ಬರೇಲಿ: ಈಗೊಂದು ವಾರದ ಹಿಂದೆ ಉತ್ತರ ಪ್ರದೇಶದ ಬರೇಲಿ ಜಂಕ್ಷನ್ ರೈಲ್ವೆ ಸ್ಟೇಶನ್ನಲ್ಲಿ, ರೈಲು ಹತ್ತಲು ಬಂದ ಸೈನಿಕನನ್ನು ಟಿಟಿಇ (ಟಿಕೆಟ್ ಪರಿವೀಕ್ಷಕ) ಪ್ಲಾಟ್ಫಾರ್ಮ್ಗೆ ನೂಕಿದ್ದ. ಇದರಿಂದಾಗಿ ಆತ ಚಲಿಸುತ್ತಿರುವ ರೈಲು ಮತ್ತು ಪ್ಲಾಟ್ಫಾರ್ಮ್ ಮಧ್ಯದ ಜಾಗದಲ್ಲಿ ಸಿಲುಕಿ ಎರಡೂ ಕಾಲುಗಳನ್ನು ಕಳೆದುಕೊಂಡಿದ್ದಲ್ಲದೆ, ಗಂಭೀರವಾಗಿ ಗಾಯಗೊಂಡಿದ್ದರು. ಒಂದುವಾರ ಜೀವನ್ಮರಣದ ಹೋರಾಟ ನಡೆಸಿದ ಆ ಯೋಧನೀಗ ಮರಣಹೊಂದಿದ್ದಾರೆ.
ಮೃತ ಯೋಧನ ಹೆಸರು ಸೋನು ಕುಮಾರ್. ಕಳೆದ ಗುರುವಾರ ಬರೇಲಿಯಿಂದ ದೆಹಲಿಗೆ ಹೊರಟಿದ್ದ ಅವರು ಬರೇಲಿ ರೈಲ್ವೆ ಸ್ಟೇಶನ್ನ ಪ್ಲಾಟ್ಫಾರ್ಮ್ನಲ್ಲಿ ದಿಬ್ರುಗಢ್-ನವ ದೆಹಲಿ ರಾಜಧಾನಿ ಎಕ್ಸ್ಪ್ರೆಸ್ ರೈಲು ಹತ್ತಲು ಮುಂದಾಗಿದ್ದರು. ಆಗ ರೈಲು ನಿಧಾನಕ್ಕೆ ಚಲಿಸಲು ಶುರು ಮಾಡಿತ್ತು. ಯೋಧ ಸೋನು ಕುಮಾರ್ ಮತ್ತು ಟಿಟಿಇ ನಡುವೆ ಟಿಕೆಟ್ ವಿಚಾರಕ್ಕೆ ಜಗಳವಾಗುತ್ತಿತ್ತು. ಕೋಪಗೊಂಡಿದ್ದ ಟಿಟಿಇ, ಸೈನಿಕನನ್ನು ತಳ್ಳಿದ್ದ. ಇದರಿಂದಾಗಿ ಸೋನು ಗಂಭೀರವಾಗಿ ಗಾಯಗೊಂಡಿದ್ದರು. ಮಿಲಿಟರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು.
ಅಂದು ಯೋಧನನ್ನು ತಳ್ಳಿದ್ದ ಟಿಟಿಇ ಸುಪಾನ್ ಬೋರ್ ನಾಪತ್ತೆಯಾಗಿದ್ದಾನೆ. ಆತನ ವಿರುದ್ಧ ಕೊಲೆ ಯತ್ನ ಪ್ರಕರಣ ದಾಖಲು ಮಾಡಿದ್ದೇವೆ. ಸಿಸಿಟಿವಿ ಫೂಟೇಜ್ಗಳನ್ನೂ ಪರಿಶೀಲನೆ ಮಾಡಿದ್ದೇವೆ ಎಂದು ಉತ್ತರ ರೈಲ್ವೆ ವಲಯದ ಮೊರಾದಾಬಾದ್ ವಿಭಾಗದ ಹಿರಿಯ ಫೈನಾನ್ಸ್ ಮ್ಯಾನೇಜರ್ ಸುಧೀರ್ ಸಿಂಗ್ ಹೇಳಿದ್ದಾರೆ. ‘ಘಟನೆ ನಡೆದ ದಿನ ಟಿಟಿಇಯನ್ನು ಪ್ರಯಾಣಿಕರೇ ಹಿಡಿದು ಥಳಿಸಿದ್ದಾರೆ. ಅದಾದ ಮೇಲೆ ಆತ ಅಲ್ಲಿಂದ ತಪ್ಪಿಸಿಕೊಂಡಿದ್ದಾನೆ. ಆತನ ಪತ್ತೆ ಕಾರ್ಯಾಚರಣೆ ನಡೆಸುತ್ತಿದ್ದೇವೆ’ ಎಂದು ರೈಲ್ವೆ ಪೊಲೀಸ್ ಅಧಿಕಾರಿ ಅಜಿತ್ ಪ್ರತಾಪ್ ಸಿಂಗ್ ತಿಳಿಸಿದ್ದಾರೆ.
ಇದನ್ನೂ ಓದಿ: ರೈಲು ಹತ್ತಲು ಬಂದ ಸೈನಿಕನನ್ನು ತಳ್ಳಿದ ಟಿಟಿಇ; ಎರಡೂ ಕಾಲು ಕಳೆದುಕೊಂಡು, ಜೀವನ್ಮರಣ ಹೋರಾಟ ನಡೆಸುತ್ತಿರುವ ಯೋಧ