ಸೆಕ್ಸ್ ಚಾಟ್​ ಸುಳಿಯಲ್ಲಿ ಬಿಜೆಪಿ ನಾಯಕ; ತನಿಖೆಗೆ ಆಗ್ರಹಿಸಿ ಮಹಾರಾಷ್ಟ್ರ ಡಿಸಿಎಂ ಫಡ್ನವೀಸ್​​ಗೆ ಪತ್ರ

ನವ ದೆಹಲಿ: ಬಿಜೆಪಿ ನಾಯಕ (BJP Leader) ಕಿರೀಟ್ ಸೋಮಯ್ಯ (BJP leader Kirit Somaiya) ಅವರದ್ದು ಎನ್ನಲಾದ ಒಂದು ಸೆಕ್ಸ್ಚ​ ವಿಡಿಯೊವನ್ನು ಮಹಾರಾಷ್ಟ್ರದ ಮರಾಠಿ ನ್ಯೂಸ್ ಚಾನೆಲ್​ ಪ್ರಸಾರ ಮಾಡಿದೆ. ಅದೀಗ ದೊಡ್ಡಮಟ್ಟದ ವಿವಾದಕ್ಕೆ ಕಾರಣವಾಗಿದೆ. ಕಿರೀಟ್ ಸೋಮಯ್ಯನವರು ಯಾವುದೋ ಮಹಿಳೆಯೊಂದಿಗೆ ಸೆಕ್ಸ್ ಚಾಟ್​ ನಡೆಸುತ್ತಿರುವ ವಿಡಿಯೊ ಇದಾಗಿದ್ದು, ಸೋಷಿಯಲ್ ಮೀಡಿಯಾದಲ್ಲೂ ಕೂಡ ವೈರಲ್ ಆಗುತ್ತಿದೆ.

ಆದರೆ ಮಹಾರಾಷ್ಟ್ರ ಬಿಜೆಪಿ ನಾಯಕ ಕಿರೀಟ್ ಸೋಮಯ್ಯ ಈ ಆರೋಪವನ್ನು ತಳ್ಳಿ ಹಾಕಿದ್ದಾರೆ. ‘ನಾನು ಯಾವ ಮಹಿಳೆಯ ಮೇಲೆಯೂ ಲೈಂಗಿಕ ದೌರ್ಜನ್ಯ ನಡೆಸಿಲ್ಲ. ಈ ವಿಡಿಯೊ ನನ್ನದಲ್ಲ . ದಯವಿಟ್ಟು ವಿಡಿಯೊ ಬಗ್ಗೆ ತನಿಖೆಯಾಗಬೇಕು’ ಎಂದು ಮಹಾರಾಷ್ಟ್ರ ಉಪಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್​ ಅವರಿಗೆ ಪತ್ರ ಬರೆದಿದ್ದಾರೆ. ಟ್ವೀಟ್ ಕೂಡ ಮಾಡಿರುವ ಅವರು ‘ನಾನು ಹಲವು ಮಹಿಳೆಯರಿಗೆ ಲೈಂಗಿಕ ಕಿರುಕುಳ ನೀಡಿದ್ದೇನೆ. ಇಂಥ ಇನ್ನೂ ಹಲವು ವಿಡಿಯೊಗಳು ಇವೆ, ನನ್ನ ವಿರುದ್ಧ ದೂರುಗಳು ದಾಖಲಾಗಿವೆ ಎಂದು ನ್ಯೂಸ್​ ಚಾನೆಲ್​ನಲ್ಲಿ ಪ್ರತಿಪಾದಿಸಲಾಗುತ್ತಿದೆ. ಆದರೆ ಇದು ಸುಳ್ಳು. ಈ ಆರೋಪದ ಬಗ್ಗೆ ತನಿಖೆಯಾಗಲಿ. ವಿಡಿಯೊಗಳನ್ನು ಪರಿಶೀಲನೆ ಮಾಡಬೇಕು ಎಂದು ಕಿರೀಟ್ ಸೋಮಯ್ಯ ಆಗ್ರಹಿಸಿದ್ದಾರೆ.

ಇದನ್ನೂ ಓದಿ: ಮಹಿಳೆಯ ಮೇಲೆ ಗ್ಯಾಂಗ್‌ರೇಪ್‌, ಬಾಲಕಿಗೆ ಲೈಂಗಿಕ ಕಿರುಕುಳ; ಬಿಜೆಪಿ ನಾಯಕನ ಪುತ್ರನೇ ಆರೋಪಿ

ಮಹಾರಾಷ್ಟ್ರ ಬಿಜೆಪಿ ನಾಯಕ ಕಿರೀಟ್ ಸೋಮಯ್ಯನವರ ಈ ವಿಡಿಯೊ ರಾಜಕೀಯ ವಲಯದಲ್ಲಿ ಚರ್ಚೆ ಹುಟ್ಟುಹಾಕಿದೆ. ಎನ್​ಸಿಪಿ ಪಕ್ಷದ (ಶರದ್ ಪವಾರ್ ಬಣ)ವಿದ್ಯಾ ಚೌಹಾಣ್ ಪ್ರತಿಕ್ರಿಯೆ ನೀಡಿ ‘ಕಿರೀಟ್ ಸೋಮಯ್ಯ ವಿಡಿಯೊ ನೋಡಿ ಅಸಹ್ಯವಾಯಿತು. ಮಹಿಳೆಯೊಬ್ಬರಿಗೆ ಲೈಂಗಿಕ ಭಾಷೆಯಲ್ಲಿ ಬೈಯ್ಯುತ್ತಿರುವುದನ್ನು ವಿಡಿಯೊದಲ್ಲಿ ನೋಡಬಹುದು. ಅವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ. ಕಾಂಗ್ರೆಸ್​ ನಾಯಕಿ ಯಶೋಮತಿ ಠಾಕೂರ್ ಪ್ರತಿಕ್ರಿಯೆ ನೀಡಿ ‘ಬಿಜೆಪಿ ನಾಯಕರು ಪದೇಪದೆ ನೈತಿಕತೆಯ ಬಗ್ಗೆ ಉಪನ್ಯಾಸ ಕೊಡುತ್ತಾರೆ. ಆದರೆ ಇಂಥ ಕೆಲಸ ಮಾಡುತ್ತಾರೆ. ಸೂಕ್ತ ಕ್ರಮ ಜರುಗಿಸಿ’ ಎಂದು ಆಗ್ರಹಿಸಿದ್ದಾರೆ.