ಕೇರಳದ ಕೊಟ್ಟಾಯಂನಲ್ಲಿ 33ವರ್ಷದ ನರ್ಸ್ವೊಬ್ಬರು ಮೃತಪಟ್ಟ ಬೆನ್ನಲ್ಲೇ ರಾಜ್ಯದ ಆಹಾರ ಸುರಕ್ಷತಾ ಇಲಾಖೆ ಕಠಿಣ ಕ್ರಮ ಕೈಗೊಂಡಿದೆ. ಸದ್ಯ ಕೊಟ್ಟಾಯಂ, ಎರ್ನಾಕುಲಂ, ಕೊಲ್ಲಂ ಮತ್ತು ತಿರುವನಂತಪುರಂ ಜಿಲ್ಲೆಗಳ ಒಟ್ಟು 40 ಹೋಟೆಲ್ಗಳ ಬಾಗಿಲು ಮುಚ್ಚಿಸಿ, 62 ಹೋಟೆಲ್/ರೆಸ್ಟೋರೆಂಟ್ಗಳಿಗೆ ದಂಡ ವಿಧಿಸಿದೆ. ಹಾಗೇ, 28 ಹೋಟೆಲ್/ರೆಸ್ಟೋರೆಂಟ್ ಮಾಲೀಕರಿಗೆ, ಸುರಕ್ಷತಾ ನಿಯಮ ತಪ್ಪಿದರೆ ನೀವು ಕೆಲಸ ನಿಲ್ಲಿಸಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿ ಬಿಟ್ಟಿದೆ.
ಕೊಟ್ಟಾಯಂನ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ನರ್ಸ್ ಆಗಿದ್ದ 33 ವರ್ಷದ ರಷ್ಮಿ ರಾಜ್ ಎಂಬುವರು ಡಿಸೆಂಬರ್ 29ರಂದು ‘ಹೋಟೆಲ್ ಪಾರ್ಕ್’ ಎಂಬ ಹೆಸರಿನ ರೆಸ್ಟೋರೆಂಟ್ನಿಂದ ಅಲ್ ಫಹಾಮ್ (ಅರೇಬಿಯನ್ ಚಿಕನ್) ಆರ್ಡರ್ ಮಾಡಿ ತರಿಸಿ ತಿಂದಿದ್ದರು. ಆ ಚಿಕನ್ ತಿನ್ನುತ್ತಿದ್ದಂತೆ ಫುಡ್ಪಾಯ್ಸನ್ ಆಗಿ ನರ್ಸ್ ಸ್ಥಿತಿ ಗಂಭೀರವಾಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಚಿಕಿತ್ಸೆ ಫಲಕಾರಿಯಾಗದೆ ಅವರು ಮೃತಪಟ್ಟಿದ್ದರು. ಅಷ್ಟೇ ಅಲ್ಲ, ಇದೇ ಹೋಟೆಲ್ನಲ್ಲಿ ಈ ಅಲ್ ಫಹಾಮ್ ಚಿಕನ್ ತಿಂದ ಇನ್ನೂ 20 ಮಂದಿ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಕೇರಳ ಆಹಾರ ಸುರಕ್ಷತಾ ಇಲಾಖೆ ಅಧಿಕಾರಿಗಳು ಈಗಾಗಲೇ ಹೋಟೆಲ್ ಪಾರ್ಕ್ ರೆಸ್ಟೋರೆಂಟ್ನ ಲೈಸೆನ್ಸ್ ರದ್ದುಗೊಳಿಸಿ, ಬಾಗಿಲು ಮುಚ್ಚುವಂತೆ ಆದೇಶಿಸಿದ್ದಾರೆ.
ಈ ಮಧ್ಯೆ ಕೇರಳ ಆಡಳಿತ ರೂಢ ಪಕ್ಷ ಕಮ್ಯೂನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಮಾರ್ಕ್ಸ್ ವಾದಿ)ದ ಅಂಗಸಂಸ್ಥೆಯಾಗಿರುವ ಡೆಮಾಕ್ರಟಿಕ್ ಯುತ್ ಫೆಡರೇಶನ್ ಆಫ್ ಇಂಡಿಯಾದ ಸದಸ್ಯರು ಹೋಟೆಲ್ ಪಾರ್ಕ್ ಮೇಲೆ ದಾಳಿಯನ್ನೂ ನಡೆಸಿದ್ದಾರೆ.
ಘಟನೆ ಬಗ್ಗೆ ಪ್ರತಿಕ್ರಿಯೆ ನೀಡಿದ ಆಹಾರ ಸುರಕ್ಷತಾ ಇಲಾಖೆ ಕೊಟ್ಟಾಯಂ ವಿಭಾಗದ ಸಹಾಯಕ ಆಯುಕ್ತ ಸಿ.ಆರ್ರಣದೀಪ್, ‘ನರ್ಸ್ ಮೃತಪಟ್ಟಿದ್ದು ಫುಡ್ ಪಾಯ್ಸನ್ನಿಂದ ಹೌದೋ-ಅಲ್ಲವೋ ಎಂಬುದು ಪೋಸ್ಟ್ಮಾರ್ಟಮ್ ವರದಿಯ ಬಳಿಕವಷ್ಟೇ ಸ್ಪಷ್ಟವಾಗಲಿದೆ. ಆದರೆ ಆ ರೆಸ್ಟೋರೆಂಟ್ ಆಹಾರ ತಿಂದು ಇನ್ನಷ್ಟು ಮಂದಿ ಅಸ್ವಸ್ಥರಾಗಿದ್ದು ಹೌದು. ಇಂಥ ವಿದೇಶಿ ಖಾದ್ಯಗಳಲ್ಲಿ ಬಳಸುವ ಮೇಯನೇಸ್ (ಮೊಟ್ಟೆಯ ಹಳದಿ ಲೋಳೆ, ಎಣ್ಣೆ, ಆಮ್ಲ, ವಿನೆಗರ್ ಅಥವಾ ಲಿಂಬೆ ರಸ ಸೇರಿಸಿ ತಯಾರಿಸುವ ಒಂದು ಕ್ರೀಮ್) ಕ್ರೀಮ್ ಬಳಸಲಾಗುತ್ತದೆ. ಮೇಯನೇಸ್ ಹಾಕಿದ ಖಾದ್ಯಗಳು ಬಲುಬೇಗನೆ ಹಳಸುತ್ತವೆ. ಈ ಬಗ್ಗೆ ಹೋಟೆಲ್ನವರು ಕಾಳಜಿ ತೆಗೆದುಕೊಳ್ಳಬೇಕು. ಅಂಥ ಹಳಸಿದ ಆಹಾರಗಳನ್ನು ತಿಂದರೆ ಖಂಡಿತ ಫುಡ್ಪಾಯ್ಸನ್ ಆಗುತ್ತದೆ. ಇನ್ನು ಕೊಚ್ಚಿದ ಮಾಂಸಗಳೂ ಕೂಡ ದೇಹಕ್ಕೆ ಅಪಾಯ ಒಡ್ಡುತ್ತವೆ. ಇಂಥ ಮಾಂಸಗಳನ್ನು ಹೆಚ್ಚಿನ ಉರಿಯಲ್ಲಿ ಸರಿಯಾಗಿ ಬೇಯಿಸಬೇಕು. ಅದಿಲ್ಲದೆ ಹೋದರೆ ಬೇಗ ಹಾಳಾಗಿ ಹೋಗುತ್ತದೆ. ಇದು ತಿನ್ನುವವರಿಗೆ ಅಷ್ಟು ಬೇಗ ಗೊತ್ತಾಗುವುದಿಲ್ಲ’ ಎಂದು ವಿವರಿಸಿದ್ದಾರೆ.
ನರ್ಸ್ ಸಾವಿನ ಬೆನ್ನಲ್ಲೇ ಹೋಟೆಲ್ಗಳನ್ನು ರೇಡ್ ಮಾಡಲು ಕೇರಳ ಆಹಾರ ಸುರಕ್ಷತಾ ಇಲಾಖೆ ಸಚಿವರೇ ಸೂಚಿಸಿದ್ದರು. ಹಾಗೇ, ಮುಂದಿನ ದಿನಗಳಲ್ಲಿ ರಾಜ್ಯಾದ್ಯಂತ ಎಲ್ಲ ಉಪಾಹಾರ ಗೃಹಗಳು, ಹೋಟೆಲ್ಗಳನ್ನೂ ಪರಿಶೀಲನೆ ಮಾಡಬೇಕು. ಯಾರಾದರೂ ನೈರ್ಮಲ್ಯತೆ ಕಾಪಾಡುತ್ತಿಲ್ಲ, ಹಳತಾದ, ಹಳಸಿದ ಆಹಾರ ಮಾರುತ್ತಿದ್ದುದು ಕಂಡು ಬಂದರೆ ಅಂಥ ಹೋಟೆಲ್ಗಳ ಲೈಸೆನ್ಸ್ ರದ್ದುಗೊಳಿಸಬೇಕು ಎಂದು ಕೇರಳ ರಾಜ್ಯ ಆರೋಗ್ಯ ಸಚಿವೆ ವೀಣಾ ಜಾರ್ಜ್ ಸೂಚಿಸಿದ್ದಾರೆ.
ಕೇರಳದಲ್ಲಿ ಇತ್ತೀಚೆಗೆ ಆಹಾರ ವಿಷವಾಗಿ ಜನ ಅಸ್ವಸ್ಥರಾಗುತ್ತಿರುವ ಪ್ರಕರಣ ಹೆಚ್ಚುತ್ತಿದೆ. ಕಳೆದವಾರ ಪತನಂತಿಟ್ಟ ಜಿಲ್ಲೆಯ ಚರ್ಚ್ವೊಂದರಲ್ಲಿ ದೀಕ್ಷಾ ಕಾರ್ಯಕ್ರಮ ನಡೆದಿತ್ತು. ಅದರಲ್ಲಿ ಊಟ ಮಾಡಿದ್ದ 100ಕ್ಕೂ ಹೆಚ್ಚು ಜನರು ಅಸ್ವಸ್ಥರಾಗಿದ್ದರು. ಅದರ ತನಿಖೆಯೂ ನಡೆಯುತ್ತಿದೆ. ಹಾಗೇ, ಕೊಯಿಕ್ಕೋಡ್ನಲ್ಲೂ ಇತ್ತೀಚೆಗೆ ಅಂಥದ್ದೇ ಘಟನೆ ನಡೆದಿತ್ತು. ಹೋಟೆಲ್ವೊಂದರಲ್ಲಿ ತಿಂಡಿ ತಿಂದಿದ್ದ 21 ಮಂದಿ ಆರೋಗ್ಯ ಹದಗೆಟ್ಟಿತ್ತು.
ಇದನ್ನೂ ಓದಿ: ವಿದ್ಯಾರ್ಥಿನಿಯರಿಗೆ 2 ತಿಂಗಳು ಮಾತೃತ್ವ ರಜೆ, ಗರ್ಭಪಾತವಾದರೆ 14 ದಿನ ರಜೆ ; ಕೇರಳದಲ್ಲಿ ಪ್ರಥಮ ಪ್ರಯೋಗ!