ಕೊವಿಡ್ 19 ವಿರುದ್ಧ ಹೋರಾಟಕ್ಕೆ ಭಾರತಕ್ಕೆ ಮತ್ತೊಂದು ಬಲ ಸಿಕ್ಕಿದೆ. ಭಾರತ್ ಬಯೋಟೆಕ್ ಸಂಸ್ಥೆ ಅಭಿವೃದ್ಧಿ ಪಡಿಸಿರುವ, ಮೂಗಿನ ಮೂಲಕ ನೀಡುವ ಲಸಿಕೆಗೆ (Chimpanzee Adenovirus Vectored Nasal Vaccine-ಚಿಂಪಾಂಜಿ ಅಡೆನೊವೈರಸ್ ವೆಕ್ಟರ್ಡ್) ಕೇಂದ್ರೀಯ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆ (CDSCO) ಅನುಮೋದನೆ ನೀಡಿದೆ. ಈ ಬಗ್ಗೆ ಕೇಂದ್ರ ಆರೋಗ್ಯ ಸಚಿವ ಮನ್ಸುಖ್ ಮಾಂಡವಿಯಾ ಟ್ವೀಟ್ ಮಾಡಿದ್ದು ‘ಭಾರತ್ ಬಯೋಟೆಕ್ನ ಚಿಂಪಾಂಜಿ ಅಡೆನೊವೈರಸ್ ವೆಕ್ಟರ್ಡ್ ಮರುಸಂಯೋಜಿತ ಕೊವಿಡ್ 19 ಲಸಿಕೆಗೆ CDSCO ಅನುಮೋದನೆ ನೀಡಿದೆ. ಇದೊಂದು ಮೂಗಿನ ಮೂಲಕ ತೆಗೆದುಕೊಳ್ಳುವ ಲಸಿಕೆಯಾಗಿದೆ. 18 ವರ್ಷ ಮೇಲ್ಪಟ್ಟವರಿಗೆ ತುರ್ತು ಪರಿಸ್ಥಿತಿಯಲ್ಲಿ ನಿರ್ಬಂಧಿತ ಬಳಕೆ ಮಾಡಬಹುದಾಗಿದೆ’ ಎಂದು ಹೇಳಿದ್ದಾರೆ.
ಭಾರತ್ ಬಯೋಟೆಕ್ ಈಗಾಗಲೇ ಕೊರೊನಾ ವಿರುದ್ಧ ಕೊವ್ಯಾಕ್ಸಿನ್ ಎಂಬ ಲಸಿಕೆಯನ್ನು ಅಭಿವೃದ್ಧಿಪಡಿಸಿದೆ. ಕಳೆದ ವರ್ಷ ಜನವರಿಯಿಂದಲೂ ದೇಶದೆಲ್ಲೆಡೆ ಕೊವ್ಯಾಕ್ಸಿನ್ ಲಸಿಕೆಯನ್ನು ಜನರಿಗೆ ನೀಡಲಾಗುತ್ತಿದೆ. ಅದು ಇಂಜೆಕ್ಷನ್ ಟ್ಯೂಬ್ನಲ್ಲಿ ಕೈಯಿಗೆ ನೀಡುವ ಲಸಿಕೆಯಾಗಿದ್ದು, ಇದೇ ಮೊದಲ ಬಾರಿಗೆ ಇಂಟ್ರಾನೇಸಲ್ ಲಸಿಕೆ (BBV154) ಅಭಿವೃದ್ಧಿ ಪಡಿಸಲಾಗಿದ್ದು, ಅದನ್ನು ಮೂಗಿನ ಮೂಲಕ ಕೊಡಲಾಗುತ್ತದೆ.
ಕೊವಿಡ್ 19 ಇಂಟ್ರಾನೇಸಲ್ ಕೊವಿಡ್ 19 ಲಸಿಕೆಯ ಮೂರನೇ ಹಂತದ ಕ್ಲಿನಿಕಲ್ ಪ್ರಯೋಗ ಕಳೆದ ತಿಂಗಳು ಮುಗಿದಿತ್ತು. ತಾವು ಈ ಲಸಿಕೆಯ ಪ್ರಾಥಮಿಕ ಡೋಸ್ ಮತ್ತು ಬೂಸ್ಟರ್ ಡೋಸ್ಗೆ ಸಂಬಂಧಪಟ್ಟು ಪ್ರತ್ಯೇಕ ಪ್ರಯೋಗಗಳನ್ನು ನಡೆಸಿದ್ದಾಗಿ ಭಾರತ್ ಬಯೋಟೆಕ್ ಹೇಳಿಕೊಂಡಿದೆ. ಈ ನೇಸಲ್ ಲಸಿಕೆ ಸುರಕ್ಷಿತವಾಗಿದೆ ಎಂದು ಎಲ್ಲ ಹಂತದಲ್ಲೂ ಸಾಬೀತಾಗಿದೆ. ಪ್ರಯೋಗ ಫಲಿತಾಂಶದ ವರದಿಗಳು, ದಾಖಲೆಯನ್ನು ಕೇಂದ್ರೀಯ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆಗೆ ಸಲ್ಲಿಸಿ, ಅನುಮತಿಗೆ ಮನವಿ ಮಾಡಲಾಗಿದೆ ಎಂದೂ ಕಂಪನಿ ತಿಳಿಸಿತ್ತು.
ಇದನ್ನೂ ಓದಿ: Anocovax: ಭಾರತದಲ್ಲಿ ಪ್ರಾಣಿಗಳಿಗೂ ಬಂತು ಕೊವಿಡ್ 19 ಲಸಿಕೆ; ಕೃಷಿ ಸಚಿವರಿಂದ ಬಿಡುಗಡೆ