ಚೆನ್ನೈ: ಇಂದು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಚೆನ್ನೈಗೆ ಭೇಟಿ ಕೊಡಲಿದ್ದಾರೆ. ನರೇಂದ್ರ ಮೋದಿ ಭೇಟಿ ವಿರೋಧಿಸಿ ಕಾಂಗ್ರೆಸ್ನವರು ಕಪ್ಪು ಬಾವುಟ ಹಿಡಿದು ಪ್ರತಿಭಟನೆ ನಡೆಸಲು ಸಜ್ಜಾಗಿದ್ದಾರೆ. ಹೀಗೆ ಕಪ್ಪು ಬಾವುಟ ಹಿಡಿದು ಪ್ರತಿಭಟನೆಗೆ ಸಜ್ಜಾದ ಕಾಂಗ್ರೆಸ್ಸಿಗರಿಗೆ ನಟಿ, ಬಿಜೆಪಿ ನಾಯಕಿ ಖುಷ್ಬು ಸುಂದರ್ ತಿರುಗೇಟು ನೀಡಿದ್ದಾರೆ. ‘ ‘ಜಗತ್ತೇ ಪ್ರೀತಿಸುವ ನಮ್ಮ ಪ್ರಧಾನಿಯವರ ಬಗ್ಗೆ ಕಾಂಗ್ರೆಸ್ನವರು ಹೃದಯ ಮತ್ತು ಮನಸ್ಸಿನಲ್ಲಿ ದ್ವೇಷವನ್ನೇ ತುಂಬಿಕೊಂಡಿದ್ದಾರೆ. ಈಗ ಹೊಸದಾಗಿ ನಿರ್ಮಾಣವಾದ ಏರ್ಪೋರ್ಟ್ ಟರ್ಮಿನಲ್ ಬಗ್ಗೆಯೂ ಅವರಿಗೆ ಸಂತೋಷವಿಲ್ಲ. ಈ ಮೂಲಕ ತಮಿಳುನಾಡು ಅಭಿವೃದ್ಧಿ ಬೇಡ ಎಂದೇ ಬಯಸುತ್ತಿದ್ದಾರೆ. ಅದೇ ಅರ್ಥದ ಮಾತುಗಳನ್ನು ಆಡುತ್ತಿದ್ದಾರೆ. ಕಾಂಗ್ರೆಸ್ನಲ್ಲಿ ಕೆಲವರು ಇದ್ದಾರೆ. ಅವರಿಗೆ ತಾವು ಈ ರಾಜ್ಯವನ್ನು ಅವನತಿಗೆ ಕೊಂಡೊಯ್ಯುತ್ತಿರುವುದು ಗೊತ್ತಾಗುತ್ತಿಲ್ಲ. ಅವರು ಮಾತನಾಡುವಾಗ ತಮ್ಮ ಬುದ್ಧಿಯನ್ನು ಎಲ್ಲೋ ಹೂತುಹಾಕಿರುತ್ತಾರೆ. ಇನ್ನು ಕಾಂಗ್ರೆಸ್ಸಿಗರು ಸಂವೇದನಾಶೀಲರಾಗಿ ಮಾತನಾಡಲಿ ಎಂದು ನಿರೀಕ್ಷಿಸುವುದೂ ಒಂದೇ, ನಾವು ನಮ್ಮ ಸಂವೇದನೆಯನ್ನು ಪರೀಕ್ಷೆಗೆ ಒಡ್ಡುವುದೂ ಒಂದೇ. ಏನು ಮಾಡೋಕೆ ಆಗತ್ತೆ? ಚೇಲಾಗಳು ಅವರ ಬಾಸ್ನಂತೆಯೇ ಇರುತ್ತಾರೆ’ ಎಂದು ಟ್ವೀಟ್ಮಾಡಿದ್ದಾರೆ.
