ನವ ದೆಹಲಿ: ಆರ್ಜೆಡಿ ನಾಯಕ ಲಾಲು ಪ್ರಸಾದ್ ಆಪ್ತ ಸುನೀಲ್ ಸಿಂಗ್ ಮತ್ತು ಇತರ ಹಲವು ನಾಯಕರಿಗೆ ಸೇರಿದ ಹಲವು ಸ್ಥಳಗಳ ಮೇಲೆ ಸಿಬಿಐ ದಾಳಿಯಾಗಿದೆ. ಲಾಲೂ ಪ್ರಸಾದ್ ಸಿಂಗ್ ಕೇಂದ್ರದಲ್ಲಿ ರೈಲ್ವೆ ಸಚಿವ ಆಗಿದ್ದಾದ ನಡೆದ, ಉದ್ಯೋಗಕ್ಕಾಗಿ ಭೂಮಿ (ಯಾರು ಭೂಮಿಯನ್ನು ಕೊಡುತ್ತಾರೋ, ಅವರು ಅನರ್ಹರಾಗಿದ್ದರೂ ಉದ್ಯೋಗ ಕೊಡಿಸಿದ ಹಗರಣ) ಹಗರಣ ಸಂಬಂಧಿತ ಕೇಸ್ನಲ್ಲಿ ಸಿಬಿಐ ದಾಳಿ ಮಾಡಿದೆ. ಸುನೀಲ್ ಸಿಂಗ್ ಅಷ್ಟೇ ಅಲ್ಲದೆ, ಸುಬೋಧ್ ರಾಯ್, ಅಷ್ಫಾಕ್ ಕರೀಮ್ ಮತ್ತು ಫೈಯಾಜ್ ಅಹ್ಮದ್ ಮನೆಗಳಲ್ಲಿ ಕೂಡ ಸಿಬಿಐ ಶೋಧ ನಡೆಸಿದೆ.
ಲಾಲು ಪ್ರಸಾದ್ ಯಾದವ್ 2004ರಿಂದ 2009ರವರೆಗೆ ಕೇಂದ್ರ ಸರ್ಕಾರದಲ್ಲಿ ಯುಪಿಎ ಸರ್ಕಾರವಿದ್ದಾಗ ರೈಲ್ವೆ ಸಚಿವರಾಗಿದ್ದರು. ಈ ಅವಧಿಯಲ್ಲಿ ಬಿಹಾರದಲ್ಲಿ ಉದ್ಯೋಗಕ್ಕಾಗಿ ಭೂಮಿ ಹಗರಣ ನಡೆದಿದೆ ಎಂಬ ಆರೋಪವಿದೆ. ಲಾಲು ಪ್ರಸಾದ್ ಯಾದವ್, ಪತ್ನಿ ರಾಬ್ರಿ ಯಾದವ್, ಮಕ್ಕಳಾದ ಮಿಸಾ ಯಾದವ್, ಹೇಮಾ ಯಾದವ್ ಮತ್ತು ಇನ್ನೂ ಹಲವರ ಹೆಸರನ್ನು ಸಿಬಿಐ ಎಫ್ಐಆರ್ನಲ್ಲಿ ಉಲ್ಲೇಖಿಸಿದೆ. ಉದ್ಯೋಗ ಬೇಕೆಂದರೆ ಭೂಮಿ ಕೊಡಿ ಎಂದು ಹೇಳಿ, ಅತ್ಯಂತ ಕಡಿಮೆ ಬೆಲೆಗೆ ಭೂಮಿಯನ್ನು ತೆಗೆದುಕೊಂಡು, ರೈಲ್ವೆ ಇಲಾಖೆಯಲ್ಲಿನ ಡಿ ದರ್ಜೆಯ ಉದ್ಯೋಗಗಳನ್ನು ಅನರ್ಹರಿಗೆ ಕೊಟ್ಟಿದ್ದಲ್ಲದೆ, ಆ ಭೂಮಿಯನ್ನು ತಮ್ಮ ಕುಟುಂಬ ಸದಸ್ಯರಿಗೇ ವರ್ಗಾಯಿಸಿಕೊಂಡಿರುವ ಆರೋಪ ಇದು. ಇದರಲ್ಲಿ ಹಲವು ಕೋಟಿ ರೂಪಾಯಿಗಳಷ್ಟು ಗೋಲ್ ಮಾಲ್ ಆಗಿದೆ ಎನ್ನಲಾಗಿದ್ದು, ಸಿಬಿಐ ತನಿಖೆ ನಡೆಯುತ್ತಿದೆ. ಇದೇ ವರ್ಷ ಮೇ ತಿಂಗಳಲ್ಲಿ ಆರ್ಜೆಡಿ ನಾಯಕರಿಗೆ ಸಂಬಂಧಪಟ್ಟ 17 ಸ್ಥಳಗಳ ಮೇಲೆ ರೇಡ್ ಆಗಿತ್ತು.
ಇದನ್ನೂ ಓದಿ: ಮೆಟ್ಟಿಲು ಇಳಿಯುವಾಗ ಆಯ ತಪ್ಪಿದ ಲಾಲು ಪ್ರಸಾದ್ ಯಾದವ್; ಭುಜ, ಬೆನ್ನಿನಲ್ಲಿ ಫ್ರಾಕ್ಚರ್