ಮುಂಜಾನೆ ಎದ್ದು ಇಂಟರ್ನೆಟ್, ನ್ಯೂಸ್ ಚಾನೆಲ್ ಆನ್ ಮಾಡಿದ ನಾವಿಂದು ಒಂದರ ಬೆನ್ನಿಗೆ ಒಂದರಂತೆ ಕಹಿ ಸುದ್ದಿಗಳನ್ನು ಕೇಳಿದ್ದೇವೆ. ಇಂದು ಇಂಟರ್ನೆಟ್ನಲ್ಲಿ ಆ ಮೂರು ಸುದ್ದಿಗಳು ಟ್ರೆಂಡ್ ಸೃಷ್ಟಿಸಿವೆ. ಈ ವಿಷಾದನೀಯ ಘಟನೆಗಳ ಬಗ್ಗೆ ವಿವಿಧ ಕ್ಷೇತ್ರಗಳ ಗಣ್ಯರು, ಜಾಗತಿಕ ಪ್ರಮುಖರು, ಸಾಮಾನ್ಯ ಜನರು ಸೋಷಿಯಲ್ ಮೀಡಿಯಾಗಳಲ್ಲಿ ಪೋಸ್ಟ್ ಹಾಕುತ್ತಿದ್ದಾರೆ. ಇಲ್ಲಿವೆ ನೋಡಿ ಶುಕ್ರವಾರ ಬೆಳ್ಳಂಬೆಳಗ್ಗೆಯೇ ಅನೇಕರ ಮನಸನ್ನು ಭಾರ ಗೊಳಿಸಿದ ಮೂರು ಘಟನೆಗಳು…
ಪ್ರಧಾನಿ ನರೇಂದ್ರ ಮೋದಿ ತಾಯಿ ಮರಣ
ಪ್ರಧಾನಿ ನರೇಂದ್ರ ಮೋದಿವಯರ ತಾಯಿ ಹೀರಾಬೆನ್ ಇಂದು ಮುಂಜಾನೆ 3.30ಕ್ಕೆ ನಿಧನರಾದರು. ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದ ಹೀರಾಬೆನ್ ಬುಧವಾರ ಅಹ್ಮದಾಬಾದ್ನ ಯುಎನ್ ಮೆಹ್ತಾ ಆಸ್ಪತ್ರೆಗೆ ದಾಖಲಾಗಿದ್ದರು. ಅನಾರೋಗ್ಯಕ್ಕೀಡಾದ ತಾಯಿಯನ್ನು ನೋಡಲು ಪ್ರಧಾನಿ ಮೋದಿ ಆಸ್ಪತ್ರೆಗೆ ಭೇಟಿ ಕೊಟ್ಟಿದ್ದರು. ಇನ್ನೇನು ಅವರ ಆರೋಗ್ಯ ಸರಿಹೋಯಿತು, ಡಿಸ್ಚಾರ್ಜ್ ಆಗುತ್ತಾರೆ ಎಂದು ಹೇಳಲಾಗಿತ್ತು. ಮೋದಿಯವರೂ ಸಹ ವಾಪಸ್ ದೆಹಲಿಗೆ ತೆರಳಿದ್ದರು. ಆದರೆ ಇಂದು ಮುಂಜಾನೆ ಸೂರ್ಯಮೂಡುವ ಹೊತ್ತಿಗೆ ‘ಪ್ರಧಾನಿ ಮೋದಿ ತಾಯಿ ಹೀರಾಬೆನ್ ಇನ್ನಿಲ್ಲ’ ಎಂಬ ಸುದ್ದಿ ಬಂದಿತ್ತು. ಮಗ ದೇಶದ ಪ್ರಧಾನಿಯಾಗಿದ್ದರೂ ಅತ್ಯಂತ ಸರಳವಾಗಿ, ಮುಗ್ಧವಾಗಿ ಬದುಕಿದ ಶತಾಯುಷಿ ಅಮ್ಮನ ಮರಣಕ್ಕೆ ಇಡೀ ದೇಶ ಮರುಗಿದೆ. ಜಗತ್ತಿನ ಪ್ರಮುಖರೂ ಸಂತಾಪ ಸೂಚಿಸಿದ್ದಾರೆ.
