ಚಂಡೀಗಢ: ಪಂಜಾಬ್‌ ಶಿಕ್ಷಣ ಸಚಿವ, ಆನಂದ್‌ಪುರ ಸಾಹಿಬ್‌ ಶಾಸಕ ಹರ್ಜೋತ್‌ ಸಿಂಗ್ ಬೈನ್ಸ್‌ (Harjot Singh Bains) ಅವರು ಐಪಿಎಸ್‌ ಅಧಿಕಾರಿ ಜ್ಯೋತಿ ಯಾದವ್‌ ಅವರನ್ನು ಮದುವೆಯಾಗಲಿದ್ದಾರೆ. ಇದರೊಂದಿಗೆ ಪಂಜಾಬ್‌ನಲ್ಲಿ ಆಪ್‌ ಸರ್ಕಾರ ರಚನೆಯಾದ ಬಳಿಕ ದಾಂಪತ್ಯ ಜೀವನಕ್ಕೆ ಕಾಲಿಡುತ್ತಿರುವ ನಾಲ್ಕನೇ ಶಾಸಕ ಎನಿಸಿದ್ದಾರೆ.
ಮೊದಲ ಬಾರಿಗೆ ಶಾಸಕರಾಗಿ ಆಯ್ಕೆಯಾಗಿರುವ ಹರ್ಜೋತ್‌ ಸಿಂಗ್ ಅವರು ಮಾನ್ಸಾ ಜಿಲ್ಲೆಯ ಪೊಲೀಸ್‌ ವರಿಷ್ಠಾಧಿಕಾರಿಯಾಗಿರುವ (SP) ಜ್ಯೋತಿ ಯಾದವ್‌ ಅವರನ್ನು ಮದುವೆಯಾಗಲಿದ್ದಾರೆ. ಕೆಲ ದಿನಗಳ ಹಿಂದಷ್ಟೇ ನಿಶ್ಚಿತಾರ್ಥ ಮಾಡಿಕೊಂಡಿದ್ದು, ಮಾರ್ಚ್‌ ಕೊನೆಯ ವಾರದಲ್ಲಿ ಮದುವೆಯಾಗಲಿದ್ದಾರೆ ಎಂದು ಪಕ್ಷದ ಮೂಲಗಳು ತಿಳಿಸಿವೆ. ಮದುವೆಯಾಗಲಿರುವ ಜೋಡಿಗೆ ವಿಧಾನಸಭೆ ಸ್ಪೀಕರ್‌ ಕುಲ್ತಾರ್‌ ಸಿಂಗ್ ಸಂಧ್ವಾನ್‌ ಶುಭ ಹಾರೈಸಿದ್ದಾರೆ.
ಹರಿಯಾಣ ಮೂಲದ ಐಪಿಎಸ್‌ ಅಧಿಕಾರಿಯಾಗಿರುವ ಜ್ಯೋತಿ ಯಾದವ್‌ ಅವರು ಕಳೆದ ವರ್ಷ ಆಪ್‌ ಶಾಸಕ ರಾಜಿಂದರ್‌ಪಾಲ್‌ ಕೌರ್‌ ಛೀನಾ ಅವರ ಜತೆ ವಾಗ್ವಾದ ಮಾಡಿದ ವಿಡಿಯೊ ವೈರಲ್‌ ಆಗಿತ್ತು. ಇದಾದ ಬಳಿಕ ಯಾದವ್‌ ಅವರು ಸುದ್ದಯಲ್ಲಿದ್ದರು. ಪಂಜಾಬ್‌ನಲ್ಲಿ ಆಪ್‌ ಸರ್ಕಾರ ರಚನೆಯಾದ ಬಳಿಕ ಸಿಎಂ ಭಗವಂತ್‌ ಮಾನ್‌, ಶಾಸಕರಾದ ನರಿಂದರ್‌ ಕೌರ್‌ ಭಾರಜ್‌ ಹಾಗೂ ನರಿಂದರ್‌ಪಾಲ್‌ ಸಿಂಗ್ ಸವಾನ ಅವರು ಮದುವೆಯಾಗಿದ್ದಾರೆ. ಈಗ ಇವರ ಸಾಲಿಗೆ ಹರ್ಜೋತ್‌ ಸಿಂಗ್ ಕೂಡ ಸೇರಲಿದ್ದಾರೆ.
ಇದನ್ನೂ ಓದಿ: Swara Bhaskar: ಸ್ವರಾ ಭಾಸ್ಕರ್- ಫಹಾದ್ ಮದುವೆ ಸಂಭ್ರಮ, ಹಳದಿ ಶಾಸ್ತ್ರ ಹೇಗಿತ್ತು?