ಶ್ರೀನಗರ: ಕಳೆದ ಮೂರು ದಿನಗಳ ಹಿಂದೆ ಜಮ್ಮು-ಕಾಶ್ಮೀರದ ಅನಂತ್ನಾಗ್ ಜಿಲ್ಲೆಯ ತಂಗ್ಪಾವಾ ಎಂಬಲ್ಲಿ ಭದ್ರತಾ ಪಡೆಗಳು ಮತ್ತು ಉಗ್ರರ ನಡುವೆ ನಡೆದಿದ್ದ ಗುಂಡಿನಚಕಮಕಿಯಲ್ಲಿ, ಉಗ್ರರ ಗುಂಡಿನಿಂದ ತೀವ್ರ ಗಾಯಗೊಂಡಿದ್ದ ಸೇನಾ ಫೈಟರ್ ಶ್ವಾನ ಜೂಮ್ ಇಂದು ಮಧ್ಯಾಹ್ನ ಮೃತಪಟ್ಟಿದೆ. ಅಂದು ಎರಡು ಗುಂಡು ತಗುಲಿ, ತೀವ್ರವಾಗಿ ಗಾಯಗೊಂಡಿದ್ದ ಶ್ವಾನಕ್ಕೆ ಶ್ರೀನಗರದ 54 ಅಡ್ವಾನ್ಸ್ ಫೀಲ್ಡ್ ಪಶು ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿತ್ತು.
ತಂಗ್ಪಾವಾದಲ್ಲಿ ಭಾನುವಾರ (ಅ.9)ರಾತ್ರಿಯಿಂದಲೇ ಭದ್ರತಾ ಪಡೆಗಳು ಉಗ್ರರ ವಿರುದ್ಧ ಕಾರ್ಯಾಚರಣೆ ಪ್ರಾರಂಭ ಮಾಡಿದ್ದವು. ಅಲ್ಲಿ ಭಯೋತ್ಪಾದಕರು ಅಡಗಿದ್ದಾರೆಂಬ ಖಚಿತ ಮಾಹಿತಿ ಪಡೆದೇ ಆ ಪ್ರದೇಶವನ್ನು ಸುತ್ತುವರಿದಿದ್ದರು. ಈ ಕಾರ್ಯಾಚರಣೆಯಲ್ಲಿ ಸೇನಾ ಶ್ವಾನ ಜೂಮ್ ಕೂಡ ಪಾಲ್ಗೊಂಡಿತ್ತು. ಅದರ ದೇಹಕ್ಕೆ ಎರಡು ಗುಂಡುಗಳು ತಗುಲಿದ್ದವು. ಹಾಗಿದ್ದಾಗ್ಯೂ ಅದು ಹೋರಾಟ ಮುಂದುವರಿಸಿತ್ತು. ಇಂದು ಜೂಮ್ ಮೃತಪಟ್ಟಿದ್ದನ್ನು ಸೇನಾಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ‘ಜೂಮ್ ಇಂದು ಮಧ್ಯಾಹ್ನ 11.45ರ ಹೊತ್ತಿಗೆ ಜೋರಾಗಿ ಏದುಸಿರು ಬಿಡುತ್ತ ಕುಸಿದುಬಿದ್ದ. 12 ಗಂಟೆವರೆಗೂ ಚಿಕಿತ್ಸೆ ನೀಡಲಾಯಿತು. ಅಂತಿಮವಾಗಿ ಮಧ್ಯಾಹ್ನ 12ಗಂಟೆಗೆ ಅದರ ಜೀವ ಹೋಯಿತು’ ಎಂದು ತಿಳಿಸಿದ್ದಾರೆ.
ಗುಂಡು ಬಿದ್ದಿದ್ದು ಹೇಗೆ?
ತಂಗ್ಪಾವಾದ ಮನೆಯೊಂದರಲ್ಲಿ ಭಯೋತ್ಪಾದಕರು ಅಡಗಿದ್ದರು. ಆ ಮನೆಗೆ ನುಗ್ಗಿ, ಅವರ ಮೇಲೆ ದಾಳಿ ಮಾಡುವಂತೆ ಸೇನಾಧಿಕಾರಿಗಳು ಜೂಮ್ಗೆ ಆದೇಶಿಸಿದರು. ಆಗ ಜೂಮ್ ಮನೆಯೊಳಕ್ಕೆ ಓಡಿತ್ತು. ಅಷ್ಟರಲ್ಲಿ ಉಗ್ರರು ಶ್ವಾನಕ್ಕೆ ಗುಂಡು ಹೊಡೆದಿದ್ದರು. ಆದರೂ ಅದು ಮುನ್ನುಗ್ಗಲು ಪ್ರಯತ್ನ ಮಾಡುತ್ತಿತ್ತು. ಅಲ್ಲಿಂದ ಶ್ವಾನವನ್ನು ಶ್ರೀನಗರಕ್ಕೆ ಕರೆತರಲಾಗಿತ್ತು. ಇದೇ ಎನ್ಕೌಂಟರ್ನಲ್ಲಿ ಭದ್ರತಾಪಡೆ ಸಿಬ್ಬಂದಿ ಇಬ್ಬರು ಭಯೋತ್ಪಾದಕರನ್ನು ಹತ್ಯೆ ಮಾಡಿದ್ದಾರೆ.
ಇದನ್ನೂ ಓದಿ: ಟಿಕ್‌ಟಾಕ್‌ ನಟಿಯನ್ನು ಕಾಶ್ಮೀರದಲ್ಲಿ ಹತ್ಯೆ ಮಾಡಿದ ಭಯೋತ್ಪಾದಕರು