ಫುಟ್ಬಾಲ್ ದಿಗ್ಗಜ ಪೀಲೆ ನಿಧನ
ಫುಟ್ಬಾಲ್ ಲೋಕದ ದೇವರು ಎಂದೇ ಹೆಸರುಮಾತಾಗಿದ್ದ, ಇಡೀ ವಿಶ್ವದಾದ್ಯಂತ ಅಪಾರ ಅಭಿಮಾನಿಗಳನ್ನು ಹೊಂದಿದ್ದ ಬ್ರೆಜಿಲ್ ಫುಟ್ಬಾಲ್ ಆಟಗಾರ ಪೀಲೆ (ಎಡ್ಸನ್ ಅರಂಟೆಸ್ ಡೊ ನಾಸಿಮೆಂಟೋ) ನಿಧನರಾಗಿದ್ದಾರೆ ಎಂಬ ಸುದ್ದಿ ಮಧ್ಯರಾತ್ರಿಯಿಂದ ಹರಿದಾಡಿ, ಬೆಳಗ್ಗೆ ಜಗತ್ತು ಏಳುವ ಹೊತ್ತಿಗೆ ಪ್ರತಿಮನೆಯ ಬಾಗಿಲು ತಲುಪಿತ್ತು. ಕರುಳಿನ ಕ್ಯಾನ್ಸರ್ನಿಂದ ಬಳಲುತ್ತಿದ್ದ 82ವಯಸ್ಸಿನ ಪೀಲೆ ನಿಧನಕ್ಕೆ ಭಾರತ ಸೇರಿ ಇಡೀ ವಿಶ್ವದಲ್ಲಿರುವ ಅವರ ಅಭಿಮಾನಿಗಳು ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಅವರ ಬಗ್ಗೆ ಪೋಸ್ಟ್ ಹಾಕಿ ಶ್ರದ್ಧಾಂಜಲಿ ಸಲ್ಲಿಸುತ್ತಿದ್ದಾರೆ. ನೆಚ್ಚಿನ ಆಟಗಾರನ ಸಾಧನೆಗಳನ್ನು ಸ್ಮರಿಸುತ್ತಿದೆ.
ರಿಷಭ್ ಪಂತ್ಗೆ ಅಪಘಾತ
ಇದೊಂದು ಸುದ್ದಿ ಭರಸಿಡಿಲಿನಂತೆ ಬಂದಿತ್ತು. ಮಾಧ್ಯಮಗಳು, ಸೋಷಿಯಲ್ ಮೀಡಿಯಾಗಳೆಲ್ಲ ಪ್ರಧಾನಿ ನರೇಂದ್ರ ಮೋದಿ ತಾಯಿ ಸುದ್ದಿಯನ್ನು ಭಿತ್ತರಿಸುತ್ತಿದ್ದವು. ಹಾಗೇ, ಫುಟ್ಬಾಲ್ ಆಟಗಾರ ಪೀಲೆ ನಿಧನದ ಚರ್ಚೆಯೂ ಆಗುತ್ತಿತ್ತು. ಅಷ್ಟೊತ್ತಿಗೆ ಬಂದಿತ್ತು ‘ಕ್ರಿಕೆಟರ್ ರಿಷಭ್ ಪಂತ್’ ಗೆ ಅಪಘಾತವಾದ ಸುದ್ದಿ. ನೆಟ್ಟಿಗರಂತೂ ಲಗುಬಗೆಯಿಂದ ರಿಷಭ್ ಪಂತ್ ಆ್ಯಕ್ಸಿಡೆಂಟ್ ಎಂದು ಗೂಗಲ್ ಸರ್ಚ್ ಮಾಡಲು