ಇಂಫಾಲ್: ಖ್ಯಾತ ನಟಿ ಸನ್ನಿ ಲಿಯೋನ್ (Sunny Leone) ಪಾಲ್ಗೊಳ್ಳಲಿದ್ದ ಫ್ಯಾಶನ್ ಶೋ ನಡೆಯಬೇಕಿದ್ದ ಸ್ಥಳದ ಬಳಿಯೇ ಇಂದು ಮುಂಜಾನೆ ಪ್ರಬಲ ಬಾಂಬ್ ಸ್ಫೋಟಿಸಿದೆ. ಮಣಿಪುರದ ಇಂಫಾಲ್ ಜಿಲ್ಲೆಯ ಪೂರ್ವಭಾಗದಲ್ಲಿರುವ ಹಪ್ತ ಕಾಂಗ್ಜೆಬುಂಗ್ ಎಂಬಲ್ಲಿ ಫೆಬ್ರವರಿ 5 (ಭಾನುವಾರ) ಒಂದು ಫ್ಯಾಶನ್ ಶೋ ನಡೆಯುವುದಿತ್ತು. ಇದರಲ್ಲಿ ನಟಿ ಸನ್ನಿ ಲಿಯೋನ್ ಕೂಡ ಭಾಗವಹಿಸುವವರಿದ್ದರು. ಈ ಶೋ ನಡೆಯಬೇಕಿದ್ದ ಸ್ಥಳದಿಂದ 100 ಮೀಟರ್ ದೂರದಲ್ಲಿ ಇಂದು ಮುಂಜಾನೆ 6.06ರ ಹೊತ್ತಿಗೆ ಸ್ಫೋಟವುಂಟಾಗಿದೆ. ಅದೃಷ್ಟಕ್ಕೆ, ಯಾರಿಗೂ ಏನೂ ಅಪಾಯವಾಗಿಲ್ಲ.
ಈ ಫ್ಯಾಶನ್ ಶೋ ಕಾರ್ಯಕ್ರಮವನ್ನು ಮಣಿಪುರದ ಕೈಮಗ್ಗ ಮತ್ತು ಖಾದಿಯನ್ನು ಪ್ರಚಾರ ಮಾಡುವುದಕ್ಕೋಸ್ಕರ ಆಯೋಜಿಸಲಾಗಿತ್ತು. ಇಂದು ಮುಂಜಾನೆ ಸ್ಫೋಟಿಸಿದ್ದು ಯಾವ ಸ್ವರೂಪದ ಸ್ಫೋಟಕ ಎಂಬುದೂ ಖಚಿತವಾಗಿಲ್ಲ. ಸದ್ಯಕ್ಕಂತೂ ಯಾವುದೇ ಉಗ್ರಸಂಘಟನಗಳೂ ಈ ಸ್ಫೋಟದ ಹೊಣೆ ಹೊತ್ತುಕೊಂಡಿಲ್ಲ. ಪೊಲೀಸರು ತನಿಖೆ ಪ್ರಾರಂಭಿಸಿದ್ದಾರೆ.
ಇದನ್ನೂ ಓದಿ: ಟಿಇಟಿ ಪರೀಕ್ಷೆಗೆ ಶಿವಮೊಗ್ಗಕ್ಕೆ ಬಂದಿದ್ದಳಾ ಸನ್ನಿ ಲಿಯೋನ್; ನಡೆದಿದ್ದು ಏನು?
ಇತ್ತೀಚೆಗೆ ಅಂದರೆ ಜನವರಿ 25ರಂದು ಕೂಡ ಮಣಿಪುರದ ಉಕ್ರುಲ್ ಜಿಲ್ಲೆಯಲ್ಲಿ ಪ್ರಬಲ ಬಾಂಬ್ ಸ್ಫೋಟವಾಗಿತ್ತು. ಗಾಂಧಿ ಚೌಕ್ನಲ್ಲಿ ಉಂಟಾಗಿದ್ದ ಬಾಂಬ್ ಬ್ಲಾಸ್ಟ್ನಲ್ಲಿ ಮೂವರು ಪಾದಚಾರಿಗಳು ತೀವ್ರವಾಗಿ ಗಾಯಗೊಂಡಿದ್ದರು. ಬಳಿಕ ಅವರನ್ನೆಲ್ಲ ಲೀಶಿಫಂಗ್ ಆಸ್ಪತ್ರೆಗೆ ದಾಖಲು ಮಾಡಿ ಚಿಕಿತ್ಸೆ ನೀಡಲಾಗಿತ್ತು.