ಅಕ್ರಮ ಸಂಬಂಧಗಳು, ಅಶ್ಲೀಲ ಚಾಟ್​, ವಿಡಿಯೊ ಕಾಲ್​ನಲ್ಲಿ ಕಿಸ್​​; ಖಲಿಸ್ತಾನಿ ನಾಯಕ ಅಮೃತ್​ಪಾಲ್ ಸಿಂಗ್​​ನ ಕೊಳಕು ಜೀವನ

ಖಲಿಸ್ತಾನ ಬೇಕೆಂದು ಹೋರಾಟ ಮಾಡುವ ನೆಪದಲ್ಲಿ ಹಿಂಸಾಚಾರ ಪ್ರಚೋದಿಸುತ್ತ, ಪಾಕಿಸ್ತಾನದ ಗುಪ್ತಚರ ಇಲಾಖೆ ಐಎಸ್​ಐನ ಕೈಗೊಂಬೆಯಾಗಿ ಕುಣಿಯುತ್ತಿದ್ದ ಅಮೃತ್​ಪಾಲ್​ ಸಿಂಗ್ (Amritpal Singh)​ ಯಾವುದೇ ಕ್ಷಣದಲ್ಲಾದರೂ ಬಂಧಿತನಾಗಬಹುದು. ನಾಕೋಡರ್​ ಬಳಿ ಅಮೃತ್​ಪಾಲ್​ ಪೊಲೀಸರಿಂದ ತಪ್ಪಿಸಿಕೊಂಡ ಬಳಿಕ ಆತನ 7 ಫೋಟೋಗಳನ್ನು ಪೊಲೀಸರು ಬಿಡುಗಡೆ ಮಾಡಿದ್ದಾರೆ. ಅವನ ಬಗ್ಗೆ ಹಲವು ಮಾಹಿತಿಗಳನ್ನೂ ಹಂಚಿಕೊಂಡಿದ್ದಾರೆ.

ಇನ್ನೊಂದೆಡೆ ಹಲವು ರಾಷ್ಟ್ರೀಯ ಮಾಧ್ಯಮಗಳು ಕೂಡ ಅಮೃತ್​ಪಾಲ್​ ಬಗ್ಗೆ ಮಹತ್ವದ ವರದಿ ಮಾಡಿವೆ.
ಒಂದೆಡೆ ಹಿಂಸಾಚಾರ ಪ್ರಚೋದನೆ ಮಾಡುತ್ತ, ಹೋರಾಟದ ಮಾತುಗಳನ್ನು ಆಡುತ್ತ, ಕೈಯಲ್ಲಿ ಮಾರಕಾಸ್ತ್ರ ಹಿಡಿದಿರುತ್ತಿದ್ದ ಅಮೃತ್​ಪಾಲ್​ ಖಾಸಗಿ ಜೀವನ ಹೇಗಿತ್ತು? ಆತನೊಬ್ಬ ಮಹಾನ್​ ವಿಲಾಸಿಯಾಗಿದ್ದ. ಅವನು ಹಲವು ಯುವತಿಯರು/ಮಹಿಳೆಯರೊಂದಿಗೆ ವಾಟ್ಸ್​​ಆ್ಯಪ್​, ಇನ್​ಸ್ಟಾಗ್ರಾಂನಲ್ಲಿ ಅಶ್ಲೀಲ ಚಾಟ್​ ಮಾಡುತ್ತಿದ್ದ. ವಿಡಿಯೊ ಕಾಲ್​ ಮಾಡುತ್ತಿದ್ದ. ಅದರಲ್ಲಿ ಮಹಿಳೆಯರೊಟ್ಟಿಗೆ ಚುಂಬನ, ಅಶ್ಲೀಲ ಮಾತುಗಳು ನಡೆಯುತ್ತಿದ್ದವು. ಆತನಿಗೆ ಇದೇ ಫೆಬ್ರವರಿಯಲ್ಲಿ ಮದುವೆಯಾಗಿತ್ತು. ಆದರೆ ಅದರಾಚೆ ಹಲವು ಯುವತಿಯರು/ಮದುವೆಯಾದ ಮಹಿಳೆಯರೊಂದಿಗೆ ವಿವಾಹೇತರ ಸಂಬಂಧ ಹೊಂದಿದ್ದ ಎಂದು ಇಂಡಿಯಾ ಟುಡೆ ವರದಿ ಮಾಡಿದೆ. ಅಷ್ಟೇ ಅಲ್ಲ, ತಾನು ಲೈಂಗಿಕ ಸಂಪರ್ಕ ಬೆಳೆಸಿದ ಮಹಿಳೆಯರ ಅಶ್ಲೀಲ ವಿಡಿಯೊ ಮಾಡಿಟ್ಟುಕೊಂಡು, ಅವರಿಗೆ ಬ್ಲ್ಯಾಕ್​ ಮೇಲೆ ಮಾಡುತ್ತಿದ್ದ ಎಂದೂ ಹೇಳಿದೆ.

