ಪಂಜಾಬ್ನಲ್ಲಿ ಗ್ಯಾಂಗ್ವಾರ್ ಹೊಸದಲ್ಲ. ಸದ್ಯ ಆ ರಾಜ್ಯದಲ್ಲಿ ಗ್ಯಾಂಗ್ಸ್ಟರ್ಗಳ ವಿರುದ್ಧದ ಕಾರ್ಯಾಚರಣೆ ಚುರುಕುಗೊಳ್ಳುತ್ತಿದೆ. ಈಗಂತೂ ಖಲಿಸ್ತಾನಿ ನಾಯಕ ಅಮೃತ್ಪಾಲ್ ಸಿಂಗ್(Amritpal singh)ಗಾಗಿ ತೀವ್ರ ಶೋಧ ನಡೆಯುತ್ತಿದೆ. ಇತ್ತೀಚಿನ ವರ್ಷಗಳಲ್ಲಿ ಸಾವಕಾಶವಾಗಿ ಪಂಜಾಬ್ನಲ್ಲಿ ಪ್ರಾಬಲ್ಯ ಸಾಧಿಸುತ್ತಿದ್ದ ಅಮೃತ್ಪಾಲ್ ಸಿಂಗ್ ಖಲಿಸ್ತಾನಿ ಗುಂಪಿನ ಹೀರೋನಂತೆ ಬೆಳೆಯುತ್ತಿದ್ದ. ಮಾ.18ರಂದು ಜಲಂಧರ್ನ ನಾಕೋಡರ್ನಲ್ಲಿ ಅವನ ಬಂಧನವಾಯಿತು ಎಂದು ಹೇಳಲಾದರೂ, ಬಳಿಕ ಪೊಲೀಸರು ಹೇಳಿಕೆ ನೀಡಿ, ಆತ ತಪ್ಪಿಸಿಕೊಂಡಿದ್ದಾನೆ. ಹುಡುಕಾಟ ನಡೆಸುತ್ತಿದ್ದೇವೆ ಎಂದು ಹೇಳಿದ್ದಾರೆ. ಇಷ್ಟೆಲ್ಲದರ ಮಧ್ಯೆ ಅಮೃತ್ಪಾಲ್ ಸಿಂಗ್ ಸಹಚರನೊಬ್ಬ ‘ಪೊಲೀಸರು ಸುಳ್ಳು ಹೇಳುತ್ತಿದ್ದಾರೆ. ಅಮೃತ್ಪಾಲ್ ಬಂಧನವಾಗಿದೆ. ಆತನನ್ನು ಗ್ಯಾಂಗ್ಸ್ಟರ್ ಲಾರೆನ್ಸ್ ಬಿಷ್ಣೋಯಿ ಗ್ಯಾಂಗ್ಗೆ ಹಸ್ತಾಂತರ ಮಾಡಲು ಪೊಲೀಸರೇ ಮುಂದಾಗಿದ್ದಾರೆ’ ಎಂದು ಹೇಳಿಕೆ ನೀಡಿದ್ದಾನೆ.
ಇನ್ನು 30 ವರ್ಷದ ಲಾರೆನ್ಸ್ ಬಿಷ್ಣೋಯಿ ಬಹುದೊಡ್ಡ ಗ್ಯಾಂಗ್ಸ್ಟರ್. ಪಂಜಾಬ್ ಅಷ್ಟೇ ಅಲ್ಲ, ಇಡೀ ಉತ್ತರ ಭಾರತದಲ್ಲಿಯೇ ನಟೋರಿಯಸ್ ಎನ್ನಿಸಿಕೊಂಡವ. ಇವನದು ಅತ್ಯಂತ ದೊಡ್ಡ ಗ್ಯಾಂಗ್. ಇವನ ಶೂಟರ್ಗಳು ದೇಶಾದ್ಯಂತ 700ಕ್ಕೂ ಹೆಚ್ಚು ಪ್ರದೇಶಗಳಲ್ಲಿ ಸಕ್ರಿಯರಾಗಿದ್ದಾರೆ ಎಂದೇ ಹೇಳಲಾಗಿದೆ. 20ಕ್ಕೂ ಹೆಚ್ಚು ಕೇಸ್ಗಳನ್ನು ಮೈಮೇಲೆ ಎಳೆದುಕೊಂಡು, ಸದ್ಯ ತಿಹಾರ್ ಜೈಲು ಸೇರಿರುವ ಲಾರೆನ್ಸ್ ಬಿಷ್ಣೋಯಿ, ಅಲ್ಲಿದ್ದುಕೊಂಡೇ ಕೆಲವು ಯೋಜನೆಗಳಿಗೆ ಮಾಸ್ಟರ್ ಮೈಂಡ್ ಆಗಿದ್ದಾನೆ. ಕಳೆದ ವರ್ಷ ಹತ್ಯೆಗೀಡಾದ ಪಂಜಾಬ್ ಗಾಯಕ ಸಿಧು ಮೂಸೆವಾಲಾ ಕೇಸ್ನಲ್ಲಿ ಕೂಡ ಈತನ ಪಾಲಿದೆ ಎನ್ನಲಾಗಿದೆ.
ಲಾರೆನ್ಸ್ಗೂ, ಅಮೃತ್ಪಾಲ್ಗೂ ವೈಷಮ್ಯ?
ಅಮೃತ್ಪಾಲ್ ಸಿಂಗ್ ಮತ್ತು ಲಾರೆನ್ಸ್ ಬಿಷ್ಣೋಯಿ ಮಧ್ಯೆ ವೈಯಕ್ತಿಕ ವೈಷಮ್ಯ ಇರುವ ಬಗ್ಗೆ, ಇವರಿಬ್ಬರ ಶತ್ರುತ್ವಕ್ಕೆ ಇತಿಹಾಸ ಇರುವ ಬಗ್ಗೆ ಎಲ್ಲಿಯೂ ಉಲ್ಲೇಖವಿಲ್ಲ. ಆದರೆ ಈ ಎರಡೂ ನಾಯಕರ ಗ್ಯಾಂಗ್ಗಳು ಪರಸ್ಪರರಿಗೆ ಆಗಿಬರುವುದಿಲ್ಲ. ಲಾರೆನ್ಸ್ ಬಿಷ್ಣೋಯಿ ಈ ಹಿಂದೆ ಹೇಳಿಕೆ ಕೊಟ್ಟಿದ್ದ. ತಾನಂತೂ ಖಲಿಸ್ತಾನ ಸ್ಥಾಪನೆಗೆ ಎಂದೆಂದಿಗೂ ಅವಕಾಶ ಕೊಡುವುದಿಲ್ಲ ಎಂದಿದ್ದ. ಖಲಿಸ್ತಾನ ಹೋರಾಟಗಾರರ ವಿರೋಧಿ ಈತ.
ಅಷ್ಟಲ್ಲದೆ ಲಾರೆನ್ಸ್ ಬಿಷ್ಣೋಯಿ ಮತ್ತು ಅವನ ಗ್ಯಾಂಗ್ನವರು ಸಿಖ್ ವಿರೋಧಿಗಳು ಎಂದೇ ಬಿಂಬಿತರಾಗಿದ್ದಾರೆ. ʼʼತಮ್ಮನ್ನು ವಿರೋಧಿಸುವ ಲಾರೆನ್ಸ್ ಗ್ಯಾಂಗ್ನ್ನು ಸಹಜವಾಗಿಯೇ ಖಲಿಸ್ತಾನಿಗಳೂ ವಿರೋಧಿಸುತ್ತಿದ್ದಾರೆ. ಹೀಗಾಗಿ ಪಂಜಾಬ್ ಪೊಲೀಸರು ಗ್ಯಾಂಗ್ಸ್ಟರ್ಗಳ ಮಧ್ಯೆಯ ವೈಷಮ್ಯವನ್ನು ತಮಗೆ ಲಾಭವಾಗಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಅಮೃತ್ಪಾಲ್ನನ್ನು ಲಾರೆನ್ಸ್ ಗ್ಯಾಂಗ್ಗೆ ಕೊಟ್ಟು ಕೊಲ್ಲುವ ಉದ್ದೇಶವೂ ಅವರದ್ದು ಆಗಿರಬಹುದು. ಅರೆಸ್ಟ್ ಆಗಿಲ್ಲ ಎಂದು ಸುಳ್ಳುಹೇಳಿ, ಸೈಲೆಂಟ್ ಆಗಿಯೇ ಕತೆ ಮುಗಿಸುವ ಹುನ್ನಾರ ಅವರದ್ದುʼʼ ಎಂಬರ್ಥದಲ್ಲಿ ಅಮೃತ್ಪಾಲ್ ಸಹಚರ ಆರೋಪ ಮಾತಾಡಿದ್ದಾನೆ.
ಅಮೃತ್ಪಾಲ್ ಬಗ್ಗೆ ಮಾತಾಡಿದ್ದ ಬಿಷ್ಣೋಯಿ!
ಗ್ಯಾಂಗ್ಸ್ಟರ್ ಲಾರೆನ್ಸ್ ಬಿಷ್ಣೋಯಿ ಜೈಲಿನಲ್ಲಿ ಇದ್ದುಕೊಂಡೇ ಎರಡು ದಿನಗಳ ಹಿಂದೆ ಮಾಧ್ಯಮವೊಂದಕ್ಕೆ ಸಂದರ್ಶನ ಕೊಟ್ಟಿದ್ದ. ಅದರಲ್ಲಿ ಈ ಖಲಿಸ್ತಾನಿ ನಾಯಕ ಅಮೃತ್ಪಾಲ್ ಬಗ್ಗೆ ಆತನನ್ನು ಪ್ರಶ್ನಿಸಿದ್ದಕ್ಕೆ ಉತ್ತರಿಸಿ, ‘ನಾನು ನನ್ನ ಕೆಲಸ ಮಾಡುತ್ತಿದ್ದೇನೆ. ಹಾಗೇ, ಅಮೃತ್ಪಾಲ್ ಅವನ ಕೆಲಸ ಮಾಡಿಕೊಂಡಿರಲಿ. ಆದರೆ ಆತ ಅನಗತ್ಯವಾಗಿ ಗೊಂದಲ-ಗಲಾಟೆ ಸೃಷ್ಟಿಸುತ್ತಿದ್ದಾನೆ’ ಎಂದು ಹೇಳಿದ್ದ.
ತೀಕ್ಷ್ಣವಾಗಿ ಪ್ರತಿಕ್ರಿಯೆ ನೀಡಿದ್ದ ಅಮೃತ್ಪಾಲ್
ಇನ್ನು ಜೈಲಿನಲ್ಲಿ ಇದ್ದ ಗ್ಯಾಂಗ್ಸ್ಟರ್ನನ್ನು ಸಂದರ್ಶಿಸಲು ಮಾಧ್ಯಮಕ್ಕೆ ಅವಕಾಶ ಕೊಟ್ಟ ಪಂಜಾಬ್ ಸರ್ಕಾರವನ್ನು ಅಮೃತ್ಪಾಲ್ ಟೀಕಿಸಿದ್ದ. ಈ ಸರ್ಕಾರಕ್ಕೆ ಬಿಷ್ಣೋಯಿ ಮೇಲೆ ಅಷ್ಟು ಇಷ್ಟ-ನಂಬಿಕೆಯಿದ್ದರೆ ಅವನನ್ನು ಮಂತ್ರಿ ಮಾಡಲಿ’ ಎಂದು ಹೇಳಿದ್ದ.
ಇನ್ನೂ ಅನೇಕ ಸಿಖ್ ಪ್ರಮುಖರು ಲಾರೆನ್ಸ್ ಬಿಷ್ಣೋಯಿ ಇಂಟರ್ವ್ಯೂವ್ನ್ನು ವಿರೋಧಿಸುತ್ತಿದ್ದಾರೆ. ಖಲಿಸ್ತಾನಿಗಳ ಪರ ಸಹಾನುಭೂತಿ ಹೊಂದಿದ್ದ ಗಾಯಕ ಸಿಧು ಮೂಸೆವಾಲಾನನ್ನು ಲಾರೆನ್ಸ್ ಬಿಷ್ಣೋಯಿ ಗ್ಯಾಂಗ್ ಹತ್ಯೆ ಮಾಡಿತ್ತು. ಅದನ್ನೀಗ ಎತ್ತಿ ಆಡುತ್ತಿದ್ದಾರೆ. ಹೀಗೆ ಲಾರೆನ್ಸ್ ಬಿಷ್ಣೋಯಿ ಸಂದರ್ಶನದ ವಿವಾದ ಹೊತ್ತಿಕೊಂಡ ಬೆನ್ನಲ್ಲೇ ಪೊಲೀಸರು ಈಗ ಅಮೃತ್ಪಾಲ್ ಸಿಂಗ್ ಬೆನ್ನುಹತ್ತಿದ್ದಾರೆ. ಇನ್ನೊಂದೆಡೆ ಅವನನ್ನು ಅದಾಗಲೇ ಅರೆಸ್ಟ್ ಮಾಡಿದ್ದಾಗಿದೆ ಎಂದು ಸಹಚರನೊಬ್ಬ ಹೇಳುತ್ತಿದ್ದಾನೆ. ಪಂಜಾಬ್ನಲ್ಲಂತೂ ಸದ್ಯ ಉದ್ವಿಗ್ನ ಪರಿಸ್ಥಿತಿ ಇದ್ದು, ಇಂಟರ್ನೆಟ್ ಸೇವೆಗಳೆಲ್ಲ ಸ್ಥಗಿತಗೊಂಡಿವೆ.