ಮೊದಲು ಕಾಂಗ್ರೆಸ್ನಲ್ಲಿಯೇ ಇದ್ದ ಖುಷ್ಬು ಸುಂದರ್ 2020ರಲ್ಲಿ ಬಿಜೆಪಿ ಸೇರಿದ್ದಾರೆ. ಹೀಗೆ ಬಿಜೆಪಿ ಸೇರ್ಪಡೆಯಾದ ಬಳಿಕ ಅವರು ಕಾಂಗ್ರೆಸ್ ವಿರುದ್ಧ, ಕಾಂಗ್ರೆಸ್ ನಾಯಕತ್ವದ ವಿರುದ್ಧ ವಾಗ್ದಾಳಿ ಹೆಚ್ಚಿಸಿದ್ದಾರೆ. ಇಂದು ಪ್ರಧಾನಿ ನರೇಂದ್ರ ಮೋದಿಯವರು ಚೆನ್ನೈಗೆ ಭೇಟಿ ನೀಡಿ, ಅಲ್ಲಿನ ಏರ್ಪೋರ್ಟ್ನಲ್ಲಿ ನಿರ್ಮಾಣವಾಗಿರುವ ಅತ್ಯಾಧುನಿಕ ಸೌಕರ್ಯ ಇರುವ ಟರ್ಮಿನಲ್ ಸೇರಿ, ಇನ್ನೂ ವಿವಿಧ ಯೋಜನೆಗಳನ್ನು ಉದ್ಘಾಟನೆ ಮಾಡಲಿದ್ದಾರೆ. ಹಾಗೇ, ಡಾ.ಎಂಜಿಆರ್ ಸೆಂಟ್ರಲ್ ರೈಲ್ವೆ ಸ್ಟೇಶನ್ನಲ್ಲಿ, ಚೆನ್ನೈ-ಕೊಯಂಬತ್ತೂರ್ ವಂದೇ ಭಾರತ್ ರೈಲು ಸಂಚಾರಕ್ಕೆ ಹಸಿರು ನಿಶಾನೆ ತೋರಿಸಲಿದ್ದಾರೆ. ಈ ಮಧ್ಯೆ ಪ್ರಧಾನಿ ನರೇಂದ್ರ ಮೋದಿ ಚೆನ್ನೈ ಭೇಟಿಯನ್ನು ಖಂಡಿಸಿ, ಕಾಂಗ್ರೆಸ್ಸಿಗರು ಕಪ್ಪು ಬಾವುಟ ಹಿಡಿದು ಪ್ರತಿಭಟನೆ ನಡೆಸಲು ಮುಂದಾಗಿದ್ದಾರೆ.
ಇತ್ತೀಚೆಗೆ ರಾಹುಲ್ ಗಾಂಧಿಯವರು 2019ರ ಮೋದಿ ಸರ್ನೇಮ್ಗೆ ಅವಹೇಳನ ಮಾಡಿದ ಕೇಸ್ನಲ್ಲಿ ದೋಷಿ ಎಂದು ಸಾಬೀತಾದಾಗ ಖುಷ್ಬು ಸುಂದರ್ ಅವರು 2018ರಲ್ಲಿ, ಅಂದರೆ ಅವರು ಕಾಂಗ್ರೆಸ್ನಲ್ಲಿ ಇದ್ದಾಗ ಮಾಡಿದ್ದ ಟ್ವೀಟ್ವೊಂದು ವೈರಲ್ ಆಗಿತ್ತು. ’ಇಲ್ಲಿ ಮೋದಿ, ಅಲ್ಲಿ ಮೋದಿ, ಎಲ್ಲೆಲ್ಲಿ ನೋಡಿದರೂ ಮೋದಿ..ಆದರೇನು ಮಾಡುವುದು? ಎಲ್ಲ ಮೋದಿಗಳ ಮುಂದೆಯೂ ಭ್ರಷ್ಟಾಚಾರವೆಂಬ ಉಪನಾಮವಿದೆ. ಮೋದಿ ಎಂದರೇ ಭ್ರಷ್ಟಾಚಾರ ಎಂಬ ಅರ್ಥವೇ? ನಾವು ಮೋದಿ ಪದದ ಅರ್ಥವನ್ನು ಭ್ರಷ್ಟಾಚಾರವೆಂದು ಬದಲಿಸೋಣ. ನೀರವ್, ಲಲಿತ್, ನಮೋ=ಭ್ರಷ್ಟಾಚಾರ ಎಂದು ಮಾಡೋಣ. ಇದು ಸೂಕ್ತವಾಗಿದೆ’ ಎಂದಿದ್ದರು. ಇದೇ ಟ್ವೀಟ್ ಇಟ್ಟುಕೊಂಡು ಕಾಂಗ್ರೆಸ್ ನಾಯಕರು ಖುಷ್ಬು ವಿರುದ್ಧ ಕ್ರಮ ಇಲ್ಲವೇ ಎಂದು ಪ್ರಶ್ನೆ ಮಾಡಿದ್ದರು.
