ಗಾಂಧಿನಗರ: ಗುಜರಾತ್ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ 156 ಕ್ಷೇತ್ರಗಳನ್ನು ಗೆಲ್ಲುವ ಮೂಲಕ ದಾಖಲೆಯ ಜಯ ಸಾಧಿಸಿದ್ದರೆ, ಆಮ್ ಆದ್ಮಿ ಪಕ್ಷ ಖಾತೆ ತೆರೆಯುವ ಜತೆ 5 ಸ್ಥಾನಗಳನ್ನು ಗೆದ್ದುಕೊಂಡಿದೆ. ಇಲ್ಲೀಗ ಆಪ್ ಪಕ್ಷದ ಶಾಸಕರು ಬಿಜೆಪಿಯೊಂದಿಗೆ ಸಂಪರ್ಕದಲ್ಲಿದ್ದಾರೆ ಎಂಬ ಮಾತು ಕೇಳಿಬರುತ್ತಿದೆ. ಗುಜರಾತ್ನ ಜುನಾಗಢ್ ಜಿಲ್ಲೆಯ ವಿಸಾವಧರ್ ವಿಧಾನಸಭಾ ಕ್ಷೇತ್ರದಿಂದ ಗೆದ್ದಿರುವ ಆಮ್ ಆದ್ಮಿ ಪಕ್ಷದ ಶಾಸಕ ಭೂಪತ್ ಭಯಾನಿ ಬಿಜೆಪಿ ಸೇರ್ಪಡೆಯಾಗುತ್ತಿದ್ದಾರೆ ಎಂದೂ ಹೇಳಲಾಗುತ್ತಿದೆ. ಭೂಪತ್ ಭಯಾನಿ ಬಿಜೆಪಿ ಸೇರುವುದಿಲ್ಲ, ಬದಲಿಗೆ ಹೊರಗಡೆಯಿಂದ ಆ ಪಕ್ಷಕ್ಕೆ ಬೆಂಬಲ ನೀಡಲಿದ್ದಾರೆ ಎಂದು ಇನ್ನೊಂದು ವರದಿ ಉಲ್ಲೇಖಿಸಿದೆ.
ಆದರೆ ಇವೆರಡೂ ವರದಿಯನ್ನು ಭೂಪತ್ ಭಯಾನಿ ಅಲ್ಲಗಳೆದಿದ್ದಾರೆ. ನಾನು ಆಪ್ ಬಿಟ್ಟು ಬಿಜೆಪಿಗೆ ಸೇರ್ಪಡೆಯಾಗುತ್ತಿಲ್ಲ ಎಂದು ಹೇಳಿದ್ದಾರೆ. ಭಯಾನಿ 2017ರವರೆಗೂ ಬಿಜೆಪಿಯಲ್ಲೇ ಇದ್ದರು. ಆ ವರ್ಷದ ಗುಜರಾತ್ ವಿಧಾನಸಭೆ ಚುನಾವಣೆ ಹೊತ್ತಲ್ಲಿ ಆಮ್ ಆದ್ಮಿ ಪಕ್ಷಕ್ಕೆ ಸೇರ್ಪಡೆಯಾಗಿದ್ದರು.
ಗುಜರಾತ್ನಲ್ಲಿ ಯಾವುದೇ ಪಕ್ಷ ಸರ್ಕಾರ ರಚನೆ ಮಾಡಬೇಕು ಎಂದರೆ ಕನಿಷ್ಠ 92 ಕ್ಷೇತ್ರಗಳನ್ನು ಗೆಲ್ಲಬೇಕು. ಅದಕ್ಕೂ ಕಡಿಮೆ ಸೀಟ್ ಗೆದ್ದಾಗ ಮಾತ್ರ ಬೇರೆ ಪಕ್ಷಗಳ ಶಾಸಕರಿಗೆ ಗಾಳ ಹಾಕುವುದು, ಮತ್ತೊಂದು ಪಕ್ಷದ ಶಾಸಕರನ್ನು ತಮ್ಮೆಡೆಗೆ ಸೆಳೆಯುವ ಅಗತ್ಯ ಇರುತ್ತದೆ. ಆದರೆ ಗುಜರಾತ್ನಲ್ಲಿ ಈ ಸಲ ಬಿಜೆಪಿಗೆ ಆ ಪ್ರಮೇಯವೇ ಇಲ್ಲದೆ ಇರುವುದರಿಂದ ಆಮ್ ಆದ್ಮಿ ಪಕ್ಷದ ಶಾಸಕರು ಬಂದರೂ-ಬಾರದಿದ್ದರೂ ಯಾವುದೇ ವ್ಯತ್ಯಾಸವೂ ಆಗುವುದಿಲ್ಲ.
ಆಮ್ ಆದ್ಮಿ ಪಕ್ಷ ಈ ವಿಧಾನಸಭೆ ಚುನಾವಣೆಯಲ್ಲಿ 5 ಕ್ಷೇತ್ರಗಳನ್ನು ಗೆದ್ದಿದ್ದು, ಒಟ್ಟಾರೆ ಶೇ.12.92ರಷ್ಟು ಮತ ಗಳಿಸಿದೆ. ವಿಸಾವಧರ್ ಕ್ಷೇತ್ರದಿಂದ ಭೂಪತ್ ಭಾಯ್, ಜಮ್ಜೋಧಪುರದಿಂದ ಅಹೀರ್ ಹೇಮಂತ್ಭಾಯ್ ಹರ್ದಾಸ್ಭಾಯ್, ಬೋಟಾಡ್ ವಿಧಾನಸಭಾ ಕ್ಷೇತ್ರದಿಂದ ಉಮೇಶ್ಭಾಯ್ ನರನ್ಭಾಯ್, ಗರಿಯಾಧರ್ ಕ್ಷೇತ್ರದಿಂದ ಸುಧೀರಭಾಯಿ ವಘಾನಿ ಮತ್ತು ದೇಡಿಯಾಪಾದ ಕ್ಷೇತ್ರದಿಂದ ಚೈತಾರಾಭಾಯಿ ದಾಮ್ಜಿಭಾಯಿ ಗೆದ್ದಿದ್ದಾರೆ.