ಭೋಪಾಲ್: ಮಧ್ಯಪ್ರದೇಶದಲ್ಲಿ ಯಾವುದೇ ಪ್ರಕರಣದ ಆರೋಪಿಗಳು ಕಾನೂನು ಶಿಕ್ಷೆ ಪಡೆಯುವ ಜತೆಗೆ, ಬುಲ್ಡೋಜರ್ ಶಿಕ್ಷೆಯನ್ನೂ ಪಡೆಯುತ್ತಾರೆ. ಆರೋಪಿಗಳ ಮನೆಗಳನ್ನು ಕೆಡವಲು ಸ್ಥಳೀಯ ಆಡಳಿತಾಧಿಕಾರಿಗಳು ಜೆಸಿಬಿಯೊಟ್ಟಿಗೆ ಬಂದೇ ಬಿಡುತ್ತಾರೆ. ಇದೀಗ ಈ ಶಿಕ್ಷೆಗೆ ಗುರಿಯಾಗಿರುವುದು ನಾಲ್ವರು ಕೊಲೆ ಆರೋಪಿಗಳು. ಇಬ್ಬರನ್ನು ಹತ್ಯೆ ಮಾಡಿ, ನಾಪತ್ತೆಯಾಗಿರುವ ಆರೋಪಿಗಳಾದ ಜಾಹರ್ ಸಿಂಗ್, ಉಮೇದ್ ಸಿಂಗ್, ಮಖನ್ ಸಿಂಗ್ ಮತ್ತು ಅರ್ಜುನ್ ಸಿಂಗ್ ಎಂಬುವರಿಗೆ ಸೇರಿದ ಬೆಳೆಯನ್ನು ಬುಲ್ಡೋಜರ್ ನೆಲಸಮ ಮಾಡಿದೆ.
ಎರಡು ವಾರಗಳ ಹಿಂದೆ ಈ ನಾಲ್ವರೂ ಸೇರಿ, ಬದ್ರಿ ಶುಕ್ಲಾ (68) ಮತ್ತು ಅವರ ಸಹೋದರ ರಾಮ್ಸೇವಕ್ ಶುಕ್ಲಾ (65)ರನ್ನು ಗುಂಡಿಟ್ಟು ಕೊಂದಿದ್ದರು. ಜಮೀನು ವಿವಾದದ ಕಾರಣಕ್ಕೆ ಈ ಹತ್ಯೆಯಾಗಿತ್ತು. ಫೆ.28ರಂದು ಈ ಆರೋಪಿಗಳೆಲ್ಲ ಸೇರಿ ಶುಕ್ಲಾ ಸಹೋದರರಿಗೆ ಸೇರಿದ ಹೊಲಕ್ಕೆ ಟ್ರ್ಯಾಕ್ಟರ್ ತಂದು, ಅದನ್ನು ಉಳುಮೆ ಮಾಡಲು ಮುಂದಾಗಿದ್ದರು. ಆಗ ಶುಕ್ಲಾ ಸಹೋದರರು ಅದನ್ನು ತಡೆದಿದ್ದರು. ಅದಾಗಿ ಕೆಲವೇ ಹೊತ್ತಲ್ಲಿ, ನಾಲ್ವರು ಸೇರಿ ಶುಕ್ಲಾ ಸೋದರರ ಮನೆಗೆ ನುಗ್ಗಿ ಅವರನ್ನು ಕೊಂದಿದ್ದರು.
ಇದನ್ನೂ ಓದಿ: ಬುಲ್ಡೋಜರ್ ಹೆಸರು ಹೇಳಿ ಹೆದರಿಸಿ ಕಾಂಗ್ರೆಸ್ ನಾಯಕರು, ಕಾರ್ಯಕರ್ತರನ್ನು ಬಿಜೆಪಿಗೆ ಕರೆದ ಮಧ್ಯಪ್ರದೇಶ ಸಚಿವ!
ತನಿಖೆ ಕೈಗೆತ್ತಿಕೊಂಡ ಪೊಲೀಸರು ಈಗ ನಾಲ್ವರು ಸಿಂಗ್ಗಳಿಗೆ ಸೇರಿದ ಭೂಮಿಯಲ್ಲಿ ಬೆಳೆಯಲಾಗಿದ್ದ ಬೆಳೆಯನ್ನು ಬುಲ್ಡೋಜರ್ ಮೂಲಕ ಧ್ವಂಸ ಮಾಡಿಸಿದ್ದಾರೆ. ಅಷ್ಟೇ ಅಲ್ಲ, ಇದು ಸರ್ಕಾರಿ ಭೂಮಿಯಾಗಿದ್ದು ನಾಲ್ವರೂ ಸೇರಿ ಅದನ್ನೆಲ್ಲ ಅತಿಕ್ರಮಣ ಮಾಡಿಕೊಂಡಿದ್ದಾರೆ. ಹಳ್ಳಿಯಲ್ಲಿರುವ ಸರ್ಕಾರಿ ಶಾಲೆಯ ಕಟ್ಟಡ, ಬೋರ್ವೆಲ್ಗಳನ್ನೂ ಒತ್ತುವರಿ ಮಾಡಿದ್ದು, ನಾವು ತೆರವು ಮಾಡುತ್ತಿದ್ದೇವೆ ಎಂದು ಹೇಳಿದ್ದಾರೆ. ಹಾಗೇ, ಆರೋಪಿಗಳಿಗೆ ಸೇರಿದ, ಸುಮಾರು 25 ಲಕ್ಷ ರೂಪಾಯಿ ಮೌಲ್ಯದ ಆಸ್ತಿಯನ್ನು ಜಪ್ತಿ ಮಾಡಿದ್ದಾಗಿ ತಹಸೀಲ್ದಾರ್ ವಿಕಾಸ್ ಅಗರ್ವಾಲ್ ತಿಳಿಸಿದ್ದಾರೆ.