ಇದನ್ನೂ ಓದಿ: ChatGPT: ರಾಹುಲ್ ಗಾಂಧಿ ಭಾರತದ ಪ್ರಧಾನಿ ಆಗ್ತಾರಾ?-ಹಾಗಾಗಲು ಏಲಿಯನ್ಗಳೇ ಭೂಮಿಗೆ ಬರಬೇಕು ಎಂದು ಉತ್ತರಿಸಿದ ಚಾಟ್ ಜಿಪಿಟಿ
ರಾಹುಲ್ ಗಾಂಧಿಯವರು 2019ರ ಲೋಕಸಭೆ ಚುನಾವಣೆ ವೇಳೆ ಕೋಲಾರದಲ್ಲಿ ಮಾತನಾಡುವಾಗ ‘ಎಲ್ಲ ಕಳ್ಳರ ಉಪನಾಮಗಳೂ ಮೋದಿ ಎಂದೇ ಇರುತ್ತದೆ’ ಎಂದು ಹೇಳಿದ್ದರು. ಈ ಮೂಲಕ ಲಲಿತ್ ಮೋದಿ, ನೀರವ್ ಮೋದಿಯನ್ನು ಉಲ್ಲೇಖಿಸಿ ಪ್ರಧಾನಿ ನರೇಂದ್ರ ಮೋದಿಯವರನ್ನು ಅವಹೇಳನ ಮಾಡಿದ್ದರು. ಮೋದಿ ಉಪನಾಮದ ಬಗ್ಗೆ ಹೀಗೆ ಕೆಟ್ಟದಾಗಿ ಮಾತನಾಡಿದ್ದ ರಾಹುಲ್ ಗಾಂಧಿ ವಿರುದ್ಧ ಬಿಜೆಪಿ ಶಾಸಕ ಪೂರ್ಣೇಶ್ ಮೋದಿ ಸೂರತ್ ಕೋರ್ಟ್ನಲ್ಲಿ ಮಾನನಷ್ಟ ಮೊಕದ್ದಮೆ ಹೂಡಿದ್ದರು. ಮಾ.23ರಂದು ತೀರ್ಪು ನೀಡಿದ ಕೋರ್ಟ್, ರಾಹುಲ್ ಗಾಂಧಿಯನ್ನು ದೋಷಿ ಎಂದು ಪರಿಗಣಿಸಿ, 2ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ. ಅದರ ಬೆನ್ನಲ್ಲೇ ರಾಹುಲ್ ಗಾಂಧಿ ಸಂಸದ ಸ್ಥಾನದಿಂದ ಅನರ್ಹಗೊಂಡಿದ್ದಾರೆ.
ರಾಹುಲ್ ಗಾಂಧಿಯವರು 2019ರಲ್ಲಿ ಹೇಳಿದ ಮಾತುಗಳಿಗೂ, ಖುಷ್ಬು ಸುಂದರ್ ಅವರು 2018ರಲ್ಲಿ ಮಾಡಿದ್ದ ಟ್ವೀಟ್ಗೂ ಏನು ವ್ಯತ್ಯಾಸ ಎಂದು ಕಾಂಗ್ರೆಸ್ ನಾಯಕರು ಪ್ರಶ್ನಿಸಿದ್ದರು. ಅದರ ಬೆನ್ನಲ್ಲೇ ಸಮರ್ಥನೆ ಕೊಟ್ಟಿಕೊಂಡಿದ್ದ ಖುಷ್ಬು, ‘ಹೌದು..ನಾನು ಆಗ ಟ್ವೀಟ್ ಮಾಡಿದ್ದೆ. ಆದರೆ ಬಹಳ ಹಿಂದೆಯೇ ನನ್ನ ನಿಲುವು ಬದಲಿಸಿಕೊಂಡು, ತಪ್ಪು ಸರಿಪಡಿಸಿಕೊಂಡು ಬಿಜೆಪಿಗೆ ಸೇರ್ಪಡೆಯಾಗಿದ್ದೇನೆ’ ಎಂದಿದ್ದರು.