ತೊಡಗಿದ್ದರು. ಅದರಲ್ಲೂ ರಿಷಭ್ ಪಂತ್ ಅವರ ಕಾರು ಸುಟ್ಟು ಭಸ್ಮವಾದ ಫೋಟೋ ನೋಡಿದ ಮೇಲೆ ಅಕ್ಷರಶಃ ಭಯವಾಗಿತ್ತು. ಖ್ಯಾತ ಕ್ರಿಕೆಟರ್, ಭವಿಷ್ಯದಲ್ಲಿ ಟೀಂ ಇಂಡಿಯಾದ ಕ್ಯಾಪ್ಟನ್ ಆಗಬಲ್ಲ ಸಾಮರ್ಥ್ಯ ಇರುವ ರಿಷಬ್ ಪಂತ್ಗೆ ಅಪಘಾತವಾದ ಸುದ್ದಿ ಕ್ರೀಡಾಪ್ರೇಮಿಗಳಲ್ಲಿ ಆತಂಕ ಸೃಷ್ಟಿಸಿತ್ತು. ಸದ್ಯ ರಿಷಭ್ ಪಂತ್ ಆರೋಗ್ಯ ಸ್ಥಿರವಾಗಿದ್ದು, ಅವರ ಚೇತರಿಕೆಗಾಗಿ ಅನೇಕ ಕ್ರಿಕೆಟರ್ಸ್ ಮತ್ತು ಇತರ ಕ್ಷೇತ್ರಗಳ ಗಣ್ಯರು ಪ್ರಾರ್ಥಿಸುತ್ತಿದ್ದಾರೆ.
ಇವತ್ತಿಡೀದಿನ ಇಂಟರ್ನೆಟ್ನಲ್ಲಿ ಈ ಮೂರು ವಿಷಯಗಳ ಬಗ್ಗೆಯೇ ಸರ್ಚ್ ನಡೆಯುತ್ತಿದೆ. ಪ್ರಧಾನಿ ನರೇಂದ್ರ ಮೋದಿಯವರಿಗೆ ಸಾಂತ್ವನ ಹೇಳಲಾಗುತ್ತಿದೆ. ಪೀಲೆಯಂಥ ಅದ್ಭುತ ಆಟಗಾರ ಇನ್ನೊಬ್ಬರಿಲ್ಲ ಎಂಬ ಹೊಗಳಿಕೆಯ ಪೋಸ್ಟ್ಗಳು ಕಾಣಿಸುತ್ತಿವೆ. ಹಾಗೇ, ರಿಷಭ್ ಪಂತ್ ಚೇತರಿಕೆಗಾಗಿ ಹಾರೈಕೆಗಳ ಸುರಿಮಳೆಯಾಗುತ್ತಿದೆ. Get well soon champ ಎಂಬ ಹ್ಯಾಷ್ಟ್ಯಾಗ್ ಕೂಡ ಟ್ರೆಂಡ್ ಆಗುತ್ತಿದೆ. ಒಟ್ಟಿನಲ್ಲಿ ಇವತ್ತು ಇಂಟರ್ನೆಟ್ನಲ್ಲಿ ಪ್ರಧಾನಿ ನರೇಂದ್ರ ಮೋದಿ, ಅವರ ತಾಯಿ ಹೀರಾಬೆನ್, ಪೀಲೆ ಮತ್ತು ರಿಷಭ್ ಪಂತ್ ಹೆಚ್ಚು ಚರ್ಚೆಯಲ್ಲಿದ್ದಾರೆ.
ಇದನ್ನೂ ಓದಿ: Heeraben Modi | ಪ್ರಧಾನಿ ಮೋದಿ ತಾಯಿ ನಿಧನಕ್ಕೆ ಬಾಲಿವುಡ್ ಸೆಲೆಬ್ರಿಟಿಗಳ ಸಂತಾಪ