ತಿರುವನಂತಪುರಂ: ಕೈಯಲ್ಲಿ ಹಿಡಿದಿದ್ದ ಮೊಬೈಲ್ ಸ್ಫೋಟಗೊಂಡು 8ವರ್ಷದ ಬಾಲಕಿಯೊಬ್ಬಳು ಮೃತಪಟ್ಟ ದುರ್ಘಟನೆ ಕೇರಳದ ತಿರುವಿಲ್ವಾಮಲದಲ್ಲಿ ನಡೆದಿದೆ. ಬಾಲಕಿಯ ಹೆಸರು ಆದಿತ್ಯಶ್ರೀ ಎಂದಾಗಿದ್ದು, ಅಶೋಕ್ ಕುಮಾರ್ ಮತ್ತು ಸೌಮ್ಯಾ ದಂಪತಿಯ ಪುತ್ರಿ. ಅಶೋಕ್ ಕುಮಾರ್ ಅವರು ತಿರುವಿಲ್ವಾಮಲ ಗ್ರಾಮ ಪಂಚಾಯಿತಿಯ ಪಜಯನ್ನೂರು ಬ್ಲಾಕ್ನ ಮಾಜಿ ಸದಸ್ಯ.
ಸೋಮವಾರ ರಾತ್ರಿ 10.30ರ ಹೊತ್ತಿಗೆ ಬಾಲಕಿ ಕೈಯಲ್ಲಿ ಮೊಬೈಲ್ ಹಿಡಿದುಕೊಂಡು ವಿಡಿಯೊ ನೋಡುತ್ತ ಕುಳಿತಿದ್ದಳು. ಆಕೆ ತುಂಬ ಹೊತ್ತಿನಿಂದಲೂ ಹಾಗೆ ಮೊಬೈಲ್ ಆನ್ಮಾಡಿಟ್ಟುಕೊಂಡು ನೋಡುತ್ತಲೇ ಇದ್ದಳು. ಬಳಿಕ ಅದು ಸ್ಫೋಟವಾಗಿದೆ. ಮೊಬೈಲ್ ಬ್ಯಾಟರಿ ಸಿಕ್ಕಾಪಟೆ ಹೀಟ್ ಆಗಿ, ಸ್ಫೋಟವಾಗಿರಬಹುದು ಎಂದು ಪೊಲೀಸರು ಅಂದಾಜಿಸಿದ್ದಾರೆ. ವಿಧಿವಿಜ್ಞಾನ ಪರೀಕ್ಷೆ ನಂತರವೇ ಸ್ಪಷ್ಟ ಕಾರಣ ಗೊತ್ತಾಗಲಿದೆ ಎಂದು ಅವರು ತಿಳಿಸಿದ್ದಾರೆ.
ಈ ಫೋನ್ನ್ನು ಮೂರು ವರ್ಷಗಳ ಹಿಂದೆ ಖರೀದಿ ಮಾಡಲಾಗಿತ್ತು. ಅದೂ ಕೂಡ ಆದಿತ್ಯಶ್ರೀಯ ಚಿಕ್ಕಪ್ಪ ಖರೀದಿ ಮಾಡಿ, ಅದನ್ನು ಆಕೆಯ ತಂದೆ ಅಶೋಕ್ ಕುಮಾರ್ ಕುಮಾರ್ಗೆ ಕೊಟ್ಟಿದ್ದರು. ಕಳೆದ ವರ್ಷ ಈ ಮೊಬೈಲ್ ಬ್ಯಾಟರಿಯನ್ನು ಬದಲಿಸಲಾಗಿತ್ತು. ಎಲ್ಲಿ ಮೊಬೈಲ್ ಖರೀದಿ ಮಾಡಲಾಗಿತ್ತೋ, ಅಲ್ಲೇ ಬ್ಯಾಟರಿಯನ್ನು ಬದಲು ಮಾಡಲಾಗಿತ್ತು ಎಂದು ಹೇಳಲಾಗಿದೆ.
ಇನ್ನು ಘಟನೆ ನಡೆದಾಗ ಮನೆಯಲ್ಲಿ ಆದಿತ್ಯಶ್ರೀ ಮತ್ತು ಆಕೆಯ ಅಜ್ಜಿ ಇಬ್ಬರೇ ಇದ್ದರು. ಅಜ್ಜಿ ಊಟಕ್ಕೆಂದು ಅಡಿಗೆ ಮನೆಗೆ ಹೋಗಿದ್ದಾಗ ಮೊಬೈಲ್ ಸ್ಫೋಟವಾಗಿದೆ. ಬಾಲಕಿಯ ಮುಖಕ್ಕೆ ತೀವ್ರ ಗಾಯವಾಗಿತ್ತು. ಆಕೆಯ ಬಲಗೈ ಕೈಬೆರಳುಗಳು, ಅಂಗೈಯೆಲ್ಲ ತುಂಡಾಗಿತ್ತು’ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಅಂದಹಾಗೇ, ಈ ಹುಡುಗಿ ಸ್ಥಳೀಯ ಕ್ರಿಸ್ಟ್ ನ್ಯೂ ಲೈಫ್ ಶಾಲೆಯಲ್ಲಿ ಮೂರನೇ ತರಗತಿ ಓದುತ್ತಿದ್ದಳು.
ಇದನ್ನೂ ಓದಿ: Shivamogga Blast | ಶಿವಮೊಗ್ಗದಲ್ಲಿ ರಸ್ತೆಬದಿ ನಿಲ್ಲಿಸಿದ್ದ ಕಾರಿನಲ್ಲಿ ಮೊಬೈಲ್ ಸ್ಫೋಟ
ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ಉತ್ತರ ಪ್ರದೇಶದ ಲಖನೌದಲ್ಲಿ ಇಂಥದ್ದೇ ಒಂದು ಘಟನೆ ನಡೆದಿತ್ತು. ಚಾರ್ಜ್ಗೆ ಹಾಕಿದ್ದ ಮೊಬೈಲ್ ಸ್ಫೋಟಗೊಂಡು 8ತಿಂಗಳ ಮಗುವೊಂದು ಮರಣಹೊಂದಿತ್ತು. ಹೆಣ್ಣುಮಗುವನ್ನು ಮಂಚದ ಮೇಲೆ ಮಲಗಿಸಿ, ಆಕೆಯ ತಾಯಿ ಬಟ್ಟೆ ಒಣಗಿಹಾಕಲೆಂದು ಹೊರಹೋಗಿದ್ದಳು. ಅದೇ ಮಂಚದ ಪಕ್ಕದಲ್ಲಿ ಮೊಬೈಲ್ ಚಾರ್ಜ್ಗೆ ಹಾಕಲಾಗಿತ್ತು. ಅದು ಸ್ಫೋಟವಾಗಿ ಮಗು ಸ್ಥಳದಲ್ಲೇ ಮೃತಪಟ್ಟಿತ್ತು.