ನವ ದೆಹಲಿ: ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ಗೆ (NSA Ajit Doval) ಭದ್ರತೆ ಒದಗಿಸುತ್ತಿದ್ದ ಮೂವರು ಸಿಐಎಸ್ಎಫ್ (Central Industrial Security Force)ಕಮಾಂಡೋಗಳನ್ನು ವಜಾಗೊಳಿಸಲಾಗಿದ್ದು, ಒಬ್ಬನನ್ನು ವರ್ಗಾವಣೆ ಮಾಡಿದ್ದಾಗಿ ಮೂಲಗಳಿಂದ ಮಾಹಿತಿ ಲಭ್ಯವಾಗಿದೆ. ಇದೇ ವರ್ಷ ಫೆಬ್ರವರಿಯಲ್ಲಿ ಆಗಿದ್ದ ಭದ್ರತಾ ಉಲ್ಲಂಘನೆಗೆ ಸಂಬಂಧಪಟ್ಟಂತೆ ಈ ಕ್ರಮ ಕೈಗೊಂಡಿದ್ದಾಗಿ ವರದಿಯಾಗಿದೆ. 2022ರ ಫೆಬ್ರವರಿಯಲ್ಲಿ ವ್ಯಕ್ತಿಯೊಬ್ಬರ ಅಜಿತ್ ದೋವಲ್ ಮನೆಗೆ ನುಗ್ಗಲು ಪ್ರಯತ್ನಿಸಿದ್ದ. ಮನೆಯ ಆವರಣಕ್ಕೂ ಪ್ರವೇಶಿಸಿಬಿಟ್ಟದ್ದ. ಅವನನ್ನು ಮನೆಯೊಳಕ್ಕೆ ಹೋಗದಂತೆ ತಡೆಯಲಾಗಿತ್ತು ಮತ್ತು ನಂತರ ದೆಹಲಿ ಪೊಲೀಸರು ಬಂಧಿಸಿದ್ದರು. ಅಂದಿನ ಭದ್ರತಾ ಲೋಪದ ಕಾರಣಕ್ಕೆ ಈಗ ಮೂವರು ಕಮಾಂಡೋಗಳನ್ನು ಕೆಲಸದಿಂದ ತೆಗೆಯಲಾಗಿದೆ.
ಅಂದು ಅಜಿತ್ ದೋವಲ್ ಮನೆಗೆ ನುಗ್ಗಲು ಯತ್ನಿಸಿದ ವ್ಯಕ್ತಿ ತುಂಬ ನಿಗೂಢವಾಗಿ ಮಾತನಾಡಿದ್ದ. ನನ್ನ ತಲೆಯಲ್ಲಿ ಒಂದು ಚಿಪ್ ಇದೆ. ನನ್ನನ್ನು ಬಾಹ್ಯವಾಗಿ ಯಾರೋ ನಿಯಂತ್ರಿಸುತ್ತಿದ್ದಾರೆ. ಅವರು ಸೂಚನೆಕೊಟ್ಟಂತೆ ನಾನು ಕೆಲಸ ಮಾಡುತ್ತೇನೆ ಎಂದಿದ್ದ. ಬಳಿಕ ಅವನನ್ನು ಎಂಆರ್ಐ ಸ್ಕ್ಯಾನ್ಗೆ ಒಳಪಡಿಸಲಾಗಿತ್ತು. ಆದರೆ ಅಂಥ ಯಾವುದೇ ಚಿಪ್ ಕಂಡುಬಂದಿರಲಿಲ್ಲ. ಈತ ಅಜಿತ್ ದೋವಲ್ ಮನೆಗೆ ಬರುವಾಗ ಕೆಂಪು ಬಣ್ಣದ ಎಸ್ಯುವಿಯನ್ನು ಚಾಲನೆ ಮಾಡಿಕೊಂಡು ಬಂದಿದ್ದ. ದೋವಲ್ ಮನೆ ಸುತ್ತ ಬಿಗಿ ಭದ್ರತೆಯಿದ್ದಾಗ್ಯೂ ಗೇಟ್ ದಾಟಿದ್ದ.
ಆ ವ್ಯಕ್ತಿಯನ್ನು ಶಂತನು ರೆಡ್ಡಿ ಎಂದು ಗುರುತಿಸಲಾಗಿದ್ದು, ಅಂದು ಆತ ದೋವಲ್ ನಿವಾಸಕ್ಕೆ ನುಗ್ಗಲು ಪ್ರಯತ್ನಿಸಿದಾಗ ಅಜಿತ್ ದೋವಲ್ ಮನೆಯಲ್ಲೇ ಇದ್ದರು. ಆಮೇಲೆ ಅವನನ್ನು ಸಂಪೂರ್ಣವಾಗಿ ವಿಚಾರಿಸಿದಾಗ ಗೊತ್ತಾಗಿದ್ದು, ಆತನೊಬ್ಬ ಮಾನಸಿಕ ರೋಗಿ ಎಂದು ಗೊತ್ತಾಗಿತ್ತು. ಕಾರನ್ನು ನೊಯ್ಡಾದಿಂದ ತಂದಿದ್ದಾಗಿಯೂ ಅವನು ಹೇಳಿಕೊಂಡಿದ್ದ. ಆದರೆ Z ಪ್ಲಸ್ ಭದ್ರತೆ ಇದ್ದೂ ಅಂದು ಭದ್ರತೆಯಲ್ಲಿ ಲೋಪ ಆಗಿದ್ದರಿಂದ ಕ್ರಮ ಕೈಗೊಳ್ಳಲಾಗಿದೆ ಎಂದೂ ಮೂಲಗಳಿಂದ ಮಾಹಿತಿ ಲಭ್ಯವಾಗಿದೆ.
ಇದನ್ನೂ ಓದಿ: ಅಜಿತ್ ದೋವಲ್‌ರಿಂದ ಎಚ್ಚರಿಕೆಯ ಮಾತು; ಪಿಎಫ್‌ಐ ನಿಷೇಧಿಸಲು ಮುಸ್ಲಿಂ ಪ್ರಮುಖರ ಆಗ್ರಹ