ನವ ದೆಹಲಿ: ಕಾಂಗ್ರೆಸ್ನ ಭಾರತ್ ಜೋಡೋ ಯಾತ್ರೆ ಮಧ್ಯಪ್ರದೇಶಲ್ಲಿ ನಡೆಯುತ್ತಿದ್ದು, ಭಾನುವಾರ ರಾಹುಲ್ ಗಾಂಧಿ ಬುಲೆಟ್ ಬೈಕ್ ರೈಡ್ ಮಾಡಿದ್ದರು. ಇಂದು ಬೆಳಗ್ಗೆ ಪಾದಯಾತ್ರೆ ಪ್ರಾರಂಭವಾಗುತ್ತಿದ್ದಂತೆ ಬಾಲಕನೊಬ್ಬ, ಕೈಯಲ್ಲಿ ತನ್ನ ‘ಪಿಗ್ಗಿ ಬ್ಯಾಂಕ್’ (ಮಕ್ಕಳು ಹಣ ಕೂಡಿಡಲು ಇರುವ ಬಾಕ್ಸ್) ತಂದು ರಾಹುಲ್ ಗಾಂಧಿ ಕೈಯಿಗೆ ಕೊಟ್ಟಿದ್ದಾನೆ. ‘ರಾಹುಲ್ ಗಾಂಧಿಯವರು ಭಾರತ್ ಜೋಡೋ ಯಾತ್ರೆ ಮೂಲಕ ಎಲ್ಲ ವರ್ಗದವರನ್ನೂ, ಎಲ್ಲರನ್ನೂ ತಮ್ಮೊಂದಿಗೆ ಮುನ್ನಡೆಸುತ್ತಿದ್ದಾರೆ. ಎಲ್ಲರೂ ಸಮಾನರು ಎಂಬ ಸಂದೇಶ ಕೊಡುತ್ತಿದ್ದಾರೆ. ಇದರಿಂದ ನನಗೆ ಖುಷಿಯಾಗಿದೆ. ನಾನು ಈ ಯಾತ್ರೆ ಶುರುವಾದಾಗಿನಿಂದಲೂ ಕೂಡಿಟ್ಟಿದ್ದ ಹಣವನ್ನು ದೇಣಿಗೆ ರೂಪದಲ್ಲಿ ರಾಹುಲ್ ಗಾಂಧಿ ಅವರಿಗೆ ಕೊಡುತ್ತಿದ್ದೇನೆ. ಈ ಹಣ ನನ್ನ ಪಾಕೆಟ್ ಮನಿಯಿಂದಲೇ ಸಂಗ್ರಹಿಸಿದ್ದು’ ಎಂದು ಆ ಹುಡುಗ ಹೇಳಿದ್ದಾನೆ.
ಬಾಲಕ ಮತ್ತು ಇತರ ಹುಡುಗರು ಪಾದಯಾತ್ರೆಗೆ ಸೇರಿ, ಅಲ್ಲಿ ಹಣ ದೇಣಿಗೆ ನೀಡಿದ ವಿಡಿಯೊವನ್ನು ರಾಹುಲ್ ಗಾಂಧಿ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ‘ತ್ಯಾಗ ಮತ್ತು ನಿಸ್ವಾರ್ಥ ಎಂಬ ಮೌಲ್ಯಗಳನ್ನು ಬಾಲ್ಯದಲ್ಲಿಯೇ ರೂಢಿಸಿಕೊಳ್ಳಬೇಕು. ಬಾಲಕ ಕೊಟ್ಟ ಈ ಪಿಗ್ಗಿ ಬ್ಯಾಂಕ್ ನನ್ನ ಪಾಲಿಗೆ ಅನರ್ಘ್ಯ, ಅನಂತ ಪ್ರೀತಿಯ ನಿಧಿ’ ಎಂದು ಕ್ಯಾಪ್ಷನ್ ಬರೆದಿದ್ದಾರೆ. ಬಾಲಕನಿಂದ ಆ ಹಣದ ಹುಂಡಿ ತೆಗೆದುಕೊಂಡ ರಾಹುಲ್ ಗಾಂಧಿ ಅವನ ತಲೆಗೊಂದು ಮುತ್ತು ಕೊಟ್ಟಿದ್ದಾರೆ ಮತ್ತು ಧನ್ಯವಾದ ಸಲ್ಲಿಸಿದ್ದಾರೆ.
ಬಳಿಕ ಮಾತನಾಡಿದ ಬಾಲಕ ‘ಭಾರತ್ ಜೋಡೋ ಯಾತ್ರೆ ಹಿಂದು-ಮತ್ತು ಮುಸ್ಲಿಮರ ನಡುವಿನ ವೈರತ್ವವನ್ನು ಹೋಗಲಾಡಿಸಿ, ಅವರ ಮಧ್ಯೆ ಸಾಮರಸ್ಯ ತರುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ನನಗೆ ಅನ್ನಿಸುತ್ತದೆ. ಇಲ್ಲಿ ಎಲ್ಲರೂ ಸಮಾನರೇ ಎಂಬುದು ಭಾರತ್ ಜೋಡೋ ಯಾತ್ರೆಯ ಅರ್ಥ’ ಎಂದು ಬಾಲಕ ಹೇಳಿದ್ದಾನೆ.