ಪಾಟ್ನಾ: ಬಿಹಾರದ ಪಟ್ನಾ ರೈಲ್ವೆ ನಿಲ್ದಾಣದಲ್ಲಿ ಸೋಮವಾರ ಸಂಜೆ ಪ್ರಯಾಣಿಕರೆಲ್ಲ ಕಂಗಾಲಾಗಿ ನಿಂತಿದ್ದರು. ಎಲ್ಲಿ ಓಡಬೇಕು, ಏನು ಮಾಡಬೇಕು ಎಂಬುದು ತಿಳಿಯದಂತಾಗಿ ಪೇಚಾಟಕ್ಕೆ ಸಿಲುಕಿದ್ದರು. ಭದ್ರತಾ ಸಿಬ್ಬಂದಿ ಕೂಡ ಫುಲ್ ಅಲರ್ಟ್ ಆಗಿದ್ದರು. ರೈಲ್ವೆ ಸ್ಟೇಶನ್ನ ಮೂಲೆಮೂಲೆಯಲ್ಲಿ ಪೊಲೀಸ್ ಸಿಬ್ಬಂದಿ ಹುಡುಕಾಟ ನಡೆಸಿದ್ದರು.…
ಇವೆಲ್ಲಕ್ಕೂ ಕಾರಣವಾಗಿದ್ದು ಒಂದು ಹುಸಿ ಬಾಂಬ್ ಕರೆ. ಸೋಮವಾರ (ಡಿ.19) ಸಂಜೆ ಹೊತ್ತಿಗೆ ಪಾಟ್ನಾ ರೈಲ್ವೆ ಸ್ಟೇಶನ್ನಲ್ಲಿ ಬಾಂಬ್ ಇಡಲಾಗಿದೆ ಎಂಬುದೊಂದು ಮಾಹಿತಿ ಅಲ್ಲಿನ ಪೊಲೀಸ್ ಠಾಣೆಗೆ ಬಂತು.
ಕೂಡಲೇ ಕಾರ್ಯಪ್ರವೃತ್ತರಾದ ಪೊಲೀಸರು ರೈಲ್ವೆ ಸ್ಟೇಷನ್ಗೆ ಬಂದರು. ಅಲ್ಲಿನ ಪ್ರಯಾಣಿಕರಿಗೆ ಧೈರ್ಯವನ್ನೂ ತುಂಬಿದ್ದರು. ಬಾಂಬ್ ನಿಷ್ಕ್ರಿಯ ದಳದ ಸಿಬ್ಬಂದಿ ಕೂಡ ಆಗಮಿಸಿದ್ದರು. ಆದರೆ ಅದೆಷ್ಟೇ ಹುಡುಕಿದರೂ ಬಾಂಬ್ ಮಾತ್ರ ಸಿಗಲೇ ಇಲ್ಲ. ಕೊನೆಗೆ ಅದೊಂದು ಹುಸಿ ಬಾಂಬ್ ಕರೆ ಎಂಬುದು ಖಚಿತವಾಗಿದೆ. ಪ್ರಯಾಣಿಕರೂ ನಿರಾಳರಾಗಿದ್ದಾರೆ.
‘ಬಾಂಬ್ ಇದೆ ಎಂಬ ಮಾಹಿತಿ ಬಂತು. ಹೋಗಿ ಹುಡುಕಿದರೆ ಏನೂ ಸಿಕ್ಕಿಲ್ಲ. ಹೀಗೆ ಹುಸಿ ಕರೆ ಮಾಡಿದ್ಯಾರು? ಆ ಮಾಹಿತಿ ಬಂದಿದ್ದು ಎಲ್ಲಿಂದ ಎಂಬ ಬಗ್ಗೆ ನಾವು ವಿಶೇಷ ತನಿಖೆ ನಡೆಸುತ್ತಿದ್ದೇವೆ ಎಂದು ಪಾಟ್ನಾ ರೈಲ್ವೆ ಸ್ಟೇಷನ್ ಪೊಲೀಸ್ ಉಸ್ತುವಾರಿ ರಂಜಿತ್ ಕುಮಾರ್ ಹೇಳಿದ್ದಾರೆ.
ಇದನ್ನೂ ಓದಿ: ದೆಹಲಿಯಲ್ಲಿ ಲ್ಯಾಂಡ್ ಆಗಲಿರುವ ವಿಮಾನದಲ್ಲಿ ಬಾಂಬ್ ಇದೆಯೆಂಬ ಕರೆ; ಮಧ್ಯರಾತ್ರಿ ಭದ್ರತೆ ಹೆಚ್ಚಳ