ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ (Bihar Chief Minister Nitish Kumar) ಅವರ ಭದ್ರತೆಯಲ್ಲಿ ದೊಡ್ಡಮಟ್ಟದ ಲೋಪವಾಗಿದೆ. ಇಂದು ಮುಂಜಾನೆ ಅವರು ವಾಕಿಂಗ್ ಹೋಗಿದ್ದಾಗ ಬೈಕ್ವೊಂದು ವೇಗವಾಗಿ ಬಂದು, ನಿತೀಶ್ ಕುಮಾರ್ ಬೆಂಗಾವಲು ಸಿಬ್ಬಂದಿಯ ಮಧ್ಯೆಯೇ ನುಗ್ಗಿದೆ. ಪ್ರತಿದಿನ ವಾಕಿಂಗ್ ಮಾಡುವ ಸಿಎಂ ನಿತೀಶ್ ಕುಮಾರ್ ಇಂದು ಮುಂಜಾನೆ ಕೂಡ ಎಂದಿನಂತೆ ತಮ್ಮ ಮನೆಯಿಂದ ಹೊರಟು, ಸರ್ಕ್ಯುಲರ್ ರಸ್ತೆ ಮಾರ್ಗವಾಗಿ ಸರ್ಕ್ಯುಲರ್ ಹೌಸಿಂಗ್ನತ್ತ ಹೊರಟಿದ್ದರು. ಅವರ ಸುತ್ತಲೂ ಭದ್ರತಾ ಸಿಬ್ಬಂದಿ ಇದ್ದರು. ಆದರೆ ಬೈಕ್ವೊಂದು ವೇಗವಾಗಿ ಬಂದು, ಅವರ ಸೆಕ್ಯೂರಿಟಿ ಸಿಬ್ಬಂದಿಯನ್ನು ದಾಟಿದೆ. ಈ ಬೈಕ್ನಲ್ಲಿ ಇಬ್ಬರು ಇದ್ದರು. ಅವರಿಬ್ಬರನ್ನೂ ಪೊಲೀಸರು ಅರೆಸ್ಟ್ ಮಾಡಿದ್ದಾರೆ.
ಈ ಬಗ್ಗೆ ಪೊಲೀಸ್ ಅಧಿಕಾರಿಯೊಬ್ಬರು ಪ್ರತಿಕ್ರಿಯೆ ನೀಡಿ ‘ಸರ್ಕ್ಯೂಲರ್ ರಸ್ತೆ ಬಳಿ ಬೆಳಗಿನ ವಾಕ್ ಮಾಡುತ್ತಿದ್ದ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರು ಬೈಕ್ ಅಪಘಾತದಿಂದ ಸ್ವಲ್ಪದರಲ್ಲೇ ಪಾರಾಗಿದ್ದಾರೆ. ಇಬ್ಬರು ಯುವಕರಿದ್ದ ಬೈಕ್ ಸಿಎಂ ಸೆಕ್ಯೂರಿಟಿ ಸಿಬ್ಬಂದಿಯ ಮಧ್ಯೆಯೇ ನುಗ್ಗಿ ಬಂತು. ತಮ್ಮನ್ನು ತಾವು ಅಪಾಯದಿಂದ ಪಾರು ಮಾಡಿಕೊಳ್ಳಲು, ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರು ತಾವು ನಡೆಯುತ್ತಿದ್ದ ರಸ್ತೆ ಬಿಟ್ಟು ಫೂಟ್ಪಾತ್ಗೆ ಜಿಗಿದಿದ್ದಾರೆ’ ಎಂದು ಹೇಳಿದ್ದಾರೆ. ಇನ್ನು ಸೀ ಸರ್ಕ್ಯುಲರ್ ರಸ್ತೆಯಲ್ಲಿ ಸಿಎಂ ನಿತೀಶ್ ಕುಮಾರ್ ನಿವಾಸ, ಮಾಜಿ ಸಿಎಂ ರಾಬ್ರಿ ದೇವಿ ಮನೆ ಸೇರಿ ಹಲವು ರಾಜಕಾರಣಿಗಳ ಮನೆಗಳು ಇವೆ.
ಇದನ್ನೂ ಓದಿ: Amit Shah: ನಿತೀಶ್ ಕುಮಾರ್‌ಗೆ ಬಿಜೆಪಿ ಬಾಗಿಲು ಶಾಶ್ವತವಾಗಿ ಮುಚ್ಚಿದೆ, ಬಿಹಾರದಲ್ಲಿ ಅಮಿತ್‌ ಶಾ ಘೋಷಣೆ
ಮುಖ್ಯಮಂತ್ರಿ ಜತೆ ಭದ್ರತೆಗಾಗಿ ವಿಶೇಷ ಭದ್ರತಾ ಗ್ರೂಪ್ (SSG), ಪಾಟ್ನಾ ಪೊಲೀಸರು ಇದ್ದರು. ಇವರು ಕೂಡಲೇ ಬೈಕರ್ನನ್ನು ಹಿಡಿದಿದ್ದಾರೆ. ತೀವ್ರ ವಿಚಾರಣೆಗೆ ಒಳಪಡಿಸಿದ್ದಾರೆ. ಘಟನೆ ಬೆನ್ನಲ್ಲೇ ಎಸ್ಎಸ್ಜಿ ಕಮಾಂಡಂಟ್ ಹರಿ ಮೋಹನ್ ಶುಕ್ಲಾ ಮತ್ತು ಪಾಟ್ನಾ ಎಸ್ಎಸ್ಪಿ ರಾಜೀವ್ ಮಿಶ್ರಾರಿಗೆ ಸಮನ್ಸ್ ನೀಡಿ, ಸ್ಪಷ್ಟನೆ ನೀಡುವಂತೆ ಸೂಚಿಸಲಾಗಿದೆ. ಸ್ಥಳೀಯ ಸಿಸಿಟಿವಿ ಫೂಟೇಜ್ಗಳನ್ನೂ ಪರಿಶೀಲನೆ ನಡೆಸಲಾಗುತ್ತಿದೆ.
ನಿತೀಶ್ ಕುಮಾರ್ ಅವರಿಗೆ 2018ರಲ್ಲಿ ಜಡ್ ಪ್ಲಸ್ ಭದ್ರತೆ ಕೊಡಲಾಗಿದೆ. ಪ್ರಧಾನಿ ಮೋದಿ ಸುತ್ತ ಹೇಗೆ ಎಸ್ಪಿಜಿ ಕಮಾಂಡೋಗಳು ಸುತ್ತುವರಿದಿರುತ್ತಾರೋ, ಅದೇ ಮಾದರಿಯಲ್ಲಿ ಎಸ್ಎಸ್ಜಿ ಕಮಾಂಡೋಗಳು ನಿತೀಶ್ ಕುಮಾರ್ ಸುತ್ತಲೂ ಇರುತ್ತಾರೆ. ಇವರ ಹೊರತಾಗಿ ಬಿಹಾರ ಮಿಲಿಟರಿ ಪೊಲೀಸ್, ಸ್ಥಳೀಯ ಪೊಲೀಸರೂ ಭದ್ರತೆಗೆ ನಿಯೋಜನೆಗೊಂಡಿರುತ್ತಾರೆ. ಯಾವುದೇ ಸಾರ್ವಜನಿಕ ಸಮಾರಂಭಗಳಲ್ಲಿ ಏನಿಲ್ಲವೆಂದರೂ 50 ಭದ್ರತಾ ಪಡೆ ಸಿಬ್ಬಂದಿ ಇದ್ದೇ ಇರುತ್ತಾರೆ.