ಅಮೃತ್ಸರ್: ಪಂಜಾಬ್ನ ತರಣ್ ತಾರಣ್ ಜಿಲ್ಲೆಯ ಅಮೃತ್ಸರ್-ಭಟಿಂಡಾ ಹೆದ್ದಾರಿಯಲ್ಲಿರುವ ಪೊಲೀಸ್ ಠಾಣೆ ಮೇಲೆ ಡಿಸೆಂಬರ್ 9ರ ತಡರಾತ್ರಿ ನಡೆದ ರಾಕೆಟ್ ಚಾಲಿತ ಗ್ರೆನೇಡ್ ದಾಳಿ ಕೇಸ್ಗೆ ಸಂಬಂಧಪಟ್ಟಂತೆ ಪಂಜಾಬ್ ಪೊಲೀಸರು ಶುಕ್ರವಾರ (ಡಿ.16) ಆರು ಮಂದಿಯನ್ನು ಬಂಧಿಸಿದ್ದಾರೆ. ಇವರಲ್ಲಿ ಇಬ್ಬರು ಅಪ್ರಾಪ್ತ ವಯಸ್ಸಿನವರು ಎಂದೂ ಹೇಳಲಾಗಿದೆ. ಆರೋಪಿಗಳು ರಾಕೆಟ್ ಮೂಲಕ ಗ್ರೆನೇಡ್ ದಾಳಿ ಮಾಡುವುದು ಹೇಗೆಂದು ಯೂಟ್ಯೂಬ್ ನೋಡಿ, ಕಲಿತು ಪಂಜಾಬ್ ಪೊಲೀಸ್ ಠಾಣೆ ಮೇಲೆ ದಾಳಿ ಮಾಡಿದ್ದರು. ಆ ಯೂಟ್ಯೂಬ್ ವಿಡಿಯೊ ಮಾಡಿದ್ದು ವಿದೇಶಿಗ ಎಂಬ ವಿಷಯವನ್ನೂ ಪೊಲೀಸರು ಬಹಿರಂಗಗೊಳಿಸಿದ್ದಾರೆ.
ಪಂಜಾಬ್ ಠಾಣೆ ಮೇಲೆ ದಾಳಿ ಮಾಡಿದ ಈ ದುಷ್ಕರ್ಮಿಗಳು ಏಕ ಬಳಕೆಯ 70 ಎಂಎಂ ಸಾಮರ್ಥ್ಯದ ಆರ್ಪಿಜಿ-26 ಬಳಸಿದ್ದಾರೆ. ಇದು ಸೋವಿಯತ್ ಕಾಲದ್ದಾಗಿದೆ. ಇದನ್ನು ಆರೋಪಿಗಳು ಗಡಿಯಾಚೆಯಿಂದಲೇ ಪಡೆದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಪಂಜಾಬ್ ಠಾಣೆ ಮೇಲೆ ನಡೆದ ರಾಕೆಟ್ ಚಾಲಿತ ಗ್ರೆನೇಡ್ ದಾಳಿಯ ಮಾಸ್ಟರ್ಮೈಂಡ್ ಕೆನಡಾ ಮೂಲದ ಗ್ಯಾಂಗ್ಸ್ಟರ್ ಲಖ್ಬೀರ್ ಸಿಂಗ್ ಲಂಡಾ ಮತ್ತು ಆತನ ಸಹಚರರಾದ ಸತ್ಬೀರ್ ಸಿಂಗ್ ಸತ್ತಾ ಮತ್ತು ಗುರುದೇವ್ ಸಿಂಗ್ ಜಾಸ್ಸಲ್ (ಇವರಿಬ್ಬರೂ ಯುರೋಪ್ನಲ್ಲಿದ್ದಾರೆ). ಇವರಿಗೆ ಸದ್ಯ ಪಂಜಾಬ್ನಲ್ಲಿರುವ ಅಜ್ಮೀತ್ ಸಿಂಗ್ ಸಹಾಯ ಮಾಡಿದ್ದಾನೆ. ಈ ಕೃತ್ಯಕ್ಕೆ ಮುಖ್ಯ ಸಹಕಾರ ಪಾಕಿಸ್ತಾನ ಗುಪ್ತಚರ ಇಲಾಖೆ ಐಎಸ್ಐದ್ದು ಎಂದು ಡಿಜಿಪಿ ಗೌರವ್ ಯಾದವ್ ತಿಳಿಸಿದ್ದಾರೆ.
ಇದೀಗ ಬಂಧಿತರಾದ ಆರೋಪಿಗಳನ್ನು ಗುರುಪ್ರೀತ್ ಸಿಂಗ್ ಅಲಿಯಾಸ್ ಗೋಪಿ (18), ಗುರುಲಾಲ್ ಸಿಂಗ್ ಅಲಿಯಾಸ್ ಗಹ್ಲಾ, ಸುರ್ಲಾಲ್ಪಾಲ್ ಸಿಂಗ್ ಅಲಿಯಾಸ್ ಲಾಲಿ(21) ಮತ್ತು ಜೋಬಾನ್ಪ್ರೀತ್ ಸಿಂಗ್ (18) ಎಂದು ಗುರುತಿಸಲಾಗಿದೆ. ಇನ್ನಿಬ್ಬರು ಅಪ್ರಾಪ್ತ ಬಾಲಕರಾಗಿದ್ದರಿಂದ ಹೆಸರು ಬಹಿರಂಗಪಡಿಸಿಲ್ಲ. ಇವರಿಂದ ಪಿಸ್ತೂಲ್, ಗ್ರೆನೇಡ್ ಪಿ-86, ಮೋಟಾರ್ ಬೈಕ್ಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.
ಇದನ್ನೂ ಓದಿ:ಪಂಜಾಬ್ ಪೊಲೀಸ್ ಠಾಣೆ ಮೇಲೆ ರಾಕೆಟ್ ಚಾಲಿತ ಗ್ರೆನೇಡ್ ದಾಳಿ; ಬಾಗಿಲಿನ ಗಾಜು ಪುಡಿಪುಡಿ, ಪಾಕ್ ಕೈವಾಡ ಶಂಕೆ