ಪಣಜಿ: ರಷ್ಯಾದ ಮಾಸ್ಕೋದಿಂದ ಗೋವಾಕ್ಕೆ ಆಗಮಿಸುತ್ತಿದ್ದ ವಿಮಾನದಲ್ಲಿ ಬಾಂಬ್ ಇದೆ ಎಂಬ ಬೆದರಿಕೆ ಬಂದ ಹಿನ್ನೆಲೆಯಲ್ಲಿ, ಆ ವಿಮಾನವನ್ನು ಉಜ್ಬೇಕಿಸ್ತಾನ್ ಏರ್ಪೋರ್ಟ್ಗೆ ತೆಗೆದುಕೊಂಡು ಹೋಗಿ ಲ್ಯಾಂಡ್ ಮಾಡಲಾಗಿದೆ.
ಅಜುರ್ ಏರ್ಲೈನ್ಸ್ಗೆ ಸೇರಿದ ವಿಮಾನ 240 ಮತ್ತು 7 ಸಿಬ್ಬಂದಿಯನ್ನು ಹೊತ್ತು ಮಾಸ್ಕೋದಿಂದ ಶುಕ್ರವಾರ ರಾತ್ರಿ ಗೋವಾದೆಡೆಗೆ ಬರುತ್ತಿತ್ತು. ಈ ವಿಮಾನದಲ್ಲಿ ಎರಡು ನವಜಾತ ಶಿಶುಗಳೂ ಇದ್ದವು. ಶನಿವಾರ ಮುಂಜಾನೆ 4.15ರ ಹೊತ್ತಿಗೆ ಈ ವಿಮಾನ ಗೋವಾದ ದಾಬೋಲಿಮ್ ಏರ್ಪೋರ್ಟ್ನಲ್ಲಿ ಲ್ಯಾಂಡ್ ಆಗಬೇಕಿತ್ತು. ಆದರೆ ಅಲ್ಲಿಂದ ಹೊರಟ ಕೆಲವೇ ಹೊತ್ತಲ್ಲಿ, ಅಂದರೆ ಸುಮಾರು ಶುಕ್ರವಾರ ಮಧ್ಯರಾತ್ರಿ 12.30ರ ಹೊತ್ತಿಗೆ ದಾಬೋಲಿಮ್ ಏರ್ಪೋರ್ಟ್ ನಿರ್ದೇಶಕನಿಗೆ ಇಮೇಲ್ ಸಂದೇಶವೊಂದು ಬಂದಿದೆ. ದಾಬೋಲಿಮ್ನಲ್ಲಿ ಲ್ಯಾಂಡ್ ಆಗಬೇಕಿದ್ದ ವಿಮಾನದಲ್ಲಿ ಬಾಂಬ್ ಇರುವುದಾಗಿ ಅದರಲ್ಲಿ ಉಲ್ಲೇಖಿಸಲಾಗಿತ್ತು. ತಕ್ಷಣ ಅಲರ್ಟ್ ಆಗಿ, ವಿಮಾನ ಭಾರತೀಯ ವಾಯುಪ್ರದೇಶ ಪ್ರವೇಶ ಮಾಡುವುದನ್ನು ತಡೆದು, ಅದನ್ನು ಉಜ್ಬೇಕಿಸ್ತಾನಕ್ಕೆ ಕಳಿಸಲಾಗಿದೆ ಎಂದು ಮಾಹಿತಿ ಲಭ್ಯವಾಗಿದೆ. ಬಳಿಕ ಏನಾಯಿತು ಎಂಬ ಬಗ್ಗೆ ಮಾಹಿತಿ ಇಲ್ಲ.
ಇತ್ತೀಚೆಗಷ್ಟೇ ಇದೇ ಅಜುರ್ ಏರ್ಲೈನ್ಸ್ಗೆ ಸೇರಿದ, ಮಾಸ್ಕೋದಿಂದ ಗೋವಾಕ್ಕೆ ಬರುತ್ತಿದ್ದ ವಿಮಾನವೊಂದಕ್ಕೆ ಬಾಂಬ್ ಬೆದರಿಕೆ ಕರೆ ಬಂದಿತ್ತು. ಭಾರತದಲ್ಲಿದ್ದ ರಷ್ಯಾದ ರಾಯಭಾರಿ ಕಚೇರಿಗೆ ಇಮೇಲ್ ಸಂದೇಶ ಬಂದು, ಬಳಿಕ ಅಲ್ಲಿನ ಅಧಿಕಾರಿಗಳು ಗೋವಾ ಏರ್ಪೋರ್ಟ್ಗೆ ಮಾಹಿತಿ ನೀಡಿದ್ದರು. 236 ಪ್ರಯಾಣಿಕರು ಇದ್ದ ಆ ವಿಮಾನವನ್ನು ಕೂಡಲೇ ಗುಜರಾತ್ನ ಜಮ್ನಾಗರ್ನಲ್ಲಿರುವ ಏರ್ಫೋರ್ಸ್ ನೆಲೆಗೆ ತೆಗೆದುಕೊಂಡು ಹೋಗಿ ಲ್ಯಾಂಡ್ ಮಾಡಿಸಲಾಗಿತ್ತು. ವಿಮಾನವನ್ನು ಪರಿಶೀಲನೆ ಮಾಡಿದ ಬಳಿಕ, ಅದೊಂದು ಹುಸಿ ಕರೆ ಎಂದು ಸ್ಪಷ್ಟವಾಗಿತ್ತು. ಆದರೂ ಆ ವಿಮಾನವನ್ನು ಮರುದಿನವೇ ಅಲ್ಲಿಂದ ಟೇಕ್ ಆಫ್ ಮಾಡಿಸಲಾಗಿತ್ತು.