಮ್ರೀನ್ ಭಟ್ ಜಮ್ಮು-ಕಾಶ್ಮೀರದ ಪ್ರಸಿದ್ಧ ಗಾಯಕಿ. ಟಿವಿ ಕಲಾವಿದೆಯೂ ಹೌದು. ಯೂಟ್ಯೂಬ್ ಮತ್ತು ಇನ್ಸ್ಟಾಗ್ರಾಂ ಮೂಲಕ ತುಂಬ ಪ್ರಸಿದ್ಧಿ ಪಡೆದಿದ್ದರು. ಟಿಕ್ಟಾಕ್ ಮೂಲಕವೂ ಫೇಮಸ್ ಆಗಿದ್ದರು. 2022ರ ಮೇ ತಿಂಗಳಲ್ಲಿ ಲಷ್ಕರೆ ತೊಯ್ಬಾದ ಉಗ್ರರಿಂದ ಹತ್ಯೆಗೀಡಾಗಿದ್ದರು. ಆಗ ಅಮ್ರೀನ್ರಿಗೆ ಇನ್ನೂ 35ವರ್ಷ. ಲಷ್ಕರೆ ತೊಯ್ಬಾದ ಉಗ್ರರು ತಮ್ಮ ಸಂಘಟನೆಗೆ ಸೇರಿದ ಒಬ್ಬನ ವಿವಾಹ ಸಮಾರಂಭದಲ್ಲಿ ಬಂದು ಹಾಡುವಂತೆ ಅಮ್ರೀನ್ ಭಟ್ರಿಗೆ ಕೇಳಿದ್ದರು. ಆದರೆ ಆಕೆ ಒಪ್ಪಿರಲಿಲ್ಲ. ಇದರಿಂದ ಕೋಪಗೊಂಡ ಉಗ್ರರು, ಅಮ್ರೀನ್ ಮನೆಗೇ ಬಂದು ಗುಂಡು ಹಾರಿಸಿದ್ದರು.
ಹಾಗೇ, ರಾಹುಲ್ ಭಟ್ ಕೂಡ ಉಗ್ರರ ಗುಂಡಿಗೆ ಬಲಿಯಾಗುವಾಗ ಅವರಿಗೆ 35 ವರ್ಷ. ಕಂದಾಯ ಇಲಾಖೆಯಲ್ಲಿ ಕ್ಲರ್ಕ್ ಆಗಿದ್ದರು. ಇವರಿಗೆ ಉಗ್ರರು ಮೂರು ಗುಂಡುಗಳನ್ನು ಹಾರಿಸಿ ಹತ್ಯೆ ಮಾಡಿದ್ದರು. ರಾಹುಲ್ ಭಟ್ ಹತ್ಯೆ ಖಂಡಿಸಿ ಜಮ್ಮು-ಕಾಶ್ಮೀರದಲ್ಲಿ ಮೂರ್ನಾಲ್ಕು ದಿನ ಅಲ್ಪಸಂಖ್ಯಾತ ಸಮುದಾಯದವರು ಉಗ್ರ ಪ್ರತಿಭಟನೆ ನಡೆಸಿದ್ದರು. ಅಂದಹಾಗೇ, ಈ ಹತ್ಯೆ ನಡೆದಿದ್ದು 2022ರ ಮೇ 12ರಂದು.
ಇದನ್ನೂ ಓದಿ: ಜಮ್ಮು ಕಾಶ್ಮೀರದಲ್ಲಿ ಎನ್‌ಕೌಂಟರ್‌; ಪಾಕಿಸ್ತಾನದ ಇಬ್ಬರು ಸೇರಿ 4 ಭಯೋತ್ಪಾದಕರ ಹತ್ಯೆ