ಇದನ್ನೂ ಓದಿ: Amritpal Singh: ತ್ರಿಚಕ್ರ ವಾಹನದಲ್ಲಿ ಬೈಕ್​​ನೊಂದಿಗೆ ಕುಳಿತ ಅಮೃತ್​ಪಾಲ್​ ಸಿಂಗ್​; ಇನ್ನೊಂದು ಫೋಟೋ ವೈರಲ್​​

ಅಮೃತ್​ಪಾಲ್​ ಮಹಿಳೆಯರಿಗೆ ಮಾಡಿದ ಮೆಸೇಜ್​, ಕಳಿಸಿದ ಸುಮಾರು 12 ವೈಸ್​ನೋಟ್​​ಗಳು ತಮಗೆ ಸಿಕ್ಕಿದ್ದಾಗಿ ಇಂಡಿಯಾ ಟುಡೆ ತಿಳಿಸಿದೆ. ‘ನಾನು ಯಾವುದೇ ಮಹಿಳೆಯೊಂದಿಗೆ ಗಂಭೀರವಾಗಿ ಸಂಬಂಧ ಬೆಳೆಸಲು ಇಷ್ಟಪಡುವುದಿಲ್ಲ. ಆಯಾ ಸಂದರ್ಭಕ್ಕಷ್ಟೇ ಸ್ನೇಹ ಬಯಸುತ್ತೇನೆ’ ಎಂದು ಅಮೃತ್​ಪಾಲ್ ಹೇಳಿದ್ದನ್ನು ಒಂದು ವೈಸ್​ ನೋಟ್​​ನಲ್ಲಿ ಕೇಳಬಹುದು. ಹಾಗೇ, ಇನ್ನೊಂದರಲ್ಲಿ ‘ಮಹಿಳೆಯೊಬ್ಬರು ನನ್ನ ಜತೆ ಅಫೇರ್ ಇಟ್ಟುಕೊಳ್ಳಲು ಬಯಸುತ್ತಿದ್ದಾರೆ. ಅವರಿಗೆ ಮದುವೆಯಾಗಿದೆ, ನನ್ನೊಂದಿಗೆ ಸಂಬಂಧ ಬೆಳೆಸಿದರೆ, ಅವರ ವಿವಾಹದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಆಕೆ ಹೇಳುತ್ತಿದ್ದಾಳೆ’ ಎಂದು ಹೇಳಿದ್ದಾನೆ ಎಂದು ವರದಿಯಾಗಿದೆ. ಇನ್​ಸ್ಟಾಗ್ರಾಂನಲ್ಲಿ ಮಹಿಳೆಯೊಬ್ಬಳ ಜತೆ ಚಾಟ್​ ಮಾಡುತ್ತ ‘ನಮ್ಮ ಸಂಬಂಧ ದೃಢಪಟ್ಟಿತಲ್ಲವಾ? ಅಂದರೆ, ನಮ್ಮ ಹನಿಮೂನ್​ ದುಬೈನಲ್ಲಾ’ ಎಂದು ಈತ ಮೆಸೇಜ್​ ಮಾಡಿದ್ದಾನೆ. ಅದಕ್ಕೆ ಮಹಿಳೆ ನಗುವಿನ ಇಮೋಜಿ ಹಾಕಿ ಪ್ರತಿಕ್ರಿಯೆ ನೀಡಿದ್ದಾಳೆ ಎನ್ನಲಾಗಿದೆ.

ಪಂಜಾಬ್​ ಪೊಲೀಸರು ಸದ್ಯ ಅಮೃತ್​ಪಾಲ್​​ ಬಂಧನಕ್ಕೆ ಬಲೆಬೀಸಿದ್ದಾರೆ. ಮಾರ್ಚ್​ 18ರಂದು ಅವನನ್ನು ಅರೆಸ್ಟ್ ಮಾಡಲು, ಪೊಲೀಸರ ತಂಡ ಇನ್ನಿಲ್ಲದ ಪ್ರಯತ್ನ ಮಾಡಿತ್ತು. ಆದರೆ ಅವನು ಅಲ್ಲಿಂದ ಪರಾರಿಯಾಗಿದ್ದಾನೆ. ಪೊಲೀಸರು ಈಗಾಗಲೇ ಅಮೃತ್​​ಪಾಲ್ ಹುಟ್ಟೂರಿಗೆ ತೆರಳಿ ಅಲ್ಲಿದ್ದ ಅವನ ಪತ್ನಿ ಮತ್ತು ತಾಯಿಯನ್ನೂ ವಿಚಾರಣೆ ಮಾಡಿದ್ದಾರೆ. ಆದರೆ ಅವನ ಸುಳಿವು ಸಿಕ್ಕಿಲ್